Матта 23 - Гирами Китаб

Къанунчйирихьанна фарисйирихьан ихтият йихьай

¹ Хъасин Исайи, халкьдихьна ва Чан ученикарихьна илдицну, гъапнийи:

² – Мусайин Къанундин гъаврикк ккаъри, тахтниин къанунчйирна фарисйир деъна.

³ Гьаци вуйиган, гьадрари кӀурубдихъ хъебехъай ва кӀулиз адабгъай, хъа дурари апӀурайиганси мапӀанай, фицики дурари, фу ккун апӀураш, кӀура, хъа чпи гьаци апӀурадар.

⁴ Читин къайдйир кӀули гъахуз гъитри, дурари гъюнариин гъулайсуз гъагъар иливура, хъа дурар алишвлан ришвбан бадали чпи тӀубкьан кучрадар.

⁵ Хъа дурари фукӀа апӀурашра, инсанариз рябкъри кӀури апӀурайиб ву. Гьамци дурари унтӀланна хиллан илдижру Къанундиан гафар дидикӀнайи чпин чӀулар аьхю апӀури шулу ва палтарин цӀимцӀлар ярхи апӀури шулу.

⁶ Дурар мажлисар-демариъ ва мистариъ ужусдар йишвар дидисну деуз ккунидар ву.

⁷ Ва базар-майднариин чпи тебрик апӀури ва адмийири чпиз «Мялим! Мялим!» кӀури, дих апӀури ккунидар ву.

⁸ Хъа учвуз гъит мялимар дарипри, фицики гьякь Мялим сар ву, хъа учву вари гъардшар вучва.

⁹ Ва жилариин саризра адаш макӀанай, фицики учвуз сар Аьршарин АдаштӀан адар.

¹⁰ Ва учвуз насигьятчйирра дарипри, фицики сар ву учвуз айи Насигьятчи, думура Месигь ву!

¹¹ Учвкан варитӀан заан вуйирикан, учвуз гъараваш ишри,

¹² фицики, шли учв заанди дисури гъашиш, думу аскан апӀиди, хъа шли учв асканди дисури гъашиш, гьадму заан хьиди.

Исайи къанунчйирна фарисйир беябур апӀуб

¹³ Ичв гьял пис хьибди, кьюб маш гъяйи къанунчйирна фарисйир! Гьаз гъапиш адмийирин улихь Аьршарин Паччагьлугъдин раккар хъяркьрачва. Душваъ я учву учӀврадарчва, я учӀврайидар учӀвуз гъитрадарчва. [

¹⁴ ]

¹⁵ Ичв гьял пис хьибди, къанунчйирна фарисйир, кьюб маш гъяйидар, гьаз гъапиш сар каскьан учвухъинди илтӀикӀбан бадали, учву гьюлериланна жиларилан илдицури шулучва; ва дицир кас гъидихъган, дугъкан учвутӀан кьюб ражари бешбетер жегьеннемагьли апӀуручва.

¹⁶ Ичв гьял пис хьибди, рякъ улупурайи курар. Учву: «Аллагьдин хулʼинди ху гъапӀну пну, баладар, – кӀурачва, – хъа Аллагьдин хулаъ айи гъизилиинди ху гъапӀур чав туву гаф тамам апӀуз мажбур ву», – кӀурачва.

¹⁷ Я курар ва ахмакьар! Фу заан ву: гъизил, дарш гьадму гъизил гирами апӀурайи Аллагьдин хал?

¹⁸ Хъанара: «Шли Аллагьдиз багъишар апӀру йишвʼинди ху гъапӀнуш, дугъаз, баладар, кӀурачва, – хъа гьадина багъиш апӀуз дубхнайибдиинди ху гъапӀур чав туву гаф тамам апӀуз мажбур ву», – кӀурачва.

¹⁹ Эй кур духьнайидар! Фу заан ву: багъиш апӀуз дубхнайиб, дарш думу гирами апӀурайи марцци йишв?

²⁰ Гьаци вуйиган, шли Аллагьдиз багъишар апӀру йишвʼинди ху апӀураш, дугъу гьадушвʼин дивру варибдииндира ху апӀура.

