Насигьятар 27 - Гирами Китаб

¹ Закурин йигъʼинди тяриф мапӀан, увуз аьгъдарвуз фу хуруш диди.

² Гъит жарари, хъа уву ваъ, яв тяриф апӀри; яв ваъ, хъа жарарин ушвни.

³ Гъван гъагъиб ву, гъумра пчӀуб дар, аммаки гьадрартӀан хъа гъагъидар ву ахмакьрин тӀулар.

⁴ Хъял инсафсузуб ву, гъизгъинвал гъурдаъ бисуз шлуб дар, аммаки жилирин гъанихвалин улихь шилхьан дийигъуз шул?

⁵ Машнаъ ачухъди кӀурур зина ву ккебехънайи дусттӀан.

⁶ Ккунири зиян апӀуру – марцци кӀваан, душмни мак апӀуру – иблисвалиан.

⁷ Тухъ гъахьири йиччвра ликриккан апӀиди, хъа гашди айириз кьутӀкьлибра меэлди гьибгъди.

⁸ Мукьʼан утӀубччву жакьвси, ву инсанра багъри йишвар дирчну гъушур.

⁹ ЮкӀв шад апӀуру мялгьямарина аьтрари – гьаци кбалгуру дустран кӀваантӀан вуйи насигьят.

¹⁰ КӀваълан магьаан я яв дустар, я яв адашдин дустар; балайикк ккахъган – мягъян багахьлуйирихьна: зина ву гъунши, багахь гъардаштӀан, ярхлаъ айи.

¹¹ Аькьюл ади йихь, жан бай, ва йиз юкӀв шад апӀин, узхьанра хьибди тувуз жаваб гиран ктапӀдариз.

¹² Фикирлуйиз харжиб гъябкъиш – кӀул ккадабгъиди, хъа авамар дидихьна диш дапӀну гъягъиди – хъасин хьиди чиб швумал.

¹³ Чаз аьгъдру касдин буржарихъанди гаф туврурин палатра тадабгъиди, жарарин хъпирихъди гъахьиризра гьациб хьибди.

¹⁴ Гьир хьайизра гъуншдин тярифар вари сес идипну апӀуб, агьрар апӀувалик гьисаб ву.

¹⁵ Амси йигъан мархьси ву улхру хпирра;

¹⁶ думу дерккуб микӀ дебккбак гьисаб ву, ясана гъурдаъ ччим чӀюбкьювалик.

¹⁷ Рукь учӀру апӀуру рукьу, хъа инсандикан инсан ктаура жара инсанари.

¹⁸ Тартиб апӀрури инжир – йимиш ипӀиди, чан агъайин гъайгъушнаъ айириз аьгъю хьибди гьюрмат.

¹⁹ Шидʼан маш рябкъруси, гьаци инсандиз чан юкӀвра рябкъюра жарарин кӀваъ.

²⁰ АбцӀруб дар гъачӀидарин дюнʼя – гьаци инсандин уларра ацӀрудар дар.

²¹ Баттлиъ арс ебцӀруси ва жаднакк гъизил убччвруси, гьаци инсан ахтармиш апӀуру тярифнан гафари.

²² Ахмакьур кьутаъ гъубччвишра дяхнихъди сабси, ахмакьʼвал дугъхьан жара апӀуз хьибдар.

²³ Вари яв марччар увуз са-сабди аьгъюди йихь, жвуван сюрйирин гъайгъушнаъ йихь;

²⁴ фицики гьич саб жюрейин девлетарра гьаммишандиз гъузрудар дар, тажра насларихьна гьарган гъябгъюри шулдар.

²⁵ УкӀ гъеебццу – аммаки магьа хъана чрушин, дуршвна укӀар хярариан;

²⁶ ччилар – увуз алабхьрубдиз, мудрар – хутӀлихъанди тувру кьимат,

²⁷ ккунибкьан цӀигьран никк увуз хурагназ, яв хизандиз ипӀрубдиз ва тухъ апӀуз гъараваш дишагьлийир.