Матта 13 - Гирами Китаб

Тум убзрурикан тахалус

¹ Гьадму йигъан хулʼан удучӀву Иса Галилей гьюлихъна душну деъру.

² Дугълан гизаф халкь илтӀибшнийи, ва гьаддиз Думу люткейиъ эънийи, хъа халкь гьюлин гъирагъдихъ гъубзнийи.

³ Исайи дурариз, аьгъювалар улупури тахалусариинди гизафдарикан гъапнийи. Дугъу кӀуру: – Сар нежбер тум убзуз удучӀвуру.

⁴ Убзурайиган, гьацӀар удрар рякъюхъ дахьру – дурар, жакьвар дуфну, удуру.

⁵ Сакьюдар удрар гъван ккайи, руг цӀибтӀан алдру йишвʼина дахьру, ва дурар ухди ктучӀвуру, гьаз гъапиш ругдин гъат чӀиллиб вуйи.

⁶ Ригъ гъапӀган, дурар чурхуру, ва, ччивар зяифди хьпаз лигну, ерццуру.

⁷ ГьацӀар удрар зазарин тумрягъ гъяхьру, ва аьхю гъахьи зазари дурар ккаъру.

⁸ Хъа садар удрар авадан ругдик кахьру, дурари бегьер хуру: фундари – варж, фундари – йирхьцӀур, хъа фундари – сумчӀур ражари артухъ.

⁹ Шлин ибариз ебхьураш, гъит ебхьри.

Тахалусарин мяна

¹⁰ Багахь духьну, ученикари Дугъхьан гьерхру: – Уву халкьдиз тахалусариинди гьаз кӀурава?

¹¹ Дугъу дурариз жаваб вуди кӀуру: – Гьаз гъапиш учвуз Аьршарин Паччагьлугъдин сирар аьгъю хьуб тувначвуз, хъа имбудариз тувнадар.

¹² Фицики шлиз аш, дугъаз хъана тувди ва артухъра хьибди, хъа шлиз адарш, айибра тадабгъиди.

¹³ Гьаддиз дурариз тахалусариинди кӀураза, дурариз, лигурашра, рябкъюрадар, хъпехъурашра, ебхьурадар ва гъаври ахърадар.

¹⁴ Ишая пайгъамбри магьа гьамци дупнайиб дурариин улубкьура: «Учвуз ебхьуз гъеебхьунчвуз, хъа гъавриъ ахъидарчву, учвуз рябкъюз гъябкъюнчвуз, хъа мучӀуди гъуздичва.

¹⁵ Гьаз гъапиш му инсанарин юкӀвар хъунти духьна. Дурарин ибариз читиндитӀан ебхьури имдар. Дурариз, улар уьлчӀюкьнамиди, фукӀара рябкъидар. Гьаци дубхьнаки, дурариз рябкъюзра рябкъюри имдар. Ебхьузра ебхьури амдар, ва хъунти юкӀвар гъавриъ ахърадар, ва, чпи сагъ апӀбан бадали, Аллагьдихьинди илтӀикӀидар».

¹⁶ Учву, улариз рябкъюрайидар ва ибариз ебхьурайидар, бахтаврар вучва!

¹⁷ Фицики дюзди кӀуразачвуз: гизаф пайгъамбраризна марцци касариз учвуз рябкъюрайиб рябкъюз ккундийи, хъа гъябкъюндар, ва учвуз ебхьурайиб ебхьуз ккундийи, хъа гъеебхьундар.

Тахалусдин мяна

¹⁸ Магьа тум убзрурикан вуйи тахалусдин мяна:

¹⁹ Аьршарин Паччагьлугъдикан гаф гъеебхьиган, дидин гъаври даршулайи гьарсар касдихьна иблис гъюру ва дугъан кӀваъ дубзнайиб гьитӀибкӀуру: рякъʼина ахьу удрар магьа гьадму ву.

²⁰ Гъван ккайи йишвʼина ахьу удрари, Аллагьдин гаф деебхьну, дишла шадди кьабул апӀрур вуйиб улупура.

²¹ Хъа дугъакк ччив ккадар, гьаддиз думу цӀиб вахтназтӀан дар. Аллагьдин гаф себеб вуди чахъ хъергруган, ясана саб хатӀа-бала гъядябхъруган, думу гьадму сяаьт гафнахьан гьудучӀвуру.

²² Зазар-варжйиригъ дахьу удрари Аллагьдин гаф деебхьну, гьар йигъандин гъайгъушнари ва девлетназ вуйи нефсну ккагънайи кас улупура. Мицир касдиъ гафну бегьер тувдар.

²³ Авадан ругдик кахьу удрари, Аллагьдин гаф деебхьну, дидин гъавриъ ахъру кас улупура. Ари гьадму варж, йирхьцӀур, вая сумчӀур ражари артухъ бегьер туврайи удрариз ухшар ву.

АчӀал

²⁴ Исайи халкьдиз сабсана тахалус ктибтуру: – Аьршарин Паччагьлугъ магьа гьамдиз барабар ву: сар касди чан хутӀлиъ марцци тум убзуру.

²⁵ Адмийир даахнайиган, дугъан хайир даккни кас дуфну, дубзнайи хутӀлиъ ачӀлин тум дабгъуру.

²⁶ Чар ктубчӀвуру. Дяхни кӀул апӀуз хъюгъган, адмийириз душвягъ ачӀалра ктубчӀвури рябкъюру.

²⁷ Ва хулан эйсийихьна дуфну, дугъан лукӀари кӀуру: «Учу яв хутӀлиъ гъубзуб марцци тум вуйич, аьхир. Душваъ ачӀал наънан арайиз гъафну?»

²⁸ Дугъу дурариз кӀуру: «Думу йиз хайир даккни касди гъапӀуб ву». Хъа лукӀари кӀуру: «Увуз ккундуш, душну ачӀал апӀуча?»

²⁹ Дугъу кӀуру: «Ваъ, ачӀал апӀруган, дяхинра уьчӀюбгъиди.

³⁰ Иган хъубкьайиз, дяхнихъди ачӀалра гъибтай. Иган хъубкьган, узу иган убгрудариз пидиза: сифте ачӀал дапӀну, цӀигъ ургбан бадали, дурар гъварч-гъварчди йитӀай, хъа дяхин йиз танхаризди уч апӀинай».

Дилкан тахалус

³¹ Исайи дурариз хъана жара тахалус ктибтуру: – Аьршарин Паччагьлугъ магьа гьамдиз ухшар ву: сар касди бистниъ бицӀи дил кивру.

³² Дил, учв варитӀан бицӀиб вушра, хъубкьган, думу, бистниъ варитӀан аьхюб дубхьну, гьарси шулу, гьаци вуйиган дидигъна завун ничхрар гъюру ва дидин циркларигъ мукьар апӀуру.

Дуникан тахалус

³³ Исайи дурариз хъана жара тахалус ктибтуру: – Аьршарин Паччагьлугъ, дишагьлийи, гъадабгъну, шубуб сеъ хюйик капӀну, хамир вари утуз гъибту дуниз ухшар ву.

³⁴ Гьамрар вари Исайи халкьдиз, тахалусар хури, ктитури гъахьну, ва, тахалус дархиди, фукӀара кӀури гъахьундар.

³⁵ Исайи тахалусариинди пуб пайгъамбрин мелзналан улдучӀву гьаму гафар кӀулиз удучӀвбаз вуйи: «Узу улхруган, тахалусариинди улхидиза, ва дюнʼя ккебгъхъанмина вуйи сирар тахалусариинди кдитидиза».

АчӀликан вуйи тахалусдин мяна

³⁶ Хъасин уч духьнайи халкьдихьан гьудучӀвну, Иса хулаз гъюру. Дугъан ученикарра Дугъахъди гъюру, ва хулаъ чпитӀан амдру вахтна дурари Дугъкан тӀалаб апӀуру: – Учу хутӀлиъ ктубчӀву ачӀликан вуйи тахалусдин гъаврикк ккаъ сарун.

³⁷ Ва Дугъу жаваб вуди гъапи: – Марцци тум убзурайир Инсаниятдин Бай ву.

³⁸ ХутӀил дюнʼя ву, марцци удрар Аллагьдин Паччагьлугъдиъ айи касар ву; хъа ачӀал иблисдин баяр ву.

³⁹ Дурар гъурзу душман иблис ву, иган убгувал гъиямат йигъ ву, хъа иган убгрудар малайикар ву.

⁴⁰ Гьаци вуйиган, фици ачӀал дапӀну, укӀ цӀигъ убгуруш, гьаци хьибди аьхирзамандин вахт улубкьиган:

⁴¹ Инсаниятдин Бали Чан малайикар гьаъди, дурари Дугъан Паччагьлугъдиъ айи вари гунагькрарна къанунсуз ляхнар апӀурайидар гъядягъну, уч апӀиди

⁴² ва дурар жегьеннемдин цӀигъна гатӀахьиди; душваъ зурба ишуб, суза-фигъан абхъди.

⁴³ Гьадму вахтна дугъри касари чпин Адашдин Паччагьлугъдиъ ригъдиси нур тувди. Ебхьуз ибар кайидариз гъит ебхьри.

Жиликк ккивнайи хазнайикан тахалус

⁴⁴ Аьршарин Паччагьлугъ магьа гьамдиз барабар ву: сар касди, хутӀлиъ жиликк хазна гъибихъган, думу чан айиси ккивру. Дугъу, кьадар адрукьан шад духьну, чаз айи-адруб вари масу тувну, гьадму хутӀил чазди гъадабгъуру.

Гавагьирикан тахалус

⁴⁵ Аьршарин Паччагьлугъ магьа гьамдизра ухшар ву: Сар алверчийи багьалу гавагьирар агури шулу.

⁴⁶ Саб ражари дугъаз уларин акв гъабхрубсиб успагьи гавагьир масу туври рябкъюру, ва дугъу, душну, чаз айи-адруб вари масу тувну, гьадму гавагьир гъадабгъуру.

Чуликан тахалус

⁴⁷ Аьршарин Паччагьлугъ магьа гьамдизра ухшар ву: балугъчйири гьюликк чул ккипру ва гьар жюрейин балугъар дисуру.

⁴⁸ Чул абцӀган, думу гъирагъдихъна ктабгъуру, ва, дидин гъвалахъ деъну, ужудар гъюдюхну, чӀурудар гатӀахьуру.

⁴⁹ Гьаци хьибди гъиямат йигъан: малайикар гъиди ва дурари дугъри касарихьан писдар жара апӀиди,

⁵⁰ ва дурар жегьеннемдин цӀигъна гатӀахьиди. Душваъ зурба ишуб, суза-фигъан абхъди.

⁵¹ Исайи дурарихьан гьерху: – Гьамдин варибдин гъавриъ ахъунчву? Дугъаз дурари: «Ав», – гъапи.

⁵² Исайи дурариз гъапи: – Гьаддиз Аьршарин Паччагьлугъ аьгъю гъапӀу гьарсар къанунчи, чан сундхиан гьам цӀийиб, гьамсана йирсиб адабгъурайи хулан эйсийиз ухшар ву.

Чан багъри шагьриъ ва хулаъ пайгъамбриз гьюрмат ади шулдар

⁵³ Гьаму тахалусар кидитну ккудубкӀган, Иса дилин гъушу.

⁵⁴ Чан багъри шагьриз дуфну, дугъу жугьдарин мистаъ халкьдиз аьгъювалар улупуз хъюгъю. Вари мюгьтал духьнайи: – Мугъан мукьан фагьум ва кьувват наънан вуйкӀан? – кӀуйи дурари. –

⁵⁵ Думу харатчийин Бай даринхъа? Дугъан дадайиз Марʼям кӀурдаринхъа, Дугъан чвйирра Якьуб, Юсуф, Симон ва Ягьуда даринхъа?

⁵⁶ Дугъан чйирра вари ухьухъди хъадаринхъа? Дугъан му вари кьудрат наънан вуйкӀан?

⁵⁷ Дурариз Дугъахъ хъугъуз ккун гъабхьундайи. Исайи дурариз гъапи: – Гьюрмат адру пайгъамбар хьуб мумкин дар, хъа чан багъри шагьриъ ва хулаъ пайгъамбриз гьюрмат ади шулдар.

⁵⁸ Исайи душваъ, дурарин хъугъвал адрувализ дилигну, улупуз ккайи гизаф аьламатар улупундайи.