Насигьятар 22 - Гирами Китаб

¹ Гьюрматлу ччвур артухъ ву девлеттӀан, инсанарин ккунивал зина ву гъизилна арстӀан.

² Девлетлуна касиб сатӀиди дийигъиди, фицики кьюридра халкь гъапӀну РАББИЙИ.

³ Фикирлуйиз харжиб гъябкъиш – кӀул ккадабгъиди, хъа авамар дидихьна диш дапӀну гъягъиди – хъасин хьиди чиб швумал.

⁴ РАББИЙИХЬАН вуйи гучӀʼвална фурс ктрувалин кьяляхъди, девлетра, гьюрматра, уьмурра хъа.

⁵ Писурин жилгъайиъ – зазарна чулар, уьмрин кьадри кайир дина гъягъидар.

⁶ Хъаъ жигьил дугъри рякъюхъ – кьаби гъахьиганра, думу душвхъан хътакидар.

⁷ Девлетлуйи аьхювал апӀура касибариин, буржнакк ккайирра лукӀ ву – чав гъибисурин.

⁸ Гьякьсузвал убзурайири ккадабцӀиди бала, ва дугъан гьюкмин гъибди аьхир.

⁹ Ужувлакк кка гъяни юкӀв айир, касибрихъди уьл пай апӀрур.

¹⁰ ГьутӀуркк ягьсуз – гьудубчӀвиди элегуб, хътӀарцциди гьюжатарна люкьнар.

¹¹ КӀван марццивал ккунир ва чан апӀру гафнаъра хуш вуйир паччагьдизра хьиди багахь.

¹² РАББИЙИН улмикк кка гьякьвал, хаинкрин гафар Дугъу батӀул апӀиди.

¹³ Темпли кӀуру: «Икриъ аслан а! Узу хулʼан удучӀвиш – сарун гъачӀи».

¹⁴ Жарарин хпирин уччву гафар – дерин ичӀ, РАББИЙИН хъюлакк ккайир ахъди душваъ.

¹⁵ Жигьилин кӀулиъ ахмакьвал аш, удубчӀвиди думу, чӀвякъи тӀул кубкӀиган.

¹⁶ Хайир бадали касиб гъагънакк ккитуб вая девлетлуйиз мутму тувуб – му заралтӀан дар.

Аькьюл айирин сумчӀур мисал

¹⁷ Иб хъив, хъебехъ гафарихъ аькьюл айидарин, фикир тув, йиз насигьятариз:

¹⁸ ширинди ву уьрхюз му гафар кӀваъ, гъит ишри дурар гьарган яв мелзниин;

¹⁹ РАББИЙИИН хъугъвал алди хьуз, узу увуз гъи дурарикан кӀураза.

²⁰ Узу увуз гъидикӀунза сумчӀур мисал – дихъидивуз дурариъ ужуб гафна аьгъювалар:

²¹ уву дургъбан бадали гьякьвалин гафар, шлуганси увхьан, яв аьхюдариз тувуз жавабар.

²² Касиб касдинуб матадабгъан, думу касиб ву кӀури, аьрзйириз лигру судариъ пай дурубкьуриз гиран макадапӀан,

²³ фицики РАББИЙИ уьбхиди дурарин тереф, уву касибуринуб тадабгъунва – гьаддиз Раббийи яв уьмурра тадабгъиди.

²⁴ Хъял гъюрурихъди дуствал мапӀан, хъял кубчӀврурихъди лицури махьан,

²⁵ дурарин шилнаъди гъушиш, яв увуз уву ккиврава чулар.

²⁶ Гьялак махьан жарарин буржарихъанди гаф тувуз, дурар кӀулʼина магъадагъан:

²⁷ дурар кдирчуз ужуб адарди гъабшиш, ахинра кмиди тадабгъидивухьан!

²⁸ ХутӀлин кюгьне лишан тинаси мапӀан, абйири дивнайи.

²⁹ Гъяркъюнвуз инсан, ляхнин устад? Думу паччгьарин гъуллугънаъ а, асккандарин – ваъ.