Матта 5 - Гирами Китаб

Исайи дагъдиин аьгъювалар улупуб

¹ Уч духьнайи халкь дябкъну, Иса дагъдиина удучӀвуру; ва, деъган, Дугъахьна Дугъан ученикар гъюру.

² Дугъу дурариз гьамци аьгъювалар улупуз хъюгъру:

³ – Бахтаврар ву Аллагьдин улихь касиб вуйидар, фицики Аьршарин Паччагьлугъ гьадраринуб ву.

⁴ Бахтаврар ву дерд зигрудар, фицики дурар Аллагьди ккарциди.

⁵ Фурс ктрудар бахтаврар ву, фицики дурариз ирс вуди жил рубкьиди.

⁶ Агъайин гьякьвалихъ дахаргнайидар бахтаврар ву, фицики Аллагьди дурар тухъ апӀиди.

⁷ Бахтаврар ву рягьимлудар, фицики дурарилан хил алдабгъиди.

⁸ Бахтаврар ву юкӀв марццидар, фицики дурариз Аллагь рякъиди.

⁹ Ислягьвал гъабхрудар бахтаврар ву, фицики дурариз Аллагьдин веледар пиди.

¹⁰ Бахтаврар ву Аллагьдин гаф тамам апӀурайиган утӀуккурайидар, фицики Аьршарин Паччагьлугъ гьадраринуб ву.

¹¹ Бахтаврар вучва учву, гьаз гъапиш, Йиз ученикар хьпаз лигну, учву беябур апӀура, учвухъ хъергра ва учвлан футнийир апӀура.

¹² Гьаци беябур апӀури гъахьну учву хьайиз гъахьи пайгъамбрарра. Рази йихьай ва шадвал ачмиш апӀинай, фицики аьршариъ учвуз айи пешкеш зурбаб ву.

Жилин кьил

¹³ Учву жилин кьил вучва. Амма кьилан кьилзишин гъудубгиш, думу фти кьилзи апӀиди? Думу сарун фтизкӀа ярамиш шулдар: думу сарун, инсанарин ликариккан апӀруси, гатӀабхьиди.

¹⁴ Учву дюнʼяйин акв вучва. Дагъдиин али шагьур дярябкъди гъубзидар.

¹⁵ Ва чирагъ кабхьиган, думу гъабран кӀанакк ккидривур, хъа, диди хулаъ вардариз акв тувруганси, чан йишвʼин дивур.

¹⁶ Гъит гьаци ичв аквну инсанарин арайиъ акв туври, ичв ужудар ляхнар дурариз рякъруганси ва дурари Аьршарин ичв Адаш адлу апӀбан бадали.

¹⁷ Хиял мапӀанайки, Узу Къанун вая пайгъамбрар батӀул апӀуз Дуфнайир ву кӀури. БатӀул апӀуз ваъ, хъа дурари кӀурайиб кӀулиз адабгъуз Дуфнайир вуза.

¹⁸ Фицики дюзди кӀуразачвуз, гьелелиг заварна жилар имиди, дибикӀнайиб вари тамам дархьикьан гагьди, Къанундиан гьич саб гьярфкьан, ясана саб цӀаркьан дубгидар.

¹⁹ Гьаци вуйиган, му гафарикан фукӀа тамам дарапӀрур ва гьаци жара адмийирихьдира апӀуз гъитрур Аьршарин Паччагьлугъдиъ вартӀан бицӀир вуди гьисаб апӀиди. Хъа шли думу гафар тамам гъапӀиш ва жара касарихьра гьаци апӀуз гъитиш, думу Аьршарин Паччагьлугъдиъ вартӀан зурба кас хьиди.

²⁰ КӀуразачвузки, эгер учву Аллагьдин табшуругъар къанунчйирина фарисйиритӀан ужуди тамам дарапӀди гъашиш, учву Аьршарин Паччагьлугъдиъ учӀвидарчва.

Ажугълуваликан

²¹ Учвуз аьгъячвузки, ихь ата-бабйириз фу дупнаш: «Адми йивну миликӀан; хъа шли гъакӀиш, дугъу суддин улихь жаваб тувди».

²² Хъа Узу учвуз кӀуразаки, шли чан багахьлу хъюлакк гъидисиш, думу чан суд апӀбакк ккуркьди, ва шли чан гъардшиз «усал кас» гъапиш, думу Заан диванханайиъ чан суд апӀбакк ккуркьди, хъа шли жарариз «ахмакь» гъапиш, думу жегьеннемдин цӀигъ гъитбакк ккуркьди.

²³ Гьаци вуйиган, эгер уву Аллагьдиз яв багъиш Аллагьдин Хулаз хури айиган, яв гъардшиз увкан гиран кайивал кӀваин гъабхьиш,

²⁴ гъурбан апӀру йишвахь яв багъиш гъибтну, душну, сифте яв гъардшихъди мясляаьтар апӀин, хъасин, дуфну, яв багъиш гъурбан апӀин.

²⁵ Эгер шлиз увухъди суд апӀуз ккунди аш, шлукьан ухди, суддиз рякъюъ имиди, мясляаьтар апӀин. Даршиш дугъу уву судьяйихьна, хъа судьяйи гъаравлихьна тувди ва дустагъдиъ итдиву.

²⁶ Гьякьди кӀуразавуз: аьхиримжи кепкиина гъяйиз яв вари бурж ктипайизкьан, душвʼан удучӀвидарва.

Кьяппаваликан

²⁷ Учвуз гъеебхьнийчвузки: «Кьяппавал мапӀан», – кӀури.

²⁸ Хъа Узу учвуз кӀуразаки: фуж жара дишагьлийихьинди тямягьниинди лигураш, дугъу сарун чан кӀваъ дугъахъди кьяппавал гъапӀну.

²⁹ Эгерки яв арччулну ули уву гунгьихъна гъахураш, думу адабгъ ва гатӀабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз.

³⁰ Ва эгер яв арччул хили уву гунгьихъна гъахураш, хъадабтӀ думу ва гатӀабхь тина, фицики бедендин саб гьендемдихьан шуб ужу вувуз, яв вари беден жегьеннемдиъ ипайиз.

Хпир гьидитбакан

³¹ Дупна гьацира: «Эгер фуж чан хпирихьан жара шулаш, дугъу хпирихьна жара хьпан кагъаз туври».

³² Хъа Узу кӀуразачвузки: шли, чан хпир, дугъу кьяппавал дарапӀди, гьидитиш, дугъу думу хпир кьяппавалихъ хъаъра; ва шли гьидитнайир чаз дитиш, дугъура кьяппавал апӀура.

Ху апӀбакан

³³ Хъана, аьгъячвузки, ичв абйир-бабариз фу дупнаш: «Уву гъапӀу ху чӀур дарапӀди, Агъайин улихь тамам апӀин».

³⁴ Хъа Узу кӀуразачвузки: затра ху мапӀанай: я аьршариинди, гьаз гъапиш аьршар Аллагьдин тахт ву;

³⁵ я жилариинди, гьаз гъапиш жилар Аллагьдин ликарикк йишв ву; я Ерусалимдиинди, гьаз гъапиш думу Кьудратлу Паччагьдин шагьур ву;

³⁶ ясана жвуван кӀулʼиндира ху мапӀанай, гьаз гъапиш гьич саб чӀаркьан я кӀару, я лизи апӀуз хьибдарчвухьан.

³⁷ Эгер увуз «ав» пуз ккунди аш, гьаци «ав» йип; «ваъ» пуз ккунди аш, гьаци «ваъ» йип. Хъа митӀлан артухъ вуйиб иблисдихьан ву.

³⁸ Учвуз гъеебхьунчвуз, дупна: «Уву шлинкӀа ул идипиш, яв улра идипну ккун, ва уву шлинкӀа силиб идипиш, яв силибра идипну ккун».

³⁹ Хъа Узу кӀуразачвузки: писвализ писвал мапӀан. Яв арччул гарцӀликкан бачӀ ккадатуриз тмунубра ккив.

⁴⁰ Ва фуж, увухъди суддиз удучӀвну, яв кӀанккан ккабхьру ккуртт ккидибтуз ккаш, дугъаз яв заълан алабхьру палатра тув.

⁴¹ Ва шли уву чахъди саб манзил гъягъюз мажбур апӀуруш, дугъахъди кьюб манзилра гъарах.

⁴² Увкан тӀалаб апӀурайириз тув, ва увкан буржназ ккун апӀурайирихьан маш магьадабгъан.

Душмнарихьна вуйи ккунивал

⁴³ Учвуз гъеебхьунчвуз, дупна: «Багахь хьайир ккун апӀин, хъа душман – даккун».

⁴⁴ Хъа Узу кӀуразачвузки: ичв душмнар ккун апӀинай, ва ичв кьяляхъ хъахьнайидарихъанди ккарагай.

⁴⁵ Мидʼинди учву Аьршарин ичв Адашдин баяр хьидичва, гьаз гъапиш Дугъу гьам пис касар, гьамсана гъянидар Чан ригъдихъди тямин апӀура ва мархьра гьам гьякьлудариина, гьамсана нягьякь вуйидариина гьапӀра.

⁴⁶ Фицики анжагъ учву ккунидартӀан ккун апӀдарш, учвуз фтин бадали пешкеш хьибди? Налук гъадабгъурайидарира гьаци апӀурадаринхъа?

⁴⁷ Хъа нагагь учву анжагъ ичв гъардшартӀан тебрик апӀури шулдаш, имбудари апӀурайибтӀан артухъ учву фу апӀурачвахъа? Гьаци апӀури шулдаринхъа аллагьсузарира?

⁴⁸ Гьаци вуйиган, ичв Аьршарин Адашси, тамамлудар йихьай.