Насигьятар 20 - Гирами Китаб

¹ Чяхри аьлхъюз гъитру, ичкийи гъярхьуз гъитру, дурариин аьшкьламиш гъашириз, аькьюл шлуб дар.

² Паччагьдин яман хъял асландин ккярябгъюбсиб ву, думу жвувʼина хуб – жвуву жвуваз апӀурайи гуннагь ву.

³ Гьюжатарихьан ярхла вуйириз – гьюрмат, гьарсар ахмакьри апӀуру гъалмагъалихьна гьяракат.

⁴ Темпли хутӀил вахтниинди хътабкдар, гьаддиз иган апӀру вахтна дугъаз фукӀара бихъдар.

⁵ Инсандин ниятар дерин гъуйдин штар ву, фагьумлуйихьан дидʼан хьибди адабцӀуз.

⁶ Гизафдари чпин вафалуваликан гьарай ипру, аммаки дицир инсан дихъуйкӀан яраб?

⁷ Гьякьлур ктрацӀди яшамиш шулу, гьацирин наслар, хушбахтаврар ву!

⁸ Паччагь тахтниин суд апӀуз деиган, дугъан саб лигбу микӀлахь гьипди писвал.

⁹ Шли пиди: «Адариз кӀваъ харживал, йиз гунгьихьан узу марцц гъахьунза»?

¹⁰ Алвер апӀруган, кучӀлин гирйирна метрйир – му вари РАББИЙИЗ хявишин ву.

¹¹ БицӀирра кмиди аьгъю шулу ляхнариинди: марццидар вуш, дюзидар вуш дугъан ляхнар.

¹² Ебхьру иб, рябкъру ул – мура, тмура яратмиш дапӀна РАББИЙИ.

¹³ Ккундувуз ахуз – алабхъидивуин касибвал; ул иливидарва – ипӀидива ацӀайиз.

¹⁴ «Башаккадру мутму ву!» – гъадабгърури кӀуру, ва цӀиб гьудучӀвайизра, тяриф апӀуз хъюгъру.

¹⁵ Ал дюнʼяйиин гъизил, ал жавагьир гъванар, аммаки гьарсабдикан аьгъю мелз – хъана багьа ву.

¹⁶ Чаз аьгъдру касдин буржарихъанди гаф туврурин палатра тадабгъиди, Жарарин хъпирихъди гъахьиризра гьациб хьибди.

¹⁷ Алдатмиш дапӀну гъибису уьл меэлди шулу, аммаки ушвниъ думу гъумраз илтӀибкӀиди.

¹⁸ Яв апӀуз ккайи ляхнар жарадарихъди гьял апӀуз кӀваълан магьархан; дяви гъабхуради, хъебехъ теклифарихъ.

¹⁹ Футнийир даргърури сирарра масу тувди, гьаци вуйиган, лагълагъчийин тай махьан.

²⁰ Адашдизна дадайиз агьрар апӀрурин кутӀубшвиди лампа яман мучӀушнаъ.

²¹ Сифте рягьятди ккубкьу девлетну хъасин ужувлахъна дархур.

²² МакӀан: «ГъапӀу чӀуруб алдабгъидиза!» Хъугъвал апӀин РАББИЙИИН, ва Дугъу уьрхидиву.

²³ Ариш-веришдиъ кучӀал апӀуб РАББИЙИЗ хяви ву, дюз дару терезар пис ляхин ву.

²⁴ РАББИЙИ аъра адми рякъюъ, гьаддиз саризра аьгъдар чаз закур фу шулуш.

²⁵ Инсандиз гьялкья – гьялакди гъапӀу ху, ясана РАББИЙИЗ фикир дарапӀди туву гаф.

²⁶ Аькьюл айи паччагьди, микӀлахь гьахьди гьякьсузар, дурарилантина гъахиди гад апӀру гадар.

²⁷ Инсандиъ рюгь – РАББИЙИН лампа ву, айтӀантинара вари рябкъюз гъитру.

²⁸ Гьякьну ва рягьми уьрхюра паччагь, дугъривалиинди мюгькам апӀура тахт.

²⁹ Жигьилар кьувватну уткан апӀура, кьабидар лизишну кбалгура.

³⁰ Инсан писвалихьан чак куркӀу зийнари марцц апӀура, гъурччвурин хасият къайдайиз гъюра.