Насигьятар 16 - Гирами Китаб

¹ Инсандин юкӀвну метлебар дюзмиш апӀуру, хъа варибдиз жаваб РАББИЙИХЬАН гъюру.

² Гьарсари чан жилгъа марццибси гьисаб апӀуру, амма инсанарин гъянар РАББИЙИ ахтармиш апӀуру.

³ Жвуван ляхнар РАББИЙИН ихтиярназ тув, ва тамам хьиди яв фикрар.

⁴ РАББИЙИ гьарсаб шейъ чан метлеб ади арайиз дубхна. Гьякьсузринра йишв бала алабхъру йигъан аьгъю хьибди.

⁵ Фурслу юкӀв хяви ву РАББИЙИЗ – фу гъапӀишра, жазайиккан хьибдар ккудучӀвуз.

⁶ Гьякьну ва рягьми тахсирнаккан ккадауру, РАББИЙИХЬАН вуйи гучӀну бала гьадапӀуру.

⁷ Инсандин жилгъйир РАББИЙИЗ вуш кьабулди, Дугъу дугъахъди душмнарра албагиди.

⁸ Гьякьвалиинди гъазанмиш гъапӀу цӀибра ужу ву, къанунсузди гъазанмиш гъапӀу аьхю хайиртӀан.

⁹ Инсанди чан жилгъа ктабгъуру, амма ликариз рякъ РАББИЙИ улупуру.

¹⁰ Паччагьди заълан дуфнайи гаф кӀури шулу, дугъан ушвни дюзвал дацӀабкну ккундар.

¹¹ Терезарин дугъривал РАББИЙИХЬАН ву, дюзди ебцувалра РАББИЙИХЬАН ву.

¹² Хяви ву паччгьариз гьякьсуз тӀулар, фицики гьякьвалиинди тахт тасдикь апӀура.

¹³ Кьабул ву паччгьариз гьякьлу ушвар, дюзди кӀурур ву дурариз ккунир.

¹⁴ Паччагьдин хъял, аьжалин малайик гьисаб ву, хъа аькьюл айири, думу яваш алаиди.

¹⁵ Паччагьдин ачухъ машнаъ уьмур а, дугъан гъянивал хьадукран мархьсиб ву.

¹⁶ Аьгъювалар уч апӀуб ужу ву, багьа гъизилтӀан, фагьум гъадабгъуб ужу ву, марцци арстӀан.

¹⁷ Дугърийирин рякъ писвалихьан ярхла хьа: жилгъайиан ададахъури уьмур уьбхиди.

¹⁸ Фурслували чӀуруб хуру, хъа заанди улупували ахъуз гъитру.

¹⁹ Пай дурубкьдарихъди фурс ктарди яшамиш хьуб ужу ву, фурслударихъди тӀараш гъапӀуб пай апӀури шайиз.

²⁰ Фикир апӀруриз бихъиди ужʼвал, РАББИЙИК миж кайириз хьибди хушбахтвал.

²¹ КӀваъ аькьюл айир фагьмиинди адлу ву, дугъан ширин гафар хъугъʼвал хрудар шулу.

²² Фикир апӀувал – уьмрин булагъ, хъа ахмакьриз жаза – чан ахмакьвал.

²³ Аькьюл айирин фагьми, гафар агиди, ва чан улхбариз кьувват тувди.

²⁴ Кбалгру гафар – йиччвси, кӀваз ширин, жандиз дарман.

²⁵ Саспи рякъяр дишдар вуди гьигъри шулу, хъа аьхирна-аьхир аьжалихьна гъахуру.

²⁶ Лихурайири чаз энгелвал тувидар эгер чаз гашди аш.

²⁷ Пис касди чӀуруб ккабалгура, дугъан гафар бец апӀру цӀа ву.

²⁸ Кьаст айирин урзруб футна, хъа футнайин ляхин дустар апӀуб душман.

²⁹ Инсафсузри адми алдатмиш апӀуру ва думу чӀуру жилгъайиъди хъчӀюрхюру.

³⁰ Улариинди кучӀлин ишарйир апӀрури чӀуруб апӀуз кьаст апӀура; хъа кӀвантӀариинди ишарйир апӀрури пис ляхнар апӀура.

³¹ Лизи кӀул – акв туврайи таж: гьякьлу жилгъайиъ хьувалин лишан.

³² Сабур зина ву гужлирин кьувваттӀан, учв гъурдаъ дисрур гужлир ву шагьрар мютӀюгъ апӀруртӀан.

³³ Тупут ипри шулу, уву фициб адабгъиш думу РАББИЙИХЬАН ву.