Матта 16 - Гирами Китаб

Аьламат улупуб ккун апӀуб

¹ Саб арайилан фарисйирина саддукйири, Исайин багахьна дуфну, думу ахтармиш апӀуз ккунди, аьршариан чпиз саб аьламатнан лишан улупуб ккун апӀуру.

² Хьа Исайи дурариз жаваб вуди кӀуру: – Ригъ алабхъурайиган, учву: „Закур ригъ апӀиди, гьаз гъапиш зав уьруди а“, – кӀуручва.

³ Хъа гьирин ухди: „Гъи селсиб мархь убгъиди, гьаз гъапиш зав уьруди а“, – кӀуручва. Эй, кьюб маш гъяйидар! Завуз дилигну, гьава аьгъю апӀуз шулчвухьан, хъа гьаму шулайи ляхнарин гъавриъ ахъуз шуладарчвухьан.

⁴ Хътругъру ва аьрбатан гьамусдин адмийири аьламатнан лишнар улупуб ккун апӀура, хъа дурариз, Юнус пайгъамбрин кӀулʼина гъафи аьламатналан гъайри, жара аьламат рябкъидар. Гьамци дупну, Иса дурарихьан гьудучӀвну гъягъюру.

Фарисйирихьанна саддукйирихьан ихтият йихьай

⁵ Дурар гьюлин тмуну гъирагъдихъна ктучӀвиган, Дугъан ученикарин уьлер гъадагъуб кӀваълан дубшнади гъабхьну.

⁶ Исайи дурариз кӀуру: – Лигай-гьа, фарисйиринна саддукйирин дунихьан ихтият йихьай.

⁷ Ученикар: «Му учу уьлер гъададагъиган кӀурайиб вуйкӀан», – кӀури, фикрик кахънийи.

⁸ Дурар фтикан улхураш аьгъяди, Исайи дурариз кӀуру: – Уьлер гъадагъундарча кӀури, гьаз фикрарик кахъначва, хъугъвал адрудар.

⁹ Учву гьамусра фтинкӀа гъавриъ ахънаданчва? Хъа хьуд агъзур кас тухъ гъапӀу хьуб уьлкан хъиригъу кьацӀари швнуб тавра ацӀнуш, кӀваълан гъубшнийичв?

¹⁰ Ясана юкьуд агъзур касдигъна пай гъапӀу ургуб уьлкан хъиригъу кьацӀари швнуб тавра ацӀнуш, учвуз гьархнайин?

¹¹ Учву гьаз гъавриъ ахърадайкӀан? Узу уьлкан улхурадарза, хъа фарисйиринна саддукйирин дунихьан ихтият йихьай! кӀураза.

¹² Гьадмуган, Дугъу дунихьан ваъ, хъа фарисйиринна саддукйирин кучӀлин аьгъюваларихьан ихтият йихьай, кӀурайивалин дурар гъаври ахънийи.

Петри, Иса Месигь ву, пуб

¹³ Хъа Филипдин Кесария кӀуру шагьрихьна гъафиган, Исайи Чан ученикарихьан гьерху: – Адмийири Инсаниятдин Бай фуж ву, кӀури, гьисаб апӀура?

¹⁴ Дурари гьамци кӀуру: – Садари Уву – штуан апӀру Ягьʼя ву, тмундари – Илʼяс ву, кӀура, шубурпидари – Еремия вая жара пайгъамбрарикан сар ву, кӀури, гьисаб апӀура.

¹⁵ Хъа Исайи: – Хъа учву, Узу фуж ву кӀури, гьисаб апӀурачва? – пну, гьерхру.

¹⁶ Петри: – Уву Месигь, чӀиви Аллагьдин Бай вува, – пну, жаваб тувру.

¹⁷ Гьадмуган Исайи дугъаз жаваб вуди гъапи: – Уву бахтавар вува, Юнусдин бай Симон, гьаз гъапиш увуз му, инсанари ваъ, хъа Аьршарин Йиз Адашди ачмиш гъапӀунвуз.

¹⁸ Хъанара кӀуразавузки, уву, гьацира Петр яна Гъарз вува ва гьаму гъарзʼин Узу Йиз хъугънайидарин бин ккабалгидиза, думу сарихьанра дабгъуз хьибдар, гьеле аьжалихьанна.

¹⁹ Узу увухьна Аьршарин Паччагьлугъдин ачар тувдиза, ва уву жилариин фу гъадагъа гъапӀиш, аьршариин гьадму гъадагъа дапӀну хьибди, ва уву жилариин фтиз ихтияр тувиш, аьршариинра гьаддиз ихтияр тувну хьибди.

²⁰ Ва гьадмуган Исайи Чан ученикариз, Учв Месигь вуйиваликан гьич саризра дарпуб ижмишнаан гъадагъа апӀуру.

Исайи Чан аьжаликан пуб

²¹ Гьадму вахтналан хъюгъну, Исайи ученикариз Учв Ерусалимдиз душну ккуниваликан, душваъ аьхюдари, аьхюну маллйири, къанунчйири Учв гизаф аьзабарикк ккитруваликан ва Учв йивну йикӀруваликан, шубудпи йигъан чӀиви шлуваликан ктибтуз хъюгънийи.

²² Хъа Петри Иса гъирагъдиз гьадаъну, Дугъан гафар гьадатӀуз хъюгъру: – Аллагьди Увуз рягьим апӀри, я Агъа! Яв кӀулʼин дицисдар кьазйир улулукьри.

²³ Исайи, Петрихьинди илдицну, гъапи: – ГьудубчӀв Узхьан, иблис! Уву Узу рякъʼан адаурава, гьаз гъапиш яв фикрар адмийирин фикрар вуяв, хъа Аллагьдин ваъ.

²⁴ Хъасин Исайи Чан ученикариз гъапи: – Шлиз Узухъди гъюз ккундуш, думу, чан тямягьяр дирчну, чан хач гъадабгъну, Узухъди гъюри.

²⁵ Шлиз чан уьмур уьбхюз ккундуш, дугъан думу дубгди. Хъа шли Узу бадали чан уьмур пуч гъапӀиш, дугъаз думу бихъиди.

²⁶ Чан уьмур гъудубгу касдиз, вари дюнʼя чаз гъабшишра, фу хайир ахъа? Чан уьмур кьяляхъ апӀбан бадали, дугъу фициб кьимат тувди?

²⁷ Фицики Инсаниятдин Бай Чан Адашдин аднаъди, Чан малайикарра хъади гъиди, ва гьадмуган гьарсар касдиз, чан ляхнариз лигну, кьимат тувди.

²⁸ Дюзди кӀуразачвуз: мушвʼин дийигънайидарикан сакьюдариз, чпин аьжал хъубкьайиз, Чан Паччагьлугъдиъ учӀврайи Инсаниятдин Бай рякъиди.