Матта 8 - Гирами Китаб

Жузам кайир сагъ апӀуб

¹ Иса дагъдилан улдучӀвиган, Дугъан кьяляхъди аьхючӀвеъ халкь гъюри гъахьну.

² Магьа хамран аьзар кайи сари, дуфну, Исайиз икрам дапӀну, гъапи: «Я Агъа! Увуз ккун гъабшиш, йиз хам марцц апӀуз шулвухьан».

³ Исайи, хил гьачӀабккну, дугъак кубкӀну: – Ккундузуз, марцц йихь, – кӀуру, ва дугъан хам дишлади марцц шулу.

⁴ Хъа Исайи дугъаз кӀуру: – Лиг гьа, мидкан саризра макӀан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апӀуз ужуб гъайибх.

Исайи юзбашийин гъуллугъчи сагъ апӀуб

⁵ Иса Кафернагьумдиъ учӀвиган, Дугъахьна римлуйирин юзбаши дуфну, гьамци тӀалаб апӀуру:

⁶ – Я Агъа! Йиз гъуллугъчи, паралич уьзри хулаъ ахниъ итну, гизаф аьзабнакк кка.

⁷ Исайи дугъаз кӀуру: – Узу дуфну думу сагъ апӀидиза.

⁸ Юзбашийи жаваб вуди гъапи: – Я Агъа! Уву йиз хулаъ учӀвбаз узу лайикь дарза, анжагъ Уву саб гаф йип, ва йиз гъуллугъчи сагъ хьиди.

⁹ Фицики узура жарарин хликк ккайир вуза, ва узуз мютӀюгъ вуйи эскрарра азуз. Дурарикан сариз узу «гъарах» кӀурза – думу гъягъюру, тмунуриз «гъач» кӀурза – гъюру, йиз гъуллугъчийиз «гьамци апӀин» кӀурза, дугъу тамам апӀуру.

¹⁰ Му гафар гъеерхьиган, Иса мюгьтал шулу, Дугъу Чан кьяляхъди гъюрайидариз кӀуру: – Гьякьди кӀуразачвузки, Израилиъра Аллагьдихъ гьамкьан хъугърайи кас гъяркъюндарзуз.

¹¹ КӀуразачвузки, гизафдар, ригъгьудубчӀвруна алабхъру терефарихъан дуфну, Аьршарин Паччагьлугъдиъ ихь ата-бабйир вуйи Ибрагьимдин, Исакьдин ва Якьубдин гъвалахъ гъюн йивну дахьди.

¹² Хъа Паччагьлугъдиз улупнайидар чӀатинди мучӀушназ утӀурккиди: душваъ зурба ишубна суза хьибди.

¹³ Хъа Исайи юзбашийиз гъапи: – Гъарах, яв хъугънайивалиинди увуз хьибди. Дугъан гъуллугъчи гьадмусяаьт сагъ гъахьнийи.

Исайи гизафдар сагъ апӀуб

¹⁴ Иса Петрин хулаз гъафиган, Дугъаз цӀа алди дахънайи дугъан сижарбаб рякъюру.

¹⁵ Иса дугъан хилик куркӀу, дугъʼин али цӀа улдубчӀву, ва сижарбаб, гъудужвну, Дугъан гъайгъушнаъ учӀву.

¹⁶ Хябяхъ гъабшиган, Исайихьна жинар кучӀвнайи хайлин адмийир хъади гъафнийи. Дугъу Чан гафниинди дурарикан жинар ктаънийи ва вари иццрудар сагъ гъапӀнийи.

¹⁷ Му ляхнар Ишая пайгъамбрин мелзналан дупнайи: «Дугъу ихь уьзрар Чаина гъадагъну ва ухьу сагъ гъапӀну», – кӀуру гафар кӀулиз удучӀвбаз гъашидар вуйи.

Исайихъди хьуб читин ву

¹⁸ Чан гъваларихъ гизаф халкь уч духьнади дябкъну, Исайи ученикариз люткейиъди гьюлин тмуну гъирагъдихъна гъягъюз амур гъапӀнийи.

¹⁹ Гьадмуган сар къанунчийи, дугъан багахьна дуфну, гъапнийи: – Мялим! Уву наана гъушишра, узу Увухъди гъидиза.

²⁰ Исайи дугъаз кӀуру: – Сулариз мугъарйир, завун ничхрариз мукьар а, хъа Инсаниятдин Бализ кӀул дивну дахъру йишв адар.

²¹ Ученикарикан сари Исайиз гъапи: – Я Агъа! Узухьди сифте, душну, дукӀнайи йиз адаш кивуз гъит.

²² Хъа Исайи дугъаз кӀуру: – Узухъди гъач, хъа дийихнайидари чпин гъийихдар киври.

Исайи тӀурфан яваш апӀуб

²³ Иса люткейиъ эъган, Дугъан кьяляхъди ученикарра эънийи.

²⁴ Саб дупну гьюлʼин гьациб тӀурфан гъитӀибккнийики, лепйири дурарин лютке ккапӀуз саб цӀибтӀан имдайи. Хъа Иса даахнади гъахьнийи.

²⁵ Думуган ученикари, дуфну, Иса хъиргну, Дугъаз кӀуру: – Я Агъа! Ухьуз саб чара апӀин, ихь аьжал багахь дубхьна.

²⁶ Исайи дурариз гъапи: – Фицдар гучӀбяхяр дарнучва, хътругърудар! Хъасин, гъудужвну, Дугъу микӀлазна лепйириз яваш хьуз амур апӀуру. Дурар лал шулу. Зурба архаинвал абхъру.

²⁷ Дугъахъди хъайидари, мидʼин мюгьтал духьну, кӀуйи: – Му мицир фуж вуйкӀан – микӀарра, гьюлра Чаз мютӀюгъ шлур?

Исайи жинар кайи кьюр кас сагъ апӀуб

²⁸ Иса гьюлин тмуну гъирагъдихъ хъайи Гадарин кӀуру юрдназ гъафиган, Дугъан улихьна накьварин хьарар-дюрхъяриан кьюр жинар кайидар утӀурччвуру. Дурар гьадмукьан вягьшидар вуйики, гьадму рякъюъди сарихьанра гъягъюз шули гъабхьундайи.

²⁹ Ва сабпну дурари чӀигъар апӀуз хъюгъю: – Яв учухъди фу вуяв, Аллагьдин Бай?! Вахт хьайизра учуз жаза тувуз дуфнана?

³⁰ Дурарихьан ярхладиси чӀурдиин силарин аьхю лиж дарабгънайи.

³¹ Ва жинари Исайикан тӀалаб апӀуру: – Учу утӀуккурайихъамина гьатму силариъ учӀвузкьан гъит.

³² – Гъарахай, – гъапи Исайи. Дурарра, адмийириан удучӀвну, силариъ учӀвру. Гьадмусяаьт вари силар гъарзлансина гьюлизди урсру, ва вари штукк ккахьну йихуру.

³³ Хъа силарин габнар жаргъну душну, шагьриъ гьаму чпиз гъябкъюбдикан: фици жинар кайидар сагъ гъапӀнуш – варибдикан ктибтуру.

³⁴ Гьадмуган шагьрин вари агьалйир Исайин улихьна удучӀвуру ва, Думу гъяркъган, чпин юрдариан удучӀвну гъарах кӀури, миннатар апӀуру.