Матта 4 - Гирами Китаб

Иса ахтармиш апӀуб

¹ Мидин кьяляхъ Гирами Рюгьну, Иса рякъʼан адауз иблис чалишмиш хьуз кӀури, Иса ичӀи чюлиз гъухнийи.

² Душваъ Думу ягъчӀвур йигъанна ягъчӀвур йишвандин арайиъ уьл дирипӀри гъузну, аьхирки Исайиз гаш гъабхьнийи.

³ Думуган иблисди, Дугъахьна дуфну, Дугъаз гьамци кӀуру: «Эгер Уву Аллагьдин Бай вуш, гьаму гъванарикан уьлер хьуз гъит».

⁴ Жаваб вуди Исайи гъапи: «Гирами китабариъ дибикӀнаки: „Инсан ялгъуз уьлʼинди ваъ, хъа Аллагьдин ушвниан удубчӀвурайи гьарсаб гафниинди яшамиш хьиди“».

⁵ Думуган иблисди Иса гирами вуйи Ерусалим шагьриз хъади гъягъюру, Аллагьдин хулан вартӀан ягълишвʼин дерккру

⁶ ва Дугъаз кӀуру: «Эгер Уву Аллагьдин Бай вуш, гьамлин исина урс, фицики дибикӀна: „Аллагьди Чан малайикариз Яв гъайгъушнаъ хьуз амур апӀиди ва, Яв ликкьан гъвандихъ йивуз гъидритруганси, Уву чпин хилариина гъадагъиди“».

⁷ Исайи кӀуру дугъаз: «Гирами китабарин жара йишваъ гьамцира дибикӀна: „Яв Агъа Аллагь ахтармиш мапӀан“».

⁸ Думуган иблисди Иса хъанара саб лап ягъал дагъдиина гъахуру, дилин Дугъаз дюнʼяйин вари паччагьлугъар, дурарин ад улупуру

⁹ ва Дугъаз кӀуру: «Эгер Уву, ис алахъну, узуз икрам гъапӀиш, гьамрар вари Увуз тувдизавуз».

¹⁰ Думуган Исайи кӀуру дугъаз: «Фана йибхь Узхьан, иблис! Гирами китабариъ дибикӀна: „Яв Агъа Аллагьдиз икрам апӀин ва сар ДугъазтӀан гъуллугъ мапӀан!“»

¹¹ Думуган иблис Исайихьан гьудубчӀвну гъябгъюру ва магьа малайикар, дуфну, Исайин гъайгъушнаъ дийигъуру.

Иса Кафернагьумдиъ

¹² Хъа Ягьʼя дустагъ дапӀнайиваликан гъеебхьиган, Иса Галилей уьлкейиз гъягъюру.

¹³ Думу, Назаретдиан удучӀвну, Забулун ва Нафталим кӀуру юрдарин аьтрафариъ айи Галилей гьюлин гъирагъдихъ хъайи Кафернагьумдиъ дергру.

¹⁴ Мици гьаддиз гъабхьнийики, Ишая пайгъамбрин мелзналан гьамци дупнайиб улубкьну ккундийи:

¹⁵ «Ярдан нирин гьюлихъинди терефнаъ айи Забулун юрд ва Нафталим юрд! Галилей уьлке, аллагьсузарин макан!

¹⁶ Мушваъ мучӀувалиъ айи халкьдиз зурба акувал гъябкъну ва аьжалин сирникк ккайидариз нур удубчӀвну!»

¹⁷ Думу вахтналанмина Исайи, аьгъювалар улупури, гьамци кӀуз хъюгъру: «Ичв гунгьар гардандиъ дидисну, уьмур дигиш апӀинай, фицики Аллагьдин Паччагьлугъ багахь дубхьна».

¹⁸ Иса Галилей гьюлхъантина гъягъюрайиган, Дугъаз чвйир вуйи кьюр кас гъяркънийи: Петри лакӀам хъайи Симон ва дугъан чве Андрей. Дурар балугъчйир вуйи, ва думу вахтна дурари гьюликк чул ккипрайи.

¹⁹ «Узухъди гъачай, – кӀуру Дугъу дурариз, – Узу учвкан инсанарин юкӀвар дисру балугъчйир ктаурза».

²⁰ Дурар гьадмусяаьт, чпин чулар дирчну, Гьадгъахъди гъягъюру.

²¹ Гьадлин тинаси гъушган, Исайиз хъанара жара кьюр чве рякъюру: Зеведейин бай Якьубна дугъан чве Югьан. Дурари чпин адаш Зеведейихъди люткейиъ чулар рас апӀурайи. Исайи дураризра дих гъапӀу

²² ва дурарра гьадмусяаьт, люткена чпин адаш гъитну, Исайихъди гъягъюру.

Иса халкьдин гъуллугънаъ

²³ Исайи, вари Галилей уьлке вуйибси лицури, жугьдарин мистариъ аьгъювалар улупури, Аллагьдин Паччагьлугъдикан хабар туври, гьарсаб уьзрихьан халкь сагъ апӀури гъахьну.

²⁴ Дугъан ад вари Сирия вилаят вуйиси абхънийи, Исайихьна гьар жюрейин уьзрар кайидар хуз хъюгъру: жинар кайидар, гьарза шлудар, паралич кайидар, – ва Дугъу дурар сагъ апӀуйи.

²⁵ Галилей уьлкейиан, ЙицӀубшагьриан, Ерусалимдиан, Ягьудияйиан ва Ярдандин аьтрафарихъан гъюри, гизаф халкь Дугъан кьяляхъди лицури гъахьну.