Насигьятар 24 - Гирами Китаб

¹ Пис инсанариин бахил махьан, дурарикан сар хьуз махъачӀарккан,

² инсафсуз ляхнар а дурарин фикрариъ, шлиз-вуш бала гьязур апӀура дурарин ушвари.

³ Аькьвли тикмиш апӀура хал, душваъ фагьми мюгькам апӀура тухмар,

⁴ хъа аьгъюваларира абцӀра ужагъ багьа ва тухъ шейʼарихъди.

⁵ Аькьюл айир кьувватлу ву, гъурдаъ аьгъювалар айир къудратлу ву.

⁶ Дяви гъабхури, хъебехъ теклифарихъ: насигьят туврудар гизаф айишваъ гъалибвал а.

⁷ Ахмакьриз аькьюл рубкьруб дар, гимихъ дугъхьан ушв абццуз хьибдар.

⁸ ЧӀуруб ккабалгруриз фендигар пиди.

⁹ Ахмакьрин ниятар ву гуннагь, ягьсузра инсанариз ву хяви.

¹⁰ Эгер яв рюгь бала гъядябхъю йигъан гъюбгъиш – дугъридан яв рюгь зяифуб вуяв.

¹¹ Аьжал гьадабтӀнайидар ккадаъ! ЙикӀуз гьадагънайидар уьрх!

¹² Пидива: «Учуз аьгъдайчуз дидкан!» Аммаки юкӀвар ахтармиш АпӀруриз хабар а, вари аьгъя яв уьмрин Гъаравлиз – Дугъу гьардиз, чаз лигну тувди.

¹³ Йиччв ипӀин, йиз бай, думу ужуб ву, фицики йиччв яв ушвниз меэлди ву.

¹⁴ Гьациб ву аькьюлра яв гъяназ, гъибихънуш думу увуз – авуз гележег, ва яв умударра гъюдучӀвидар.

¹⁵ Гьякьлуйин хуларихь гьякьсузси меккеан, дугъан ужагъ мапӀан тӀараш:

¹⁶ гьякьлур ургубан алдакиди, амма гъудужвиди, хъа гьякьсузар ахъди ва хьибди бала дурариз!

¹⁷ Алдакнийин яв душман – шад махьан, хъарснийин – гъит шад гьарай адрабхъри яв кӀваъ,

¹⁸ дарди гъабшиш, рябкъиди РАББИЙИЗ, гьисаб апӀиди думу, писвалси, ва Чан хъял яв душмнилан алдабгъидар.

¹⁹ Писдарикан хъял мапӀан, гьякьсузариин бахил махьан,

²⁰ фицики писвалихъ гележег хътар, гьякьсузарин ктӀубшвиди лампа.

²¹ РАББИЙИХЬАН ва паччагьдихьан гучӀ апӀин, жан бай, гьюкмиз къаршу гъедергрударихьан гъирагъ йив,

²² фицики бала гъибди дурарихьна хабарсузди: гъавриъ ана, фициб гьял РАББИЙИНА паччагьди дурариин алапӀуруш?

Аькьюл айидарин жара мисалар

²³ Магьа аькьюл айидарин жара гафар. Шлин-вуш тереф бисру суд – ужуб ляхин дар;

²⁴ шли гьякьсузриз: «Яв тахсир дар» гъапиш – агьнакк кка халкьарин, нигь дапӀна миллетари.

²⁵ Гьацдариз жаза туврудариз бахт хьибди, ужувлар дурариин алахьиди.

²⁶ Дугъри жаваб – мак апӀбак гьисаб ву.

²⁷ Сифте икир ккабалг, хъюгъ яв хутӀлихъ, ва хъасин увуз див хал.

²⁸ Жарарикан мапӀан кучӀлин шагьидвал – гъит дарибшри яв кӀвантӀариин кучӀал.

²⁹ «Дугъу узуз гьапӀнуш, узура дугъаз гьаци апӀидиза! Алдабгъидиза дугълан хъял!» – гьамци макӀан.

³⁰ Сабан гъярайза хутӀлихьантина темплин, тӀумтӀин багъдихьантина фикирсуз эйсийин,

³¹ гьаци магьа: гьар йишваъ аьхю дубхьна заз, варишвар ацӀна чӀуру укӀари, дарабгъна гъвандин арчил.

³² Гъилигунза, фикир гъапӀунза, магьа узуз фу гъябкънуш ва гъаври гъахьиза:

³³ хъана цӀиб ахарва, улар мани апӀарва, хил хлиин иливну хъана дусарва –

³⁴ ва гъибди увухьна касибвал, тӀафалси, аьжузвал гъибди тӀарашчиси.