Насигьятар 15 - Гирами Китаб

¹ Хъял ккядябхъюз гъитру сабурлу гафну, хътӀурччвру гафну гъизгъин хъял уягъ апӀуру.

² Аькьюл айидарин мелзну аьгъювалар рагъура, хъа абдларин мучӀмучӀарилан ахмакьвал улдубчӀвура.

³ РАББИЙИН улариз вари рябкъюра, Дурар писдаризра, гъянидаризра лигура.

⁴ Мясляаьтнахъна хру улхуб гьар ву уьмрин, хъа уьбгъюра рюгь гафари кучӀлин.

⁵ Адашдин насигьятнан гаф ахмакьри рихшанд апӀури шулу, саки кирчу тахсрар фагьмик апӀрур хьиди фикирлу.

⁶ Хулаъ гьякьлурин гизаф хазна а, хъа гьякьсузрин хайир мянфяаьт хруб дар.

⁷ Аькьюл айидарин ушвни рагъура аьгъювалар, аммаки абдлари дици апӀурадар.

⁸ РАББИЙИЗ гьякьсузарин гъурбнар хяви ву, хъа дугъридарин ккарагбар Дугъаз кьабулди ву.

⁹ РАББИЙИЗ, гьякьсузрин жилгъа, хяви ву, хъа гьякьвал абгрур Дугъаз ккунду.

¹⁰ Жилгъайиан адахъруриз ижми жаза гьадабтӀиди, насигьятар даккнир йикӀиди.

¹¹ Аьжал ва гъачӀидарин дюнʼя РАББИЙИЗ ачухъ ву, инсанарин юкӀвар – иллагьки ачухъ!

¹² Ягьсузриз учв дюз алаъну ккундар, ва, аькьюл айидарин арайиъ гъузузра гъузидар.

¹³ Шад юкӀв – машнаъ нур, пашман юкӀв – гъучубху рюгь.

¹⁴ Фагьумлу юкӀвну аьгъювалар агура, хъа абдлар ахмакьвали тухъ апӀура.

¹⁵ Пай ктру кас – гъагъишнаъ, юкӀв шаду кас – машквраъ.

¹⁶ ЦӀибди ади хьуб ужу ву, РАББИЙИХЬАН гучӀ кади, гучӀури яшамиш шули, хазна ади шайиз.

¹⁷ Масанвал айи хулаъ мейвйирин хураг ужу ву, яман хъял айи хулаъ чагъи йиккун хурагтӀан.

¹⁸ Хъял кубчӀврури адмийир гъяъру, сабурлуйи гъярхьувал гъядауру.

¹⁹ Темплин жилгъа зазари ккапӀна, хъа гьякьлудар яркьу рякъди гъягъюра.

²⁰ Аькьюл айи бали шад апӀуру адаш, хъа абдли гьясбикк апӀдар дада.

²¹ Фикирсузариз ахмакьвал – чпин шадвал, хъа фагьумлуйиз дюзвал – диши жилгъа.

²² Насигьят адруган, ляхниъ хъуркьувал даршул, хъа гьубкӀну насигьят айишваъ вари шул.

²³ Лайикь вуйишвахь жаваб тувуб – шадвал ву, чан йишвахь гаф пуб фукьан ужу дарин!

²⁴ Фикир айир за шула уьмрин рякъюъ, аьжалихъна гъахру рякъяр дугъу ктагъидар.

²⁵ Фурслударин хулар РАББИЙИ ккидирчиди, амма ачӀни хпирин пай Дугъу уьбхиди.

²⁶ Хяви ву РАББИЙИЗ пис кьастар, хъа гъяни гафар Дугъан улихь ву марццидар.

²⁷ Тямягькри чан хулʼин бала алапӀуру, хъа дашбаш аьгь дарапӀрур хьиди яшамиш.

²⁸ Гьякьлур чан кӀвахъ хъпехъуру, ва дугъаз душвʼан ужуб жавабра шулу, хъа гьякьсуз мучӀмучӀари писвал деебтуру.

²⁹ Ярхла ву РАББИ гьякьсузарихьан, аммаки ккарагувал ебхьуру гьякьлуйирин.

³⁰ ЮкӀв шад апӀуру нурлу машну, беден мюгькам апӀуру ужуб хабри.

³¹ Гьякьди гьиву тягьна ибак апӀрур аькьюл айидарикан сар ву.

³² Насигьятар тина апӀуб – жвуваз зарар хуб, хъа тахсрар ибак апӀуб – фагьум гъадабгъуб.

³³ РАББИЙИХЬАН гучӀ хьайивали аькьюл хуру, сифте – фурс ктрувал, хъасин – адлувал гъафиб ву.