Насигьятар 18 - Гирами Китаб

¹ Адмийирихьан жаради яшамиш шулайири чаз ккуниб апӀура, тувру насигьятар гьадаури тина.

² Абдлиз фикир апӀуб кьабулди дар, ккунду дугъаз фикриинди фурс апӀуз.

³ Писвалихъан гъибди даккнишин, хъа намус ктрувалихъан гъибди аьйиб.

⁴ Адмийин гафар – дерин штар, булагъ аькьвлин – ебчурайи шид.

⁵ Суддиъ писуриз кюмек апӀуб вая гьякьлурин дюз суд дарапӀуб пис ляхин ву.

⁶ Абдлин мелзну гьюжатариз адапӀиди, дугъан мучӀмучӀи йивбарихъ хъаъди.

⁷ Улхбариъ абдлин – чан аьжал, чав ахърушв – чан ушв.

⁸ Футнакрин улхбар иццишинси ву, ва адмийири дурар итӀури шулу.

⁹ ТӀагъруди лихрур дабгърурик гьисаб ву.

¹⁰ РАББИЙИН ччвур – зурба чӀвурд: гьякьлур душваъ гьитӀикӀиди ва хьибдар дисуз.

¹¹ Девлетлуйиз девлет гъаласи ву, дугъаз думу учв уьрхру ижми цалси гьибгъру.

¹² Жвув заанди улупрур ктахъиди, хъа фурс ктрур адлу хьиди.

¹³ ГьубкӀну хъпехъайиз жаваб тувуб – анжагъ ахмакьвална аьйибтӀан дар.

¹⁴ Жвуван ижми рюгьну ккабгъди уьзур, хъа фици хьибди, рюгь дюбгънаш?

¹⁵ Фикирлуйин юкӀву аьгъювалар уч апӀура, аькьюл айидарин ибари аьгъювалар агура.

¹⁶ Рушʼватну ачмиш апӀиди жилгъа ва абццди рякъ гьюкум айидарихьна.

¹⁷ Суддиз сарпирди илтӀикӀур гьякь ву – тмунур гьюжатнаъ учӀвайиз.

¹⁸ Тпутди гьюжатар дерккру ва гъярхьнайи кьувватлу касар мясляаьтназ хуру.

¹⁹ Гиран дубхьнайи гъардаш ижмиди дийибгънайи гъалайик гьисаб ву, хъа гъалмагъал хъяркьнайи урнарик гьисаб ву.

²⁰ Инсандин уьмур чав гъапи гафарилан асиллу шулу: мелзниинди гъазанмиш гъапӀубди яшамиш хьуз гъитру.

²¹ Уьмурна аьжал – мелзнан гьюкмиъ а, ва мелзнан дустру мелзнан йимиш ипӀиди.

²² Хпир гъидихъуриз – хазна дибихъна ва РАББИ дицириин разиди шулу.

²³ Касибрин гафариъ миннатвал а, девлетлуйин жавабнаъ гъагъивал а.

²⁴ Гизаф дустар хъайириз рягьятди шулдар, вушра саспиган сар дустран ккунивал багъри чвуччвунтӀан ижмиб шулу.