Матта 25 - Гирами Китаб

ЙицӀур шуркан тахалус

¹ Гьадмуган Аьршарин Паччагьлугъ, лампйир гъадагъну, йишвну жамран улихьна гъюрайи йицӀур шураз ухшар хьибди.

² Дурарикан хьур аькьюллудар ва хьур абдалдар гъахьну.

³ Абдал шубари, лампйир гъадагъну, дурарихъ хъубзруб гъадабгъундар.

⁴ Аькьюллудари лампйирихъди хъубзрубра гъадабгъуру.

⁵ Жамру кьан апӀуради хьпаз лигну, дурар вари нивкӀуз гъягъюру.

⁶ Хъа гьацӀишваринган: «Магьа жам гъюра, улихьна удучӀвай», – кӀури, сесер утӀурччвуру.

⁷ Вари шубар, гъудужвну, чпин лампйир акуди кархьуз хъюгъру.

⁸ Абдал шубари аькьюллудариз: «Ичв хъубзрубдикан учузра чавай, даршиш ич лампйир ктӀушвура», – кӀуру.

⁹ Хъа аькьюллудари: «Хъубзруб учузра, учвузра гьубкӀидар. Масу туврайидарихьна душну, учвуз гъадабгъай», – кӀуру.

¹⁰ Хъа дурар хъубзруб гъадабгъуз душну имиди, жам гъюру. Гьязурди айи шубар дугъахъди сумчрин демраз гъягъюру, ва сарун раккар хъяркьру.

¹¹ Хъасин хъубзруб гъадабгъуз гъушу тмуну шубарира дуфну: «Я Агъа, я Агъа! Учуз раккин абцца», – кӀуру.

¹² Жамру дурариз жаваб вуди: «Дюзди кӀуразачвуз, узуз учву зат аьгъюдаркьан дарзуз», – кӀуру.

¹³ Гьаци вуйиган, мааханай, гьаз гъапиш я йигъ, я сяаьт аьгъдарчвуз.

Шубур гъуллугъчийикан тахалус

¹⁴ Аьршарин Паччагьлугъ сар гьамцир касдихь тевуз шул: саб ражари ярхла уьлкйириз гъягъруган, дугъу чан гъуллугъчйириз дих дапӀну, чан мяишатдиз лигуз табшурмиш гъапӀнийи.

¹⁵ Дурарин удукьувалариз лигну, сарихьна хьуд агъзур, тмунурихьна кьюд агъзур, шубурпирихьна сад агъзур манат тувну, учв гъушнийи.

¹⁶ Хьуд агъзур манат гъибисури, дишлади думу ляхник кипру ва хьуд агъзурсана гъазанмиш апӀуру.

¹⁷ Гьаци кьюд агъзур гъибисурира кьюд агъзурсан гъазанмиш гъапӀнийи.

¹⁸ Хъа сад агъзур манат гъибисури, душну, жил деебккну, душвакк ккивну, пул жин гъапӀну.

¹⁹ Саб хайлин вахтналан агъа гъюру ва дурарихьан арсран гьякь-гьисаб апӀувал ккун апӀуру.

²⁰ Чахь хьуд агъзур манат гъибтури, пул дубхну, кӀуру: – Агъа! Уву узухьна хьуд агъзур манат тувунва, магьа узу дурариинди хъана хьуд агъзурсан гъазанмиш гъапӀунза.

²¹ Агъайи дугъаз кӀуру: – Аферин увуз, ужур ва вафалу гъуллугъчи, бицӀи ляхниъ узуз вафалу гъахьунва, аьхю ляхнар табшурмиш апӀидизавуз; яв агъайин мяракайиз дуфну, дугъахъди шадвал апӀин.

²² Гьаци кьюд агъзур манат гъибисурира, дуфну, кӀуру: – Агъа! Уву узухьна кьюд агъзур манат тувунва, магьа дурарин кюмекниинди узу хъана кьюд агъзурсан гъазанмиш гъапӀунза.

²³ Агъайи дугъаз кӀуру: – Увузра аферин, ужур ва вафалу гъуллугъчи, бицӀи ляхниъ узуз вафалу гъахьунва, аьхю ляхин табшурмиш апӀидизавуз; йиз мяракайиз дуфну, узухъди йиз шадвал пай апӀин.

²⁴ Хъасин сад агъзур манат хьайир дуфну, кӀуру: – Агъа! Узуз уву учӀру адми вуйиб аьгъяйзуз: дурубзру йишвʼан ккадабцӀуз ва ктриву йишвʼан бегьер уч апӀуз ккунир вува.

²⁵ ГучӀ кабхъури пул жиликк жин гъапӀунза: магьа яв думу гъадабгъ.

²⁶ Хъа агъайи дугъаз гьамци кӀуру: – Эй жинжал ва темпел гъуллугъчи, увуз узу дурубзру йишвʼан ккадабцӀрур ва ктриву йишвʼан бегьер уч апӀрур вуйиб аьгъдайнуз?

²⁷ Гьаддиз уву йиз пул ляхник кипну ккундийи, гъафири узу думу артухъ дубхьну гъадабгъидийза.

²⁸ Гьаддиз тадабгъай мугъахь хьайи пул ва тувай йицӀуд агъзур хьайирихьна.

²⁹ Фицики гьарсар чаз айи касдиз хъанара тувди ва дугъан разу хьибди, хъа чаз адрурихьан айибра тадабгъиди.

³⁰ Ва башаккадру гъуллугъчи чӀатинди мучӀушназ гатӀахьай. Душваъ суза-фигъан, зурба ишуб хьибди. Хъасин Исайи кӀуру: – Ебхьуз ибар кайидариз гьаму гафар ерхьри!

Аьхиримжи суд

³¹ Инсаниятдин Бай Чан аднаъди малайикарра хъади гъафиган, Дугъу Чан адлувалин паччагьвал апӀиди.

³² Дугъан улихь вари миллетар уч духьну хьиди, хъа Дугъу, марччлихъни марччар цӀигьарихьан фици жара апӀури шулуш, гьаци дурар сар-сарихьан жара апӀиди:

³³ марччар Чан арччул, цӀигьар гагул терефнаъ дерккди.

³⁴ Гьадмуган Паччагьди Чан арччул терефнаъ айидариз пиди: – Гъачай йиз адашдин ужувлакк ккахьнайидар, дюнʼя ккебгъхъанмина учвуз гьязурди дебккнайи Аьршарин Паччагьлугъ ирсди кьабул апӀинай.

³⁵ Узуз гашди айзуз, учву Узуз уьл тувнийчва; Узу штухъ дахаргнайза, учву штухъди тухъ гъапӀнийчва; Узу яд жви вуйза, учву Узу кьабул гъапӀнийчва;

³⁶ гъяцӀалди айза, Узʼин палат алабхьнийчва; иццури айза, учву Узуз гъилигнийчва; дустагъдиъ айза, Узухьна гъафнийчва.

³⁷ Гьадмуган дугъри касари Дугъаз пиди: – Я Агъа! Уву учуз гашди дяркъну, Увуз фила уьл гьивнийихъа? Вая дахаргну ади, фила шид тувнийихъа?

³⁸ Уву яд жви вуди, учу Уву фила кьабул гъапӀнийихъа? Вая гъяцӀалди дяркъну, учу Увʼин фила палат алабхьнийихъа?

³⁹ Уву кетӀерццну ади, ясана дустагъдиъ ади дяркъну, учу Увухьна фила гъафнийихъа?

⁴⁰ Ва Паччагь вуйи Инсаниятдин Бали дурариз жаваб вуди пиди: – Дюзди кӀуразачвуз, учву гьаму Йиз бицӀи гъардшарикан саризкьан гьаци гъапӀнуш, гьадму учву Узуз гъапӀу мисал ву.

⁴¹ Гьадмуган Дугъу чан гагул терефнахъ хъайидариз пиди: – Йиз улариккан дург духьну гъарахай, нянайикк ккайидар, иблисдиз ва дугъан хликк ккайидариз гьязур дапӀнайи жегьеннемдин цӀиз гъарахай.

⁴² Узуз гашди айзуз, учву Узуз уьл тувундайчва; Узу дахаргнайза, шид тувундайчва;

⁴³ Узу яд жви вуди гъафиган, Узу кьабул гъапӀундайчва; гъяцӀалди айиган, Узухъ палат хъабхьундайчва; иццурайиган ва дустагъдиъ айиган, Узухьна гъафундайчва.

⁴⁴ Гьадмуган дурарира Дугъаз жаваб вуди пиди: – Я Агъа! Увуз гашди вая дахаргну ади, гъураба вая гъяцӀалди ади, кетӀерццнади, вая дустагъдиъ ади дяркъну, учу Увуз гъуллугъ дарапӀди фила гъитнухъа?

⁴⁵ Гьадмуган Дугъу пиди: – Дюзди кӀуразачвузки, учву гьаму Йиз бицӀи гъардшарикан саризкьан гьаци гъапӀундарш, Узузра гъапӀундарчва.

⁴⁶ Гьамци, нягьякьдар жегьеннемдин ккудудубкӀру аьзабнаъ ахьди, хъа гьякьлудар ккудудубкӀру уьмур хъапӀри хьиди.