Насигьятар 1 - Гирами Китаб

Эвелин гаф

¹ Давуддин бай, Израилин паччагь Сулеймандин мисалар –

² Гъит улупри дурари аькьюлна насигьят, фагьумлу гафарин гъавриъ ахъуз;

³ ужуб уьмрин, гьякьвалин, дугъри суддин, дюзвалин къайдйир дисуз;

⁴ гъитди дурари авамарихьди фикир апӀуз, жигьиларихьдира аьгъюваларна аьяндарвал дубгъуз;

⁵ аькьюл айирира, гъеебхьиган, заъруси аьгъювалар; фикирлу касаризра бихъиди кюмек;

⁶ аннамиш апӀруси мисаларна тахалусар, аькьюл айидарин дерин гафарна сирар.

⁷ РАББИЙИХЬАН гучӀ апӀуб – магьа фтиъ аш аьгъюваларин эвел! Аькьюлна насигьят нигь апӀрур ву ахмакь.

Адашдинна дадайин насигьятар

⁸ Жан бай, адашдин илим уьбх ва дадайин насигьят мапӀан нигь;

⁹ му – зурба таж ву яв кӀулʼина, багьа зунжур ву яв гардандиккна.

¹⁰ Йиз бай, эгер гуннагькрари чӀурубдихьна ял апӀуруш, рази махьан.

¹¹ Дурари пиди: «Гъач учухъди, ккеъдихьа, йивну йикӀидихьа, тахсир ктрудариин алархьидихьа!

¹² Ухьу дурар, гъийихдарин дюнʼяйиси, накьвди майтарси чӀивидимиди ва сагъдимиди хътӀюркьидихьа.

¹³ Ккуни жюрейин девлет тӀараш апӀидихьа, гъибисубдихьди ихь хулар ацӀдихьа;

¹⁴ ич вари ляхнариъ кидикь учук, увузра учухъди сабси рубкьруганси пай!»

¹⁵ Дурарихъди рякъюъди мягъян, йиз бай, дурарин жилгъайиъ лик мииван,

¹⁶ фицики дурар чӀурубдихьна жаргъура ва ифи удубзбаз гьялак шула.

¹⁷ Мяна адар, чул гьипур пну, тӀирхурайи жакьварин улихь;

¹⁸ хъа улам хъипри ккеънайидари чиб-чпи апӀиди терг.

¹⁹ Гьамциб ву аьхир ифи убхърурин: Гьякьсузди гъазанмиш гъапӀу девлетну уьмур ккудубкӀуру.

²⁰ Аькьвли ипна гьарай кючейиъ, гъати сес апӀура раццариъ;

²¹ уч духьнайи адмийириз дих апӀура, гимихъ гаф кӀура:

²² «Фукьандиз гъузди авамар авамди, ккуниб апӀури, ягьсузар – ягь адрувалиин аьшкьлуди, абдлар – аьгъювалар даккунди?

²³ ИлтӀикӀай узу кирчу тахсрарихьинди – йиз кӀван хазна учвуз тувдиза йиз гафнакан учвуз хабар дебккдиза.

²⁴ Узу дих гъапӀунза – хъа учву гьидицунчва; хил гьачӀабккназа – амма саризра рябкъюрадар.

²⁵ Учву тина гъапӀунчва вари йиз теклифар, кьабул гъапӀундарчва узу кирчу тахсрар.

²⁶ Дици вуш, узура ичв балайиин аьлхъидиза, пис гучӀну учву ккаиган, учвук кялхъдиза!

²⁷ ТӀурфанси, учвʼин яман гучӀ алабхъиди, балара, микӀна кулакси утӀубчӀвиди; чӀаркӀидичву гъагънуна читинвалари.

²⁸ Гьадмуган узуз дих апӀиди – жавабкьан тувидарза, узу агури хьиди – дихъузкьан дихъидарчвуз.

²⁹ Дурари аьгъювалар даккун гъапӀну, РАББИЙИХЬАН вуйи гучӀ гьадабгъну,

³⁰ йиз насигьят кьабул дарапӀди гъибтну, вари йиз теклифар ярхла гьадаъну –

³¹ гьаддиз дурариин чпин гъапӀу ляхнар улуркьиди, дурар чпин кьастарихьди тухъ хьиди.

³² Авамар, аькьвлихьна гъюз дархьиш, йикӀиди. Абдлар чпин гъайгъусузвали ккадахьиди.

³³ Хъа узухъ хъпехъурайир хьиди яшамиш, саб балайиканра ктарди гучӀ».