Насигьятар 10 - Гирами Китаб

Сулеймандин мисаларин сабпи гъварч

¹ Сулеймандин мисалар. Аькьюл айи бай шадвал ву адашдиз, хъа абдал бай дерд ву дадайиз.

² Хайир ктар гьякь дару девлетнакан, хъа гьякьлували уьрхюра аьжалихьан.

³ Гъитдар РАББИЙИ гьякьлур гашди хъа гьякьсузриз чаз ккуниб тувидар.

⁴ ТӀагъру хилари касибвал хуру, хъа ляхнихь хьайи хилари – девлет.

⁵ Хьадну жафа зигрур – аькьюллу бай, иган гъябгъюради даахну шлуриз – аьйиб.

⁶ Гьякьлуйириз адмийири берекет хьувал ккун апӀуру. Гьякьсузарин мучӀмучӀиъ инсафсузвал ккепӀна.

⁷ Гьякьлурикан кӀваин апӀуб ужʼвал ву, хъа гьякьсузрин ччвур убтӀруб ву.

⁸ Аькьюл айири кьабул апӀура насигьятар, хъа ахмакьрин мучӀмучӀи балайихъна хиди.

⁹ Сикин ву гъярайир диши рякъди, хъа дугъри дарурин тӀулар ачухъ хьиди.

¹⁰ Улариинди кучӀлин лишан апӀували гиран арайиз хибди, хъа ахмакьрин мучӀмучӀи балайихъна хиди.

¹¹ Гьякьлуйин ушв – булагъ ву чӀививалин, хъа мучӀмучӀиъ ккепӀна инсафсузвал гьякьсузарин.

¹² Даккнивали гъярхьувалар даргъуз гъитра, хъа масанвали вари гунгьар ликрикк ккивра.

¹³ Мелзниин яшамиш шула аькьюл фагьумлуйирин, хъа бихъиди чӀвякъи тӀул йирфариз абдларин.

¹⁴ Аькьюл айидари аьгъювалар уьрхюру, хъа ахмакьрин улхбари пучʼвалихъна гъахуру.

¹⁵ Девлетлуйиз девлет ву гъаласи, хъа касибариз касибвал ву гъюрдарси.

¹⁶ Гьякьлурин жафйир уьмур хрудар ву, гьякьсузрин девлет гуннагь хруб ву.

¹⁷ Насигьятарихъди гъягъюб – уьмрин жилгъа ву, хъа иб тувдарш тахсрариз – улдугидиву.

¹⁸ КучӀлин мучӀмучӀиъ ккепӀна гъалмагъал, футнийир хьади лицрур – абдал.

¹⁹ Гизаф гафар апӀрурик гуннагь кабхъди, хъа цӀиб гафар апӀрур фикирлу кас ву.

²⁰ Гьякьлурин мелз – марцци арс ву, хъа гьякьсузрин фикрарин кьимат фукьан шуйкӀан яраб?

²¹ Гафари гьякьлурин гизафдариз ипӀруб тувру, хъа ахмакьар чпин ахмакьвали йикӀуру.

²² РАББИЙИН ужʼвали уву девлетлу апӀиди, дерд сарун аьгъю хьибдар увуз дидихъди.

²³ Абдал нягьякьвалиин шад шулу, хъа фагьумлурин шадʼвал – аькьюл ву.

²⁴ Гьякьсузарин гучӀбар улуркьиди, ва ниятарра гьякьлуйирин тамам хьиди.

²⁵ ТӀурфан утӀубччвиди – имдар гьякьсуз, хъа гьякьлур аьсрариз гъузди, шаксуз.

²⁶ Ушвниъ сиркеси, улариъ кумси – гьаци ву лихуз даккнирра – эйсийиз.

²⁷ РАББИЙИХЬАН гучӀруриз – ярхи уьмрар, хъа гьякьсузарин кудухна йисар.

²⁸ Миж кайивал шадвал ву гьякьлударин, хъа йибкӀиди умуд гьякьсузарин.

²⁹ КацӀну адруриз РАББИЙИН жилгъа – чав уьрхрушв, хъа писуриз – яман гучӀ, чав ахърушв.

³⁰ Аьсрариъ гьякьлурик фукӀа кабхъидар, хъа гьякьсузарихьан жилиин ктирсуз хьибдар.

³¹ Удубзура аькьюл гьякьлурин ушвниан, хъа пис мелз адабтӀиди кьаблиан.

³² Гьякьлуйин ушвниз аьгъя хайирлуб, хъа мучӀмучӀариз гьякьсузарин – зараллуб.