Насигьятар 19 - Гирами Китаб

¹ Марцциди яшамиш шулайи касибди ужу ву, кучӀлин гафар мелзниин алди, абдалди хьайиз.

² Аьгъювалар адарди ужу даршул: гьялак ликар хъарсну алдакиди.

³ Ахмакьвали инсандин уьмур чӀур апӀуру, хъа гьаддин тахсир дугъу РАББИЙИИН илипуру.

⁴ Девлетну дустарин кьадар артухъ апӀуру, касибвали дустарихьан гьадахъуз гъитру.

⁵ Жазайихьан гьергидар кучӀлин шагьид, кучӀал нефес деебтрур ккутӀурччвидар.

⁶ Гизафдар гьюкумдариккан ккидицури шулу, ва пешкешар апӀрурихъди варди дуствал апӀуру.

⁷ Касибур гъардшаризра кмиди даккунди ву, дустарра дугъхьан ярхлаанси гъягъюру: гьялакди ву думу гаф капӀуз, хъа дустарин шил имдар!

⁸ Абгура фагьум ужуб ккунири: гъадабгъиди ужʼвал аькьюл уьбхрури.

⁹ Жазайихьан гьергидар кучӀлин шагьид, кучӀлиинди хътабгъурайир ил йикӀиди.

¹⁰ Абдлиз девлетлу уьмур лайикь дар, хъа лукӀру аьхюдариин гьюкум дапӀну ккундар.

¹¹ Фикирлуйи чаз хъял гъюз гъибтдар, гирнарилан хил алдабгъувал ву зурбавал.

¹² Паччагьдин хъял асландин ккярябгъювалсиб ву, хъа паччагьдин масанвал укӀʼин али чигсиб ву.

¹³ Абдал бай адашдиз бедбахтвал ву, хъа улхру хпир литӀнар гъюру гъваик гьисаб ву.

¹⁴ Хал ва девлет – абйириланмина вуйи ирс, хъа фагьумлу хпир – РАББИЙИХЬАН бахшанд.

¹⁵ ТӀагърур гьарган ижми нивкӀуъ хьиди, хъа лихуз даккнир гашʼвалиъ ахъди.

¹⁶ Табшуругъ уьбхрури уьбхюра уьмур, хъа йикӀиди чан рякъкан фикир дарапӀрур.

¹⁷ Шли касибуриз тувраш, РАББИЙИЗ буржди тувра, хъа РАББИЙИ дугъаз кьяляхъ тутрувди гъибтдар.

¹⁸ Бализ тербия тув, кьан шайиз, лиг, дугъан аьжалин тахсиркар махьан.

¹⁹ Гъит гьадабтӀри жаза хъял кубчӀвруриз, дугъаз хил хъибтиш, хьибди айибтӀан пис.

²⁰ Хъебехъ теклифнахъ, кьабул апӀин насигьят, аькьюл артухъ хьибдияв, яшар хьпахъ.

²¹ Гизаф кьастар а инсандин кӀваъ, тамам хьибди РАББИЙИ гьял гъапӀуб.

²² Инсандиъ вафалувал ади ккунду: кучӀляхтӀан касиб вуди ужу ву.

²³ РАББИЙИХЬАН вуйи гучӀ хьайивали уьмрихъна хура: дидихьди ацӀнайир архаинди ахура, дугъʼин улубкьидар бала.

²⁴ Темплиз чан гъабраан ипӀруб чан ушвнихъна гъабхузра тӀагъруди шулу.

²⁵ Ягьсузриз жаза гьадабтӀара – авамар фикрихъна гъиди, фагьумлуйиз хъжаргъарва – думу яв илмин гъавриъ ахъди.

²⁶ Адашдиз хътӀурччвру, дада утӀуккру бализ – нач ва аьйиб!

²⁷ Жан бай, насигьятарихъ хъпехъури даршиш, увуз аьгъюбра гьархдивуз кӀваълан.

²⁸ Лазим дару шагьид дюз суддик кялхъри шулу, къанун чӀюбгъюб гьякьсузариз хурагнак гьисаб ву.

²⁹ Ягьсуз ккутӀурччвидар суддиккан, хъа абдлин йирфар – йивбариккан.