Насигьятар 12 - Гирами Китаб

¹ Аьгъювалар ккунириз ккунду насигьятарра, хъа кирчу тахсрар гьадаърур ву – кӀули фикир дарапӀрур.

² Гъяни касдиин РАББИ рази ву, хъа чӀуру кьастар айириин алабхъиди пис гьял.

³ ЧӀуруб апӀрурихьан жилиин хьибдар дийигъуз, гьякьлуйин ччивар шлуб дар ккадатӀуз.

⁴ Лайикьлу хпир таж ву жилириз, хъа ягьсузур – кӀурбариъ ичӀибгнайи камк.

⁵ Гьякьлуйи дюзваликан фикир апӀура, хъа гьякьсузри чӀуру кьаст ккабалгура.

⁶ Гьякьсузрин гафар уьмриз ву хатӀа, хъа хатӀайиккан ккадаъру гафар – дюз улхбар.

⁷ Гьякьсузур ахъди, хьибди дугъан аьхир, хъа гьякьлуйин хал дийибгъиди.

⁸ Фикирлу улхбари адлу апӀиди инсан, хъа чиркин фикрар айир беябур хьиди.

⁹ Жвуваз лукӀ ади, ултӀутӀуччврур хьуб ужу ву, кьацӀ уьл адарди, кьуцӀнир хьайиз.

¹⁰ Гьякьлури кӀару малинра язухъ зигуру, хъа гьякьсузрин масанвал зулумтӀан исина ву.

¹¹ Жил тартиб апӀрур хьиди тухъ, хъа абдал хъергру ичӀибдихъ.

¹² Гьякьсузрин кьаст – айибтӀан чӀуруб абгуб, амма гьякьлударин ччивру деетуру тазар.

¹³ Гьякьсузур чан кучӀлин улхбариъ ургди, хъа гьякьлуйик бала кубкӀидар – дубгди.

¹⁴ Инсанди чан улхбарин гъяни йимиш ккадабцӀиди, чан жафйир дугъахьна, пешкешарди, кьяляхъ хътакиди.

¹⁵ Ахмакьри чан жилгъа дишуб вуди гьисаб апӀури шулу, хъа аькьюл айири теклифариз иб туври шулу.

¹⁶ Ахмакьри чан хъял, улупуз, шулу кебхри, хъа фикирлур шулдар люкьнарихъ хъпехъури.

¹⁷ Дугъри касдин гафар ву дюзидар, хъа кучӀлин шагьиддин гафар – чӀуру кьастнандар.

¹⁸ Лагълагъвали, туриси, зиян апӀуб мумкин ву, хъа аькьюл айидарин гафари сагъ апӀуру.

¹⁹ Гъузди аьсрариз гафар гьякьвалин, хъа уьмур ярхиб дар мелзнан кучӀлин.

²⁰ Аьмалдрарин кӀваин чӀуру кьаст ал, хъа мясляаьтчйирин – шадвал.

²¹ Хьибдар гьякьлуйиз чӀуруб, хъа гьякьсузар писвали дюднихъди ацӀна.

²² КучӀлин мучӀмучӀ РАББИЙИЗ хявиди ву, хъа кьабулди ву Дугъаз дюзди апӀрур.

²³ Фагьумлури чан аьгъювалар улупдар, хъа абдлари кебхра чпин ахмакьвал, рябкъюз.

²⁴ Ляхнихь хьайи хилиз – гьюкум гъабхуб, темпел хилиз – лукӀʼвалиъ ахъуб.

²⁵ Сикинсузвали юкӀв инсандин, гьавазурвалиъ ипру, хъа гъяни гафну шадвалиъ ипру.

²⁶ Гьякьлури жарариз жилгъа улупиди, хъа гьякьсузарин рякъюъ улдугидиву.

²⁷ Лихуз даккнириз хюрч рябкъидар, хъа ляхнихъ юкӀв хъайириз хайирна девлет адарди хьибдар.

²⁸ Гьякьвалин жилгъа – уьмрихьна, хъа кьяни жилгъйир – аьжалихьна.