Матта 22 - Гирами Китаб

Сумчрин мяракайикан тахалус

¹ Исайи хъанара дурар тахалусариинди гъаврикк ккауб давам гъапӀнийи.

² Аьршарин Паччагьлугъ сар гьамцир паччагьдиз ухшар ву. Сар паччагьди, гизафдариз сумчрик дупну, чан балин сумчрин мярака дюзмиш гъапӀнийи.

³ Вахт улубкьган, дугъу чан лукӀар хялариз теклиф апӀуз гьау, амма дурариз гъюз ккун гъабхьундайи.

⁴ Дугъу хъанара дурарихьна чан жара лукӀар гьаънийи: – Магьа, дюрхнайи жердар, якъар дурккну, хурагарра дапӀну, вари гьязурди а, сумчрин демраз гъачай.

⁵ Садар, дугъан гафарихъ хъпебехъди, чпин хутӀлариз, тмундар ариш-вериш апӀуз гъушнийи.

⁶ Имбудари, дугъан лукӀар дидисну, дурччвну йихуру.

⁷ Мидкан, пис хъял дуфну, паччагьди, чан кьушмар гьаъну, дурар тӀанкь апӀуру ва дурарин шагьрик цӀа кипру.

⁸ Хъасин паччагьди чан лукӀариз кӀуру: – Сумчрин дем гьязурди а, хъа сумчриз теклиф дапӀнайидар лайикьлу гъахьундар.

⁹ Гьаддиз, душну, кючйириъ алахькьандариз варидариз сумчрин демраз дих апӀинай.

¹⁰ ЛукӀарира, душну, кючйириъ чпиз алахькьандар вари: гьам ужудар, гьамсана харжидар хъади дуфну, сумчрин суфра хялари хъабцӀру.

¹¹ Хяларихьна удучӀву паччагьдиз дураригъ сумчриз ярамиш дару палтар али сар кас рякъюру.

¹² Паччагьди дугъаз кӀуру: – Я дуст кас, сумчрин палтар алдарди увхьан мина гъюз фици гъабхьунвухьан? Дугъазра кӀуруб гъибихъундайи.

¹³ Гьадмуган паччагьди лукӀариз гъапнийи: – Му, ликар-хилар йитӀну, чӀатинди мучӀушназ, ишуб, гьарай-суза, фигъан айишвазди гатӀахьай.

¹⁴ Фицики теклиф дапӀнайидар гизафдар ву, хъа кадагънайидар – цӀиб.

«Паччагьдиз паччагьдинуб, хъа Аллагьдиз Аллагьдинуб тувай»

¹⁵ Гьадмуган фарисйири, мушвʼан удучӀвну, Исайи фукӀа дюз даруб кӀайиз ккеуз мясляаьт апӀуру,

¹⁶ ва Дугъахьна, Гьироддин терефкрарра хъади, чпин ученикар гьаъру. Дурари Исайиз кӀуру: – Я Мялим! Учуз Уву гьякьлу кас вуйивал ва инсанар Аллагьдин дугъри рякъюъ тӀаърайивал аьгъячуз. Уву инсандин машназ, яна гъуллугъназ лигурдарва.

¹⁷ Гьаци вуйиган, учуз йип: Римдин паччагьдиз учу налук тувуз хай шулин, даш шулдарин?

¹⁸ Исайи, дурарин чӀуру ниятар рякъюри, кӀуру: – Кьюб маш гъяйидар, Узу гьаз ахтармиш апӀурачва?

¹⁹ Учву налукди туврайи пул Узуз улупай. Дурари Дугъахьна саб манат хуру.

²⁰ – Мидик шлин шикилна ччвур ка? – пну, гьерху Исайи дурарихьан.

²¹ – Римдин паччагьдин, – жаваб туву дурари. Гьадмуган Исайи дурариз кӀуру: – Дици вуш, паччагьдинуб паччагьдиз, хъа Аллагьдинуб Аллагьдиз тувай.

²² Му гафар гъеерхьиган, дурар мюгьтал шулу ва Дугъхьан гьудучӀвну гъягъюру.

ГъачӀидар чӀиви шлуваликан

²³ Гьадму йигъан Дугъахьна гъачӀидар чӀиви шуб айиб дар кӀурайи саддукйир гъюру, ва дурари Исайихьан гьерхру:

²⁴ – Я Мялим! Муса пайгъамбри дупна: «Эгер фуж чаз велед даршиди гъачӀиш, дугъан хпир дугъан чвуччвуз дитри ва чвуччвун тухум давам апӀри».

²⁵ Учу ургур чве вуйча, ва сарпир эвлемиш духьну, гъакӀну ва, велед хътарди хьпаз лигну, хпир дугъан чвуччвуз дитру.

²⁶ Гьамци кьюрпирра, шубурпирра, та-а-ап ургурпириина гъяйиз, вари йихуру.

²⁷ Аьхирки гьадму хпирра йикӀуру.

²⁸ Гьаци гъабшиган, гъиямат йигъан вари чӀиви шлуган, думу ургурикан фунурин хпир хьиди? Дурариз вардариз думу швуваз гъушнийи аьхир.

²⁹ Исайи дурариз гьамциб жаваб апӀуру: – Учву, я Гирами китабар, ясана Аллагьдин кьудрат аьгъдарди, улдугурачва.

³⁰ ЧӀиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди.

³¹ Хъа гъиямат йигъан гъийихдар чӀиви хьувалин гьякьнаан Аллагьди учвуз гъапи гьаму гафар яраб учву гъурхундайкӀан?

³² «Узу Ибрагьимдин Аллагь вуза, Исакьдин Аллагь вуза ва Якьубдин Аллагь вуза». Аллагь дийихнайидарин ваъ, хъа чӀивидарин Аллагь ву.

³³ Му гафар гъеерхьиган, халкь Исайин аьгъювалар улупбиин мюгьтал шуйи.

ВартӀан метлеблу табшуругъ

³⁴ Исайи саддукйир фици чпин йишвʼин дитнуш, гъеебхьиган, фарисйирна саддукйир, сатӀиди уч шулу.

³⁵ Дурарикан сар къанунчийи, Исайи фу кӀуруш кӀури, Дугъхьан гьерхру:

³⁶ – Мялим! Къанундиъ вартӀан метлеблу табшуругъ фунуб ву?

³⁷ Исайира дугъаз кӀуру: – «Яв Агъа Аллагь, вари юкӀв хъипну, вари рюгьнаан ва яв вари фагьмиан ккун апӀин».

³⁸ Му сабпи ва вартӀан метлеблу табшуругъ ву.

³⁹ Кьюбпибра гьаддиз барабар ву: «Яв багахь хьайир жвуваз жвувси ккун апӀин».

⁴⁰ Гьаму кьюб табшуругъдиин вари Къанун ва пайгъамбрарин БикӀбар биналамиш духьна.

Месигь шлин бай ву?

⁴¹ Саб йишвʼина уч духьнайи фарисйирихьан Исайи гьерху:

⁴² – Учву Месигьдин гьякьнаан фу фикир апӀурачва? Думу шлин Бай ву? Фарисйири Дугъаз: – Давудгъярин Бай ву, – кӀуру.

⁴³ Исайи дурарихьан хъана гьерхру: – Дици вуйиган, Рюгьну ацӀнайи Давудри Дугъаз Агъа фици кӀура? Давудри дупнаки:

⁴⁴ «Агъайи йиз Агъайиз гъапну: Узу Яв душмнар Яв ликарикк дахьайизкьан, Йиз арччул гъвалахъ деъ?»

⁴⁵ Гьамци, Давудри Дугъаз Агъа кӀурайиган, Думу дугъан Бай фици хьидихъа?

⁴⁶ Сарихьанра Дугъаз жаваб тувуз гъабхьундар. Ва гьадму йигъланмина, Исайиз суалар тувуз кӀури, Сарун сарира Исайихьан гьич сабдиканра гьерхуз кӀубанвал гъапӀундар.