Насигьятар 11 - Гирами Китаб

¹ Ариш-веришдиъ кучӀал апӀуб РАББИЙИЗ хяви ву, хъа дугъри терезар Дугъаз кьабулди ву.

² Фурс кайирикна гъибди аьйиб, хъа фурс ктрурихьна гъибди аькьюл.

³ Дугъри ксар гъахура чпин марццивали, хъа хаинкрар йихура чпин кьастари.

⁴ Кюмек апӀидар девлетну Диван апӀру Йигъан, аммаки гьякьлували ккадаиди аьжаликкан.

⁵ Гьякьлувалина марццивали гъахура диши рякъди, хъа гьякьсуз алдакиди чан гьякьсузвалиъ.

⁶ Гьякьлували уьрхюра дугъридар, хъа чпин тямягьярин чулариъ а хаинкрар.

⁷ Гьякьсузрихъди сабси, чан умудра йибкӀиди, чӀуру касарин, чпи ккилигурайиб, убтӀиди.

⁸ КубкӀидар бала, гьякьлуйик, хъа ккахъди гьякьсуз дидикк.

⁹ Аллагьсузрин мучӀмучӀи адми йикӀуб мумкин ву, хъа аьгъювалари гьякьлу кас уьрхиди.

¹⁰ Гьякьлуйиз ужуйи ву – шагьурра шад шула, гъакӀну гьякьсузар – шадвалин гьарай ипна.

¹¹ Ужувлари тикмиш апӀура шагьур дугъри ксарин, ва дабгъурира ву, улхбари гьякьсузарин.

¹² Абдли чӀур апӀура жарарин намус, хъа гъавриъ айири эйвал апӀиди чан ушвнин.

¹³ Жарадарин сирар ачухъ апӀура футнакри, хъа гафкьан удубчӀвидар касдиан дугъри.

¹⁴ Насигьят адру халкь йибкӀиди, хъа теклиф дебккрудар бегьемди аш, уьбхиди.

¹⁵ Жарарихъан буржар тувуз гаф тувиш, ккахъди балайикк, гьялак дарур жарарихъан жаваб тувуз, ккахъидар дидикк.

¹⁶ КӀваз мани дишагьлийи ад гъазанмиш апӀура, хъа пис ксари девлет хъчӀюбхюра.

¹⁷ Рягьимлувал кайири чаз хайир хуру, хъа инсафсузри, чан чаина бала жалб апӀуру.

¹⁸ Писуриз рубкьру пешкеш – кучӀлинуб, хъа гьякьвал убзруриз – дугъривалинуб.

¹⁹ Гьякьлувал – уьмур ву, хъа писвалихъ хъайидар, аьжалихьна гъягърудар ву.

²⁰ Хяви ву РАББИЙИЗ иблис адмийир ва кьабулди ву жилгъа ктрабцӀдар.

²¹ Аьгъю йибхь: писуриз жаза гьададабтӀди гъибтдар, хъа гьякьлуйирин насил дюрюбхди гъибтдар.

²² Слин хъюхъниъ – гъизилин ппул, гьациб ву фагьумсуз дишагьлийин уччвувалра.

²³ Гьякьлударин умудар илтӀикӀиди ужувлаз, хъа гьякьсузарин миж – Заанурин хъюлаз.

²⁴ Сари пай апӀура – дугъан артухъ шула, хъа жарар хъичӀихна – дугъан кам шула.

²⁵ АцӀди – хил хъибтнайир, харгидар – жарариз убхъуз туврайир.

²⁶ Ризкь, кьимат за хьайиз, гьитӀибкӀну гъитуриз агьрар апӀиди, хъа масу туврайир – ужувлакк ккахъди.

²⁷ Гъяниб абгруриз – гьюрмат бихъура, чӀурубдихъ хъайири – дидиз чаина дих апӀура.

²⁸ Чан девлетнахъ йирфар хъирчнайир – ахъди, хъа гьякьлудар чру шулайи гьарси хьиди.

²⁹ Чан ужагъдиина бала хрурин ирс ичӀи микӀтан хьибдар, хъа ахмакь аькьюл айирин лукӀ хьиди.

³⁰ Гьякьвалин йимишдикан, уьмрин гьар ктубчӀвура, ва юкӀварра инсанарин, аькьюл айири мютӀюгъ апӀура.

³¹ Эгер гьякьлуйиз жилиин пешкеш тувраш, гьелбетда гьякьсузризна гуннагькриз чпиз рубкьрубра тувди.