Насигьятар 21 - Гирами Китаб

¹ Паччагьдин юкӀв а хилиъ РАББИЙИН, архнаъ шидси, илтӀикӀиди думу РАББИЙИ ккунишвахьинди.

² Чан фикриинди, инсан гьарган дюз ву, аммаки РАББИЙИ ахтармиш апӀуру юкӀвар.

³ Гьякьди ва дюзди апӀрур кьабулди ву РАББИЙИЗ, гъурбнар апӀурайиртӀан.

⁴ Жвув заанди рякъюб ва фурслу юкӀв гьякьсузариз лампаси ву – му ву гуннагь.

⁵ Бин ккади ва мюгькамди апӀрубди бул бегьер хуру, хъа гьяляквали арайиз гъюрубра гъюз гъибтдар.

⁶ КучӀлиинди девлетар уч апӀрур ичӀивалихъ хъергна, диш духьна аьжалихьна.

⁷ Гьякьсузарин писвалари чиб йихиди: фицики дурар дюзвалихьан гьудучӀвна.

⁸ Тахсир кайидарин жилгъа биржури гъябгъюра, хъа тахсир ктрударин ляхнар дишди гъягъюра.

⁹ Шюмгъларихъ яшамиш хьуб ужу ву, улхру хпирихъди ужагъ пай апӀайиз.

¹⁰ Гьякьсузур дахаргна писвалихъ, жарарра гьяйиф апӀидар.

¹¹ Ягьсузриз жаза адабтӀара – дюзенйир фикирлу хьиди, аькьюл айир насигьятнахъ хъаъ – дугъан аьгъювалар за хьиди.

¹² Гьякьлуриз гьякьсузарин хулариъ шулайи ляхнар рякъюра ва дугъу дурариз жаза тувруси апӀиди.

¹³ Касибарин дихар ерхьруган, ибариъ тӀубар урччврури, саб ражари чавра гьарай ипди, амма дугъаз жаваб туврур хьидар.

¹⁴ Жини пешкеши хъял ккядябхъиди, гъятӀнихъ хъайи дашбаши пис гъизгъинвал дебккди.

¹⁵ Дюзвал удубчӀвуру кӀулиз – гьякьлур шад хьуз ва писур гукӀни хьуз.

¹⁶ Фуж удучӀвнаш жилгъайиан фагьмин, анжагъ гъачӀидарин паччагьлугъдиъ архаин хьиди.

¹⁷ Шадлугъар ккунирихъ касибвал хъа, чяхирна машкврар ккунир девлетлу хьидар.

¹⁸ Гьякьлуйиз ккилибгурайи балайикк ккахъди гьякьсуз, дугъри касдиз ккилибгурайи бедбахтвалиъ ахъди хаинкар.

¹⁹ ИчӀи чюлиъ яшамиш хьуб ужу ву, ушв хъадру ва гьярхьру хпирихъдитӀан.

²⁰ КкудукӀидар аькьюл айирин багьа шейʼар, хъа абдли думу вари кчвубхиди.

²¹ Гьякьвалихъна вафалувалихъ хъчӀаккруриз, бихъиди уьмурра, гьякьвалра, гьюрматра.

²² Аькьюл айири кьувватлуйирин шагьур мютӀюгъ апӀиди, дурарин умуд кайи гъала ккидипиди.

²³ Артухъ мелз дирибшврури жвув балйирихьан уьрхиди.

²⁴ Гьяясузрин ва фурслурин ччвур «ягьсуз» ву, дугъан гьяясузвалин аьхир айиб дар.

²⁵ Темплин тямягьяр гизафдар ву, хъа лихуз даккнивали думу йикӀура,

²⁶ йигълан йигъаз дугъаз артухъ ккун шула, хъа гьякьлури ужуб тувра гьяйиф дарапӀди.

²⁷ Гьякьсузарихьан вуйи гъурбнар хявишин ву, чӀуру кьаст ади апӀурайи гъурбнар, хъа аьхю хявишин ву.

²⁸ КучӀлин шагьид йикӀиди, хъа аьхиримжи гаф дугъри шагьидринуб хьибди.

²⁹ Гьякьсузри чан маш дебккру вари аьгъюриси, хъа дюзир ижмиди гъягъюру чан жилгъайиъди.

³⁰ Аькьюлра, фагьумра, аьяндарвалра – фукӀара дар РАББИЙИН улихь.

³¹ Гьязур апӀури шулу дявдиз гьяйван, аммаки гъалибвал – РАББИЙИХЬАН.