Насигьятар 23 - Гирами Китаб

¹ Гьюкумдрихъди устлихъ деиган, дикъатниинди лиг, яв улихь фу хьаш;

² гаркӀал ккив яв гардандикк, ктисуз шулдарш.

³ Дугъан иццишнарихъ тямягь михъипан, думу ипӀруб алдатмиш апӀруб ву.

⁴ Девлет гъазанмиш апӀурза кӀури яманди бизар махьан, аьгъю йибхь фила дийигъуруш;

⁵ чав рябкъяйиз, думу гъубшну: люкьран хлинццар диди чак кивну, завариз думу гъитӀибху.

⁶ Кьискьис инсандихъди мипӀан, дугъан иццишнарихъ тямягь михъипан;

⁷ дицдари гьисаб апӀура, уву ипӀураш фукьан. Увуз пиди: «Буюр, ипӀин, убхъ», хъа юкӀв увухъди хътар дугъан,

⁸ хътӀюбкью кьацӀ идибчидияв, гъяни гафар дав хьидияв.

⁹ Абдлиз фукӀа макӀан – фикирлу гафниин думу аьлхъидитӀан дар.

¹⁰ ХутӀлин кюгьне лишан тинаси мапӀан, йитимарин хутӀил мибисан;

¹¹ фицики дурариз къудратлу гъайгъу Зигрур а, Гьадгъу уьбхиди, увуз къаршуди, дурарин тереф.

¹² ЮкӀв аьгъювалари абцӀ, ибра ужуб гафнахъ хъив.

¹³ Мигъитан бализ тербия тутрувди, саб-кьюб алдатну кӀури, думу йикӀидар.

¹⁴ Бай тӀулихьди урччварва – аьжалихьан уьрхярва.

¹⁵ Жан бай, эгер яв кӀваъ аькьюл аш – йиз кӀваъра хьибди шадвал,

¹⁶ йиз жан шадвали гъадабгъиди, эгер уву кӀури гъабшиш дугъриди.

¹⁷ Гъит яв юкӀв гуннагькрариин бахил дарибшри, гъит гьаммишан РАББИЙИХЬАН гучӀ кади ибшри,

¹⁸ фицики гъюзимбуб улубкьиди, ва яв умуд дубгидар.

¹⁹ Хъебехъ, жан бай, аькьюл айир йихь, яв юкӀв дугъри жилгъайиъ тӀапӀ.

²⁰ Махьан чяхриъ ул айидарихъди, гьял апӀуз даршлубкьан йикк ипӀрударихъди,

²¹ фицики пиянискана уьж касиб хьиди, хъа тӀагърували биркаригъян гъидиржидиву.

²² Хъебехъ адашдихъ, уву гъахи, хъа кьаби гъахьи дада улʼан миидитан.

²³ Гьякьвал гъазанмиш апӀин, думу фтихъкӀа масу мутуван – аькьюлра, тербияра, фагьумра.

²⁴ Гьякьлурин адашди шадвалин гьарай ипна, аькьюл айи бай гъапӀур шадваликан ктӀарццурадар.

²⁵ Шад ишри яв адашна дада, шадвалин гьарай ипри яв дадайи!

²⁶ Жан бай! Узухьинди илтӀибкӀ яв юкӀв, лиг йиз жилгъйиризди.

²⁷ Лицру дишагьли дерин ичӀак гьисаб ву, жарарин хпир – ккуру гъуйи,

²⁸ думу дишагьли ккеънайи тӀафлик гьисаб ву, артухъ апӀура нягьякьваларин кьадар.

²⁹ Шлин ву му гьарйир-чӀигъар? Шлин ву му гьюжатарна аьрзар? Шлин ву укӀушнар, наънан вуш хабар адрудар? Шлин улар уьру духьна?

³⁰ Чяхрихъ йигъар адаърударин, кефлу апӀру чяхрар агрударин.

³¹ Милиган чяхриз фици думу уьруб вуш ва захраъ дидин гарграр фици утӀурччвуруш, хъа фици рягьятди убхъруб вуш!

³² Хъасин битӀруси диди кьацӀ йивиди, агъу кайи битӀруси диди агъу убзди;

³³ хъа лигидива жарадарин хпариз, ва чӀуру хиялар гъиди фагьмиз;

³⁴ гьюлин кьялʼин дахънайиси гьибгъдивуз, елкандин кӀакӀниин даахнайиси хьибдивуз.

³⁵ «Гъивнийи узуз, – пидива, – хъа гъивубсира гъабхьундарзуз, гъурччвнийи – хъа кабхъундайзук; хъа даахну хъиргиган, хъана хъюгъдиза йиз хъайибдихъ».