²¹ Аллагьдин хулʼинди ху апӀурайири, гьам Аллагьдин хулʼинди, гьамсана душваъ яшамиш Шулайириинди ху апӀура.

²² Завʼинди ху апӀурайири Аллагьдин тахтниинди ва дидʼин Деънайириинди ху апӀура.

²³ Ичв гьял пис хьибди, къанунчйирна фарисйир, фицики учву, Къанунди дупнайибси, шюше, гьашв ва шивит укӀарин йицӀуб пайнакан саб пай туврачва, хъа Къанундиъ вартӀан метлеблу вуйиб: гьякьлувал, рягьимлувал, хъугъвал – гьархрачва; сифте вуди гьамрар дапӀну ккунду, хъа тмунубра дарапӀди гъибтну ккундар.

²⁴ Эй рякъ улупурайи курар! Учву хурагнак кабхъу мизмиз ктабгъурачва, хъа деве хътӀюбкъюрачва.

²⁵ Ичв гьял пис хьибди, кьюб маш гъяйи къанунчйирна фарисйир, гьаз гъапиш учву захна бушгъаб заълан марцц апӀури шулучва, хъа дурарин айитӀишв угърашʼвалинна тямягькарвалин йимишари абцӀри шулучва.

²⁶ Эй кур фарисей! Сифте захранна бушгъабан айитӀишв марцц апӀин, дурарин чӀатан терефра марцциб шлуганси.

²⁷ Ичв пис гьял хьибди, кьюб маш гъяйи къанунчйирна фарисйир, фицики учву, уччвуди рякъюз кӀури, чӀатанди лизиди дарснайи, хъа айитӀишв майтин кӀурбарина жюрбежюр чиркишну ацӀнайи накьварин гюмбтариз ухшар вучва.

²⁸ Гьаци учвура, инсанариз заъланди дугъридарси улупури, айтӀанди кучӀляхваларина нягьякьвалари ацӀначва.

Фарисйирна къанунчйир жазайикк ккуркьбакан

²⁹ Ичв гьял пис хьибди, кьюб маш гъяйи къанунчйир ва фарисйир! Учву, пайгъамбрариз ва жара марцци касариз гюмбтар диври, дурар кабалгурачва.

³⁰ «Эгер учу ич ата-бабйирин девриъ яшамиш шули гъахьнийиш, учу дурарихъди пайгъамбрарин ифи удубзбаъ иштирак хьидайча», – кӀурачва.

³¹ Гьаму гафариинди учву пайгъамбрар гъийихдарин веледар вуйивалин гьякьнаан ачухъди шагьидвал апӀурачва.

³² Гьаци вуйиган, ичв абйирин тахсрар давам апӀинай!

³³ Эй битӀар, битӀран ифи айидар! Учву жегьеннемдин цӀигъ гъитру жазайиккан фици гьергдичва?

³⁴ Гьаддиз магьа Узу учвухьна пайгъамбрар, фагьумлуйир ва аьлимар гьаъраза. Учву дурарикан садар йивну йихидичва, хъа тмундар ичв мистариъ урччвидичва ва шагьриан шагьриз утӀуккури хьидичва.

³⁵ Гьякьлу Авелин ифдилан ккебгъну, Аллагьдиз багъишар туврушванна Аллагьдин хулан арайиъ учву йивну гъачӀи Варахайин бай Закарʼяйин ифдиина гъяйизкьан, жилариин нягьякьди удубзурайи вари ифдин тахсирра ичвуб хьибди.

³⁶ Дюзди кӀуразавуз: гьамусдин адмийириз гьаму варибдин жаза гьадабтӀиди.

Ерусалимдиин улубкьруб

³⁷ Эй, пайгъамбрар йивну йихру ва чахьна гьау илчйириин гъван уьлюбхру Ерусалим! Швнубан Узуз, пеъли чан хлинццариккна шюхъярси, яв халкь уч апӀуз ккун гъабхьунзуз, хъа учву кӀул ккивундарчва!

³⁸ Лигай, магьа ичв хал ичӀиди гъубзна.

³⁹ Магьа кӀуразачвуз: «Агъайин ччвурнахъ Гъюрайир ужувлакк ишри», кӀури, учву дих дарапӀкьан гагьди, Узу сарун рякъидарчвуз.