Насигьятар 2 - Гирами Китаб

¹ Йиз бай, эгер уву кьабул гъапӀиш йиз гафар ва гъюрхиш гъянаъ йиз насигьятар,

² аькьвлихъ иб хъивиш, юкӀвра фагьмихьна илбициш,

³ эгер уву гъач гъапиш аьгъювалариз, фагьмиз дих апӀури гъашиш,

⁴ арсси уву думу ккун гъапӀиш, ва хазнаси абгури гъашиш –

⁵ РАББИЙИХЬАН гучӀ хьайивал фу вуш аьгъю хьибдивуз ва Заанурикан вуйи аьгъювалар гъадагъидива.

⁶ Фицики РАББИЙИ тувра аькьюл, ва Дугъан мелзналан ву аьгъюваларна фагьум;

⁷ Гьадгъу гьязур дапӀна гъалибвал гьякьлуйириз, ва гъалхан – марцциди яшамиш шулайидариз.

⁸ Гьадгъу уьрхюра жилгъйир, гьякьвалин; Гьадгъан уликк кка рякъяр, Чаз вафалударин.

⁹ Гьадмуган аьгъю хьибдивуз дюзвал, гьякьвал, дугъривал ва гьарсаб ужуб жилгъа.

¹⁰ Гьаз гъапиш яв кӀваъ убчӀвди аькьюл, ва аьгъювалари апӀидивуз мани.

¹¹ Аьяндарвал яв гъайгъушнаъ хьибди, фагьми уву уьрхиди.

¹² Аькьвли уву уьрхиди чӀуру жилгъайихьан, ва ушвниъ кучӀал айи ксарихьан;

¹³ мучӀушнан жилгъйириъди гъягъбан бадали, диш рякъяриан удучӀвру ксарихьан,

¹⁴ Аькьвли уву уьрхиди чӀуру ляхнариин шад шлу ксарихьан, писвалинна улдугнайивалин кефнаъ айи ксарихьан,

¹⁵ ва кьяни жилгъйириъди чарх йивури, чпин шилнаъди гъярайи ксарихьан.

¹⁶ Гьамци уьрхидива жвув жарарин хпирихьан, жилирихь хьайирин мани гафарихьан,

¹⁷ чан жигьил вахтнахъанмина айи жилир гатӀахьу, Заанурин йикьрар кӀваълан гьарху думу дишагьлийихьан.

¹⁸ Фицики думу дишагьлийин хал – аьжалин ичӀ ву, дугъан жилгъа жиликк ккайи дийихнарихьна гъябгъюра.

¹⁹ Фуж дугъахьна учӀвиш, кьяляхъ гъидар, сарун уьмрин жилгъайиъ лик ивидар.

²⁰ Гьаддиз гъарах рякъюъди гъянидарин, дис жилгъйир гьякьлударин.

²¹ Фицики дугъри кас хьиди яшамиш жилиин, кацӀну адрур гъузди душвʼин.

²² Хъа жили терг апӀиди гьякьсузар, хаинкрар ччиварианзина уьчӀюргъиди.