Матта 10 - Гирами Китаб

Исайин йицӀикьюр вакил

¹ Мидин кьяляхъ саб ражари, Чан йицӀикьюр ученикдиз Чахьна дих дапӀну, инсанарикан жинар ктауз ва гьарсаб уьзур ва гьарсаб иццрушин сагъ апӀуз кӀури, Исайи дурариз жинарин зиин гьюкум тувру.

² Магьа йицӀикьюр ученикдин ччвурар: сарпир Петр кӀури шлу Симон ва дугъан чве Андрей, Зеведейин бай Якьубна дугъан чве Югьан,

³ Филип ва Варфоломей, Фома ва налукар уч апӀру Матта, Алфейин бай Якьуб ва Фадей,

⁴ Шимон Кананит ва кьандиси Иса масу туву Искариот лакӀам хъайи Ягьуда.

ЙицӀикьюр ученикдиз табшуругъ

⁵ Гьаму йицӀикьюр кас Исайи, гьамциб насигьят тувну, гьаъру: – Жугьдар дарудар яшамиш шулайи йишвариз мягъянай ва Самарияйин саб шагьриъкьан муучӀванай;

⁶ хъа улдугну чарвйирси айи Израил халкьдихьна гъарахай,

⁷ ва варишвариъ лицури, аьгъювалар улупури, Аьршарин Паччагьлугъ улубкьура кӀури, хабар тувай.

⁸ Иццурайидар сагъ апӀинай, гъийихдар чӀиви апӀинай, жузам кайидар марцц апӀинай, жинар кучӀвнайидарикан кадаай; чӀанади гъадабгъуб, чӀанади тувай.

^9-10 Кьялʼан идибтӀру чӀулиъ ивну, жвувахьди гъизилин, арсран, ясана йифрин пул, я тавра, я кьюб жар палат, я ликариин алахьрудар, ясана чумакъ рякъюз магъадабгъанай. Фицики лихрур ипӀрубдиз лайикьлу ву.

¹¹ Учву фуну шагьриъ вая гъулаъ учӀвишра, душваъ лайикьлу вуйи касдихь дергай ва, дилин удучӀвну гъягъяйиз, гьадгъан хулаъ гъузай.

¹² Хъа хулаъ учӀвруган, хулан эйсийиз гьамци салам тувай: «Яв хулаъ мясляаьт ибшрияв».

¹³ Эгер думу хал лайикьлу вуш, душваъ мясляаьт убчӀвди. Эгерки думу хал лайикьлу даршиш, ичв мясляаьт учвухьна кьяляхъ хътабкиди.

¹⁴ Хъа эгер шли учву кьабул дарапӀиш ва учвухъ хъпебехъиш, дугъан хулʼан вая гьадму шагьриан удучӀвурайиган, ичв ликарик кайи биширугра кмиди кадабхьай.

¹⁵ Гьякьди кӀуразачвуз: гъиямат йигъан, Содомна Гоморра шагьрариз гьадму шагьризтӀан ужу хьибди.

Улукьуз ккимбу хъергбар

¹⁶ Магьа Узу учву жанаврарихьна гьаърайи марччарси гьаъраза: битӀарси фагьумлудар ва луфарси аьмал кадрудар йихьай.

¹⁷ Адмийирихьан ихтият апӀинай, фицики дурари учву судариз гъахиди ва чпин мистариъ урччвиди.

¹⁸ Ва, учву Йиз ученикар ву кӀури, гьякимдрарихьна ва паччгьарихьна гъахиди, дураринна аллагьсузарин улихь Узкан шагьидвал апӀбан бадали.

¹⁹ Учву гъидисган, учву фу ва фици кӀуруш, дидин гъайгъушнаъ махьанай, фицики гьадму арайиъ, учву фу дупну ккундуш, учвуз дишлади ачмиш апӀиди,

²⁰ фицики думу учву ваъ, хъа учвуъ айи ичв Адашдин Рюгьну пиди.

²¹ Чвуччву чве йикӀуз масу тувди, хъа адашди – бай. Веледари, абйир-бабариз къаршу удучӀвну, дурар йихиди.

²² Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапӀиш, думу дюрхну хьиди.

²³ Саб шагьриан учву утӀуккруган, жара шагьриз жаргъай. Фицики дюзди кӀуразачвуз: учву Израилин вари шагьрар-гъуларилан илдицну ккудубкӀайиз, Инсаниятдин Бай гъиди.

²⁴ Ученик чан мялимтӀан заан дар, ва гьич сар гъуллугъчира чан агъатӀан заан дар.

²⁵ Ученик – чан мялимсир, хъа гъуллугъчи чан агъасир гъахьиш, рази духьну ккун.

Шилхьан гучӀ дапӀну ккунду

²⁶ Гьаци вуйиган, адмийихъан гучӀ мапӀанай: учв ачухъ даршлу гьич саб гьитӀибкӀуб адар ва ашкар даршлу гьич саб жиниб адар.

²⁷ Узу учвуз мучӀушнаъ кӀурайиб аквнахь йипай, ва Узу ичв ибахъ гъапиб гъваълан атӀабгну йипай.

²⁸ Беден йибкӀрударихьан гучӀ мапӀанай, фицики дурарихьан рюгь йикӀуз шулдар; хъа ичв беденра дубкӀну, жегьеннемдиъ ичв рюгьра пуч апӀуз Удукьрурихьан гучӀ апӀинай.

²⁹ Саб кепкихъ кьюб гъуланжакьв масу тувдаринхъа? Ичв Адашдиз даккунди дурарикан гьич сабра жилʼина абхъидар.

³⁰ Ичв кӀулʼин али чӀарарра кмиди Дугъу гьисаб дапӀна.

³¹ Гьаддиз гучӀ мапӀанай: гизаф гъуланжакьвартӀан учву заан вучва.

Месигьдин аьгъювалар

³² Гьаддиз Узу адмийирин улихь кьабул гъапӀу гьарсар кас Узура Йиз Адашдин улихь кьабул апӀидиза.

³³ Хъа шли Узу адмийирин улихь кьабул дарапӀиш, думу Узура Йиз Адашдин улихь кьабул апӀидарза.

Узуз лайикьлу вуйир

³⁴ Учву фикир мапӀанайки, Узу жилиина мясляаьт хуз Дуфнайир ву кӀури; Узу мясляаьт хьади ваъ, хъа дяви хьади Дуфнайир вуза.

³⁵ Фицики Узу адашдихьан – бай, дадайихьан – риш, сижарихьан – швушв жара апӀуз дуфназа.

³⁶ Ичв хизандиъ айидар учвуз вартӀан пис душмнар хьиди.

³⁷ УзутӀан чан адаш вая дада артухъ ккун гъапӀур Узуз лайикьлу вуйир дар; ва УзутӀан чан бай вая риш артухъ ккун гъапӀур Узуз лайикьлу дар.

³⁸ Хъа фуж, хач чан кьялʼин алди, Йиз кьяляхъди дарфиш, гьадмура Узуз лайикьлу дар.

³⁹ Шли чан уьмур уьбхюз чарйир гъизигиш, дугъан думу дубгди, хъа Узу бадали чан уьмур пуч гъапӀуриз ккудудубкӀру уьