Матта 11 - Гирами Китаб

Штуан апӀру Ягьʼяйин илчйир

¹ Чан йицӀикьюр ученикдиз табшуругъар тувну ккудукӀиган, Иса, дилин удучӀвну, Галилей уьлкейин шагьрариз аьгъювалар улупуз гъягъюру.

^2-3 Дустагъдиъ айи Ягьʼяйи, Месигь Исайин ляхнарикан гъеебхьган, чан ученикарикан кьюр дугъаз гьамци пуз гьау: «Гъюз ккайи Месигь Уву вуна, даршиш жарариз ккилигуча?»

⁴ Исайи дурариз жаваб туву: – Учвуз рябкъюрайиб ва ебхьурайиб вари, душну, Ягьʼяйиз кидибтай:

⁵ кур вуйидариз рябкъюра, ликудар лицура, хамран уьзур кайидарин хам марцц шула, кар вуйидариз ебхьура, гъачӀидар чӀиви шула ва касибариз Ужувлан хабар рабгъура.

⁶ Шли Узʼина вуйи хъугъвал дубградарш, думу бахтавар ву.

Месигьди Ягьʼяйин гьякьнаан шагьидвал апӀура

⁷ Дурар гъушу вахтна Исайи халкьдиз Ягьʼяйикан пуз хъюгъну: – Ягьʼяйихьна ичӀи чюлиз фтиз лигуз гъушнийчва? МикӀлу тӀубччвурайи чӀеъдиз лигуз гъушнинчвахъа?

⁸ Шлиз лигуз гъушунчва дина? Багьа палтар али касдиз? Багьалу палтар алидар паччгьарин дараматариъ ади шулу.

⁹ Дици даш, шлиз лигуз гъушунчва учву? Пайгъамбриз лигуз? Ав, кӀуразачвуз, пайгъамбартӀан аьхюриз лигуз гъушунчва.

¹⁰ Гьадму Ягьʼяйикан ву гьамци дибикӀнайиб: «Магьа, Яв улихьди Узу Йиз кас гьаъраза: дугъу Яв улихь Яв рякъ ккабалгиди».

¹¹ Дюзди кӀуразачвуз: жиларин зиин дишагьлийикан гъахьидарик штуан апӀру ЯгьʼятӀан зурба кас гъахьундар, хъа Аьршарин Паччагьлугъдиъ айидарикан варитӀан бицӀир думутӀан зурба ву.

¹² Штуан апӀру Ягьʼяйин вахтарихъанмина гьамусдиз Аьршарин Паччагьлугъ, саспидар дидиъ гужниинди учӀвуз чалишмиш шулашра, мюгькамди артмиш шула.

¹³ Фицики Ягьʼя гъяйиз вари пайгъамбрари ва Мусайин къанунди мидкан улихь ккимиди дупна.

¹⁴ Учвуз ккундуш, Гирами китабариъ дупнайиси, дуфну ккуни Илʼяс пайгъамбар Ягьʼя ву.

¹⁵ Ебхьуз ибар кайидариз гъит ебхьри!

¹⁶ Хъа гьаму заманайин насил шлихь тевза?

¹⁷ Дурар, чиб-чпиз чӀигъар апӀури, раццариъ гьамци кӀури деънайи бицӀидариз ухшар ву: «Учу учвуз швутӀрамар йивури гъахьунча, хъа учву ялхъвнаркьан гъапӀундарчва; учу учвуз ишлар апӀури гъахьунча, хъа учву ишузкьан гъишундарчва».

¹⁸ Ягьʼя гъафну, дугъу ипӀурдайи ва убхъурдайи, дурари дугъаз «Дугъаъ жин а» кӀуйи.

¹⁹ Инсаниятдин Бай гъафну, Дугъу ипӀуру ва убхъуру, ва дурари Дугъаз: «Лигай, магьа уьж ва пияниска, налукар гъюдюхрударинна гунагькрарин дуст», кӀура. Аькьюллувал ляхнариинди улупну ккун.

Хътругъру шагьрар

²⁰ Хъасин Исайи вартӀан гизаф Чав аьламатар улупу шагьрариз тягьнийир йивуз хъюгънийи, гьаз гъапиш дурари чпин гунгьар гардандиъ гъидисундайи.

²¹ – Гьял пис хьибдияв, Хоразин! Гьял пис хьибдияв, Вифсайда! Учвуз Узу улупу гьяйбатар Тириз ва Сайдайиз гъяркънийиш, дурарин агьалйири ухдитӀан, чпихъ яснан палтар хъахьну ва кӀулʼин рюкъ алабхьну, тахсрар чпин гардандиъ дисидийи.

²² Амма кӀуразачвузки: суддин йигъан учвузтӀан Тиризна Сайдайиз рягьятди хьибди!

²³ Хъа увура, Кафернагьум, аьршаризкьан за хьибдиза кӀурайна? Ваъ, гурбагуриъ абхъдиву, фицики учвухь улупу аьламатнан ляхнар Узу Содомдиъ улупнийиш, думу гьамусра сагъ-саламатди гъубздийи.

²⁴ Гьаддиз кӀуразачвузки, гъиямат йигъан учвузтӀан Содомдин агьалйириз рягьятди хьибди.

Узухьна гъачай, эргвал йивидичва

²⁵ Хъасин Исайи гъапи: «Адаш, заваринна жиларин Агъа! Аьяндрарихьанна аькьюллударихьан гьитӀибкӀнайиб бицӀи касариз ачухъ апӀбаз Увуз чухсагъул!

²⁶ Ав, Адаш, Увуз думу Яв ужувлан ният гьаци дубхьну ккундувуз.

²⁷ Йиз Адашди Узуз вари тувну. Адашдилан гъайри, Бай фуж вуш, саризра аьгъдар, ва БализтӀан гъайри, Адаш саризра аьгъдар. Хъа Бали шлиз ачмиш гъапӀиш, гьадгъаз Адаш аьгъю хьиди.

²⁸ Эргну хъадахънайидар вари Узухьна гъачай, ва Узу учвуз рягьятвал тувдиза.

²⁹ Узу гъюдлир ва фурс ктрур вуза. Йиз табшуругъарин юрккагъ учвʼин иливай ва Узхъан вари дубгъай – архаинвал хьибдичвуз.

³⁰ Гьаз гъапиш Узу учвухьна тувру юрккагъ – ужʼвал ву, ва Узу учвʼин иливру гъагъра пучӀуб ву».