Матта 9 - Гирами Китаб

Исайи паралич кайир сагъ апӀуб

¹ Гьаддихъан Иса, люткейиъ эъну, тмуну гъирагъдихъ хъайи Чан шагьриз гъюру.

² Ва магьа Дугъахьна, паралич дубхьну, сар ахниъ ахънайир хьади гъафи. Исайи, дурарин зурба хъугъвал дябкъну, паралич кайириз гъапи: – ЮкӀв ижми апӀин, Йиз бай! Яв гунгьарилан хил алдабгъураза.

³ Мушвʼин сакьюдар къанунчйири чиб-чпикди гъапи: «Мугъу Аллагьдиз къаршу гафар кӀура».

⁴ Дурарин фикрар аьгъяди, Исайи гъапи: – Гьаз усал фикрар ичв юкӀвариъ тӀаърачва?

⁵ Фу рягьят ву: «Яв гунгьарилан хил алдабгъураза» пуб, вая «гъудужвну лиц» пуб?

⁶ Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай. Хъа Дугъу паралич кайириз: «Гъудужв кӀуразавуз, гъадабгъну яв ахин, яв хулаз гъарах», – кӀуру.

⁷ Ва думу, гъудужвну, чан хулаз гъягъюру.

⁸ Му гъябкъю халкь мюгьтал гъахьи, ва дурари адмийириз мициб гьюкум туву Аллагьдин тярифар апӀуз хъюгъю.

Исайи Матта ктагъуб

⁹ Ва гьадлинтина гъягъюрайиган, Исайиз налукар уч апӀрушвахь деънайи Матта кӀуру сар кас рякъюру ва дугъаз кӀуру: – Узухъди гъач. Маттара, гъудужвну, Дугъахъди гъягъюру.

¹⁰ Хъасин, Иса Дугъан хулаъ суфрайихъ гутайиз гъюн йивну дахънайиган, хайлин налукар уч апӀрударна гунагькрар дуфну, Дугъахъди ва Дугъан ученикарихъди деъру.

¹¹ Му аьгьвалат дябкъну, фарисйири Исайин ученикариз кӀуру: – Ичв Мялимди налукар уч апӀурайидарихъдина гунагькрарихъди гьаз ипӀура?

¹² Му гъеебхьган, Исайи гъапи: – Духтир сагъидариз ваъ, хъа аьзарлуйириз лазим ву.

¹³ Учву сабан «Гъурбан апӀуб ваъ, хъа рягьим апӀуб ккун апӀураза», – кӀуру гафарин мяна аннамиш апӀинай. Узу марцци касар ваъ, хъа гунагькрар дюз рякъʼина хуз Дуфнайир вуза.

¹⁴ Хъасин, Исайихьна дуфну, Ягьʼяйин ученикари гьерхру: – Учуна фарисйири кми-кмиди ушвар дисури шулча, хъа Яв ученикари гьаз ушвар дисурадар?

¹⁵ Исайи дурариз кӀуру: – Швушв хурайир чпихъди хъимбукьан гагьди, сумчрин хялар гьич пашман даршлуб аьгъданчвузхъа! Хъа дурарихьан швушв хурайир гужназ гъадагъру вахт гъибди, ари гьадмуган дурари ушвар дисиди.

¹⁶ Гьич сарира йирси палатдик цӀийи цӀил ктривур, фицики, цӀийиди киву цӀил кубчӀвган, хъана аьхю урхъ адабхъди.

¹⁷ Таза чяхирра йирси иржариъ убзри шулдар. Дици гъапӀиш, иржарикан урхъар ктахьиди: чяхирра удубзиди, иржарра пуч хьиди. Хъа таза чяхир цӀийи иржариъ убзру аьдат ву, думуган чяхирра, иржарра сагъди гъузди.

Риш чӀиви апӀуб ва кетӀерццнайир сагъ апӀуб

¹⁸ Исайи гьамци кӀурайи вахтна, Дугъахьна магьа сар гьяким дуфну, Дугъаз икрам дапӀну, кӀуру: – Гьамусяаьт йиз риш йикӀру гьялнаъ айиз. Уву дуфну, дугъʼин Яв хил иливиш, думу чӀивиди гъузди.

¹⁹ Иса, гъудужвну, дугъахъди гъягъюру. Дурарихъди ученикарра гъягъюру.

²⁰ Му вахтна йицӀикьюд йисандин арайиъ ифи хъибтри шлу уьзур кайи сар дишагьлийи, кьялхъянди дуфну, Исайин ккурттдин канчӀлик хил кучру.

²¹ Фицики дугъу чав-чакди гьамци фикир гъапӀнийи: «Эгер узу Дугъан палатдик анжагъ хил кубкӀиш, узу сагъ хьидиза».

²² Иса кьяляхъ илтӀикӀуру ва, думу дяркъну, кӀуру: – Яв юкӀв ижми апӀин, Йиз риш! Яв хъугъували уву сагъ гъапӀунву. Ва дишагьли сабпну сагъ гъахьнийи.

²³ Хъасин Иса гьякимдин хулаз гъушу. Душваъ учӀвган, саламдин мукьмар йивурайидар ва ишларин гъугъ ипнайидар дяркъну, Исайи гъапи:

²⁴ – Гьамлин удучӀвай; риш дукӀнадар, хъа даахна. Дурар Дугъʼин аьлхъюз хъюгъю.

²⁵ Халкь удучӀвган, Дугъу, риш айи хулаъ учӀвну, дугъан хил гъибису, ва риш гъудужву.

²⁶ Ва мидкан вари юрд вуйиси аваза гъарабгъу.

Кьюр кур кас сагъ апӀуб

²⁷ Иса гьадушвʼан гъягъюрайиган, «Ич язухъ апӀина, я Давудгъярин Бай!» – кӀури, Дугъан кьяляхъди кьюр кур кас гъюз хъюгъю.

²⁸ Хъа думу хулаъ учӀвган, кур вуйидар Дугъан багахьна гъафи. Исайи дурариз кӀуру: «Узхьан учву сагъ апӀуз шулу пну, хъугъранчва?» Дурари: «Ав, я Агъа!» – гъапи.

²⁹ Гьадмуган Исайи, дурарин уларик хил кучну, гъапи: – Ичв хъугънайивализ гъилигси ибшричвуз.

³⁰ Ва дурариз рябкъюз хъюгъю. Хъа Исайи дурариз ижмишнаан гъадагъа дебккру: – Лигай гьа, мидкан саризра аьгъю дарибшри.

³¹ Хъа дурари, кӀуруш, чӀатинди удучӀвган, думу вари юрд вуйибси, Дугъан аваза рабгъуру.

Исайи чӀал дибиснайир сагъ апӀуб

³² Уларихь акв гьибшдар удучӀвубси, магьа Дугъахьна жинар кучӀвнайивалиан чӀал дибиснайир хъади гъафи.

³³ Жинар ктаубси, чӀал дибиснайир улхуз хъюгъю. Ва: «Израилиъ мициб ляхин саб вахтнара гъабхьиб дар!» – кӀури, халкь мюгьтал гъахьи.

³⁴ Хъа фарисйири кӀуйи: – Исайи жинар дурарин аьхюрихьан вуйи кьувватниинди ктаура.

Исайиз халкьдин язухъ хьуб

³⁵ Иса, жугьдарин мистариъ аьгъювалар улупури, Аллагьдин Паччагьлугъдикан Ужувлан хабар рабгъури ва гьар жюрейин уьзрарна иццрушнар кайидар сагъ апӀури, шагьрарна гъулар вуйиси лицури гъахьну.

³⁶ Халкьарин дестйир гъяркъган, Исайиз дурарин язухъ шулу, гьаз гъапиш дурар марччлихъан хътру марччарси, улдугну, кюмексузди айи.

³⁷ Гьадмуган Чан ученикариз кӀуру: – Иган гизаф а, хъа убгрудар цӀиб.

³⁸ Гьаддиз игнин Агъайиз, Чан игниз убгрудар гьаъ, кӀури, ккарагай.