Насигьятар 26 - Гирами Китаб

¹ Хьадан гьацӀ кьялаъ йифси, игнин гьарайнаъ мархьси, гьаци абдалра адназ лайикь дар.

² Жакьв гъютӀубччвиди, псинчӀ тӀибхиди, гьаци давди гъапӀу агьра гъвалхьан гъябгъиди.

³ Гъирмаж – гьяйвниз, самбал – даждиз, хъа чӀвякъи тӀул – абдлин йирфариз.

⁴ Жаваб мутуван абдлиз ахмакьвалиинди, жвув дугъаз ухшар дархьбан бадали.

⁵ Жаваб тув абдлиз ахмакьвалиинди, дугъаз учв аькьюл айирси дархьбан бадали.

⁶ Жвуву жвуван ликар ккадатӀиди ва дерд хътӀюбкьиди, жвуван ляхнар абдлиин илирчрури.

⁷ Ликурин ликар хъахъруси, гьаци ву мисалра абдларин мелзниин.

⁸ Гъван гатӀабхьру тӀурник гъван кибтӀуб гьисаб ву абдал заанди дисубра.

⁹ Пияниска зазрахъан хъчӀихуб гьисаб ву абдли мисалар пубра.

¹⁰ Варидариз чӀимриан йивури, зийнар апӀурайирик гьисаб ву, фуж ккахъишра, абдларра кмиди, ляхниина гъадагърур.

¹¹ Чан идибчубдихьна хътабкурайи хуси, абдалра гьаци ву, чан ахмакьвалиъ утӀукьнайи.

¹² Гъяркъюнвуз адми, учв аькьюл айирси гьисаб апӀури? Гьацир адмийикантӀан абдликан хъа артухъ хайир а.

¹³ Темпли кӀура: «Рякъʼин аслан ал! Вягьши гьяйванат кючйириъ либцура!»

¹⁴ Петлийириин раккин тӀубччвурайиси, ахниъ ккидицурайи темпелра гьаци ву.

¹⁵ Темпли ипӀрубдиъ хил убччвди, хъа ушвнихъна гъабхайиз, эргди.

¹⁶ Темпли учв, фагьумлуди улхурайи ургуртӀан зина аькьюл айирси гьисаб апӀура.

¹⁷ Хуйин ибариз зигуб гьисаб ву, фу фтикна вуш аьгъю дарапӀди, жарарин гьюжатаригъ гъючӀвуб.

¹⁸ Деллу духьнайири фици деетураш ургурайи чӀимрарна аьжал,

¹⁹ гьаци ву, жарар алдатмиш апӀури, «Зарафат вуйиз гьа!» – гъапирра.

²⁰ КкудукӀу гакӀвлар – ктӀубшву цӀа, футнакар имдар – гъяувалар сикин гъаши.

²¹ Аржларилан – ялав, гакӀвларилан – цӀа, хъа футнакрин улхбарилан – гъярхьувалар.

²² Футнакрин улхбар иццишинси ву, ва адмийири дурар итӀури шулу.

²³ Арс йивнайи ругдин гъабрак гьисаб ву, хъял айи юкӀв ади, мани гафар пуб.

²⁴ Душмни ширин гафар кӀурашра, дугъу чан гъянаъ чӀуру кьастар жин дапӀна;

²⁵ гьеле ширинуб вушра дугъан сес – мухъугъан, ургуб

²⁶ алдатмишʼвалихъ, дугъан хъял ккепӀна, ачухъ хьибди инсанариз дугъан кьаст.

²⁷ Шли ичӀ йибккураш, душваъ учв ахъди, шли гъван биргъураш, учв дидикк ккахъди.

²⁸ КучӀляхиз чав пуч апӀурайир ккундар, иблис мелзну гьязур апӀура бала.