Матта 7 - Гирами Китаб

Жарадарин суд мапӀанай

¹ Жарадарин суд мапӀанай, ичвра апӀидар,

² фицики учву жарадарин фициб суд гъапӀиш, ичвра гьациб суд апӀиди. Жарадарин тахсрар учву фициб уьлчмейиинди ерцураш, ичв тахсрарра гьациб уьлчмейиинди ерциди.

³ Увуз яв улиъ айи хамхар гьидрибгъди, яв гъардшин улиъ айи чӀюрх фици рябкъюравуз?

⁴ Ваяки яв гъардшиз: «Яв улиъ айи чӀюрх адабгъуза» – фици пидива, хъа яв улиъ хамхар ади?

⁵ Эй кьюб маш гъяйир! Сифте яв улиъ айи хамхар адабгъ, ва гьадмуган, яв гъардшин улʼан чӀюрх фици адабгъуруш, рябкъидивуз.

⁶ ФукӀа гирамиб хуйириз миккипан, даршиш дурар, илдицну увʼин алархьиди. Яв гавагьирар силарин улихьинди магатӀахьан, даршиш силари дурар ликариккан апӀиди.

Ча йипай, тувдичвуз

⁷ Ча йипай – тувдичвуз; абгай – бихъидичвуз; раккник кучай – абццдичвуз.

⁸ Фицики гьарсар ча кӀурайириз тувди; абгурайириз бихъиди; кучрайириз абццди.

⁹ Ичв арайиъ, уьл ча гъапиган, чан бализ гъван туврур айинхъа?

¹⁰ Вая балугъ ча гъапиган, битӀ туврур айинхъа?

¹¹ Гьаци вуйиган, учву пис адмийир вушра, учвхьан ичв веледариз ужуб тувуз удукьруган, аьршариин али Адашдихьан хъанара ужуди Чахьан ча кӀурудариз багъишар тувуз хьибди.

¹² Инсанар учвухъди фици духьну учвуз ккундуш, учвура дурарихъди гьаци йихьай. Фицики Къанундин ва Пайгъамбрарин Китабарин мяна гьамдиъ а.

Ккуру урнар

¹³ Завариз арццнайи ккуру урнарианди учӀвай. Фицики яркьу урнарна дабкӀнайи рякъ аьжалихьна гъахрудар ву, ва гизафдар гьадлинтина гъягъюра.

¹⁴ Гьаз гъапиш ккудудубкӀру уьмриз гъахру урнар ккурудар ву, дина гъябгъюрайи жилгъара читинуб ву. Ва цӀидаризтӀан думу бихъурадар.

Гьар йимишдиз лигну аьгъю шулу

¹⁵ Кьюб маш гъяйи пайгъамбрихьан ихтият йихьай. Учвухьна дурар марччлин гъидикь алди гъюра, айтӀан кӀуруш дурар вягьши жанаврар ву.

¹⁶ Дурар чпи туврайи бегьерниинди аьгъю хьидичвуз. Зазарилан тӀумутӀ вая пялкьярилан инжир уч апӀуз шулин?

¹⁷ Гьарсаб гъяни гьари гъяни йимиш, хъа чӀуру гьари чӀуру йимиш хуру.

¹⁸ Гъяни гьархьан чӀуру йимишар, я чӀуру гьархьан гъяни йимишар тувуз шулдар.

¹⁹ Гъяни бегьер дархру гьарсаб гьар алдабтӀну, цӀигъ гъипри шулу.

²⁰ Дурар йимишариз лигну аьгъю хьидичвуз.

Аллагьдин Паччагьлугъдиъ фуж учӀвди?

²¹ Узуз «я Агъа, я Агъа» кӀурур, фуж вушра, Аьршарин Паччагьлугъдиъ учӀвидар, хъа зиин али Аьршарин Йиз Адашди гъапиб тамам апӀрур учӀвди.

²² Узуз думу йигъан гизафдари пиди: «Я Агъа! Я Агъа! Яв ччвурнахъан учу аьяндарвалар улупури гъахьундайин? Яв ччвурниинди учу инсанарикан жинар ктаури гъахьундайин? Яв ччвурнахъди учу гизаф аьламатнан ляхнар гъапӀундаринхъа?»

²³ Ва думуган дурариз жаваб тувдиза: «Узуз учву саб вахтнара аьгъюдар дарзуз. Узхьан дург йихьай учву, писвал апӀурайидар!»

Кьюб шибритӀ

²⁴ Гьамци, Узухъ хъебехъну, Йиз гафар тамам апӀру гьарсар кас чан хулар гъвандин шибритӀиин диврайи фагьумлу касдиз ухшар ву.

²⁵ Мархьра гъубгъну, селлерра гъафну, микӀарра хъивну ва гьамрар вари гьадму хулариина диш гъахьну, амма хулар гъадаргъундар, фицики дурар гъвандиин дивнайидар ву.

²⁶ Хъа Йиз гьаму гафар ерхьури, дурар тамам дарапӀрайи гьарсар кас чан хулар гъумриин диву фагьумсуз касдиз ухшар ву.

²⁷ Мархь гъубгъну, селлер гъафну, микӀар хъивну, вари гьамрар гьадму хулариина диш гъахьну, ва хулар гъадаргъну, хъа дурарин даргъувалра зурба хъухърумар хъайиб гъабхьну.

²⁸ Исайи, вари гьаму гафар дупну, ккудубкӀган, мушвахь хьайикьан халкь Дугъан улупбариин мюгьтал гъахьну,

²⁹ фицики Исайи дурариз, къанунчйириси ваъ, хъа гьюкум хлиъ айириси аьгъювалар улупури гъахьну.