Матта 12 - Гирами Китаб

Султ йигъкан гьюжат

¹ Саб султ йигъан Иса дяхин дубзнайи хутӀлиантина гъягъюру. Гаш дубхьнайи Дугъан ученикари, дяхнин кӀулар улдутӀну, китӀишну, итӀуз хъюгъру.

² Му гъябкъю фарисйири Исайиз гъапи: – Магьа Яв ученикари султ йигъан Къанунди гъадагъа дапӀнайи ляхин апӀура.

³ Хъа Исайи дурариз кӀуру: – Чазна чахъди хъайидариз гаш гъабхьи вахтна Давудри гьапӀнуш, Гирами китабариан гъурхундарнучва?

⁴ Фици думу Аллагьдин хулаъ учӀвнуш ва дугъуна дугъахъди хъайидари я чаз, я чан юлдшариз итӀуз гъадагъа вуйи, хъа анжагъ маллйиризтӀан итӀуз ихтияр адру Аллагьдиз бахш дапӀнайи уьлер фици гъитӀнуш, гъурхундарнучва?

⁵ Ясана учву, Аллагьдин хулаъ маллйири султ йигъандин къайда чӀур апӀурашра, дурар тахсиркрар гьисаб дарапӀбакан Къанундиъ гъурхундарнучва?

⁶ КӀуразачвузки: мушвахь Аллагьдин халтӀанра зиина Вуйир хьа.

⁷ Эгер учвуз: «Гъурбан апӀуб ваъ, хъа рягьим апӀуб ккундузуз», кӀуру гафарин мяна аьгъяйиш, учву тахсир ктрудар тахсиркар ву, пидайчва,

⁸ фицики Инсаниятдин Бай султ йигъʼинра Агъа ву.

Хил деебццнайи кас сагъ апӀуб

⁹ Хъасин Думу жугьдарин мистаз гъягъюру.

¹⁰ Душваъ хил деебццнайи сар кас айи. Исайик саб тахсир кипбан бадали, маллйири Дугъхьан гьерхру: – Мусайин Къанундиинди султ йигъан иццурайир сагъ апӀуз хай шулин?

¹¹ Исайи дурариз гьамци жаваб туву: – Учвкан сарира султ йигъан ичӀаъ абхъу чан чарва ададабгъди гъибтрин?

¹² Хъа чарватӀан инсан гизаф багьа даринхъа? Гьаци вуйиган, султ йигъанра ужʼвал апӀуз хай шулу.

¹³ Хъасин Исайи хил деебццнайириз кӀуру: – Яв хил гьачӀабкк. Дугъу хил гьачӀабккуру, ва гьадмусяаьт думу гьатмуну хилси сагъ шулу.

¹⁴ Душвʼан фарисйири, чӀатинди удучӀвну, Иса фици пуч апӀуруш, йикьрар йитӀуру.

Магьа йиз гъуллугъчи

¹⁵ Хъа Исайиз мидкан аьгъю шулу ва дишла удучӀвну гъягъюру. Дугъан кьяляхъди гизафдар гъягъюру, ва Дугъу иццурайидар вари сагъ апӀуру.

¹⁶ Ва Чакан шлизкӀа жарадариз пуб гъадагъа апӀуру.

¹⁷ Му вари мици, Аллагьди Ишая пайгъамбрин мелзналан гьамци гъапиб кӀулиз удубчӀвбан бадали гъабхьнийи:

¹⁸ «Магьа Узу кадагънайи Йиз Гъуллугъчи. Узуз Ккунир. Дугъʼин Йиз юкӀв рази ву. Дугъахьна Йиз Рюгьра гьаъраза. Ва Дугъу вари жугьуд дару халкьариз, гьякьвалин вахт улубкьна кӀури, хабар тувди.

¹⁹ Думу я гьюжатназ удучӀврур дар, я чӀигъар апӀрур дар, ва кючйириъ саризра Дугъан сес ебхьидар.

²⁰ Дугъу, улубкьну ккуни гьякьвал гъалибвалихьна дархидикьан гагьди, дюбгъну кебхнайи чӀеъ ктубтӀидар ва хъудубгурайи гъахма ктӀубшвидар.

²¹ Ва вари миллетари Дугъахъ йирфар хъирчну хьибди».

Иса ва иблис

²² Дидин кьяляхъ Исайихьна, жинар кади, дярябкъру ва чӀал дибиснайи сар кас хуру, Дугъу думу кас сагъ апӀуру, гьаци думу чӀалниинара гъюру ва дугъан улариз рябкъюзра хъюгъру.

²³ Му ляхниин вари халкь аьжайиб шулу ва дурари гьамци кӀуру: «Гьаяман гьаму Давудгъярин Бай вушул гьа?»

²⁴ Хъа мидкан деебхьну, фарисйири кӀуру: – Дугъу жинар жараси ваъ, хъа жинарин аьхюр вуйи Велзевулин кьувватниинди ктаура.

²⁵ Амма Исайи, дурарин фикрар аьгъяди, гьамци гъапи: – Чан айитӀ душманвал ади, пай гъабши гьарсаб паччагьлугъ ичӀи шул, арайиъ душманвал айи я саб шагьур, я саб хизан гъудрубзур.

²⁶ Эгер шейтӀни шейтӀан ктаураш, думу чав чаз къаршу дубхьна: дидин паччагьлугъ фици сагъди гъубздихъа?

²⁷ Ва эгер Узу жинар Велзевулин кьувватну ктаураш, ичв адмийири дурар шлин кюмекниинди ктаура? Магьа гьамди учву гьякь дарувал улупура.

²⁸ Дугъриданна, Узу жинар Гирами Рюгьниинди ктаураш, ичв арайиз Аллагьдин Паччагьлугъвал магьа хъубкьна.

²⁹ Гьаци дарш сарихьанра, гуж кайирин хулаз дуфну, душв тӀараш апӀуз хьибдар – эгер эйси йитӀну адарш; гъийитӀган, хал тӀараш апӀуз шул.

³⁰ Фуж Узухъди дарш, думу Узуз къаршу ву ва шли Узухъди уч апӀурадаш, дугъу зяя апӀура.

³¹ Гьаддиз кӀуразачвуз: адмийирин гьарсаб гунгьилан ва Аллагьдиз къаршу гафналан хил алдабгъиди, хъа Гирами Рюгьназ къаршу гафналан хил алдабгъидар.

³² Эгер шли Инсаниятдин Бализ къаршуди чӀуру гаф гъапиш, дугълан хил алдабгъиди, хъа шли Гирами Рюгьназ гъапиш, дугълан я гьамус, ясана гъюз имбу уьмриъ хил алдабгъидар.

Гьар ва дидин бегьер

³³ Учву гьарра ва дидин йимишра гъяниб ву йипай, ясана гьарра ва дидин йимишра чӀуруб ву йипай; гьар йимишдиз лигну аьгъю шулу.

³⁴ Эй битӀракан гъахьидар! Учвхьан, пис юкӀвар ади, ужуб гаф пуз фици хьибдичвухьан?! Фицики инсандин мелз, чан юкӀв фти абцӀнаш, гьаддикан улхури шулу.

³⁵ Ужур касди чан хазнайиан ужуб, хъа чӀуру касди чан хазнайиан чӀуруб адабгъуру.

³⁶ КӀуразачвузки, инсанари чпин гьарсаб гьавайи гафнан жаваб гъиямат йигъан тувди.

³⁷ Фицики, яв гафариз дилигну, уву гьякь вая нягьякь апӀиди.

Исайикан аьламат улупуб ккун апӀуб

³⁸ Гьадмуган къанунчйириканна фарисйирикан бязидари Исайиз кӀуру: – Мялим! Учуз уву АллагьдихьантӀан даршлу саб аьламат улупну ккундучуз.

³⁹ Хъа Исайи дурариз жаваб вуди гъапи: – Хътругъру ва аьрбатан гьамусдин адмийири аьламатнан лишнар улупуб ккун апӀура, хъа дурариз, Юнус пайгъамбрин кӀулʼина гъафи аьламатналан гъайри, жара аьламат рябкъидар.

⁴⁰ Юнус пайгъамбар фици шубуд йигъанна шубуд йишван зурба балугъин фуниъ ади гъахьнуш, гьаци Инсаниятдин Байра шубуд йигъанна шубуд йишван жилин айитӀ хьиди.

⁴¹ Гъиямат йигъан суд апӀру вахтна Ниневия шагьрин агьалйир гьамусдин адмийирин гунгьарин шагьидарди гъудужвиди, фицики дурари Юнусди улупу аьгъюваларихъ хъебехъну, гунгьар гардандиъ гъидисну; хъа мушвахь ЮнустӀанна зурба Вуйир хьа.

⁴² Гъиямат йигъан суд апӀру вахтна кьиблайин паччагь-ханумди, гьамусдин адмийириз къаршу гъудужвну, дурар тахсиркар апӀиди, фицики думу дюнʼяйин тму кӀулиан Сулеймандин фагьумлувалихъ хъпехъуз гъафнийи; хъа магьа мушвахь СулеймантӀан зурба Вуйир хьа.

Жин кьяляхъ хътабкуб

⁴³ Чиркин рюгь, инсандиан удубчӀвиган, шид адрушвариъ либцури, чаз архаинвал абгури шулу, дибрихъиган,

⁴⁴ кӀуру: «Узу утӀубкку йиз хулаз хътабкидиза». Хътабкубдиз хал ичӀиди, ичӀибкнади ва марцц дапӀнади рябкъюру.

⁴⁵ Гьадмуган диди, дубшну, хъана ургубсан жин чахъди хуру, дурар дугъаъ учӀвну яшамиш шулу, ва думу касдиз улихьдитӀан гьамус артухъ пис шулу. Гьациб хьибди гьамусдин хътругъру адмийиризра.

Исайин дада ва чвйир

⁴⁶ Исайи халкьдиз гьаму гафар кӀури имиди, магьа Исайин дадана чвйир дуфну, Дугъахъди гаф-чӀал апӀуз ккунди, чӀат дугъужвнади шулу.

⁴⁷ Ва сар шли-вуш Дугъаз кӀуру: – Магьа Яв дадана чвйир, Увухъди гаф-чӀал апӀуз ккунди, чӀат дийигъна.

⁴⁸ Чаз гьамци гъапириз Исайи кӀуру: – Йиз дада фуж ву ва Йиз чвйир фужар ву?

⁴⁹ Хъа Чан ученикарихьинди хил гьачӀабккну, кӀуру: – Магьа Йиз дада ва Йиз чвйир,

⁵⁰ фицики Аьршарин Йиз Адашдин гаф тамам апӀрур Йиз чвера, чира, дадара вуйиз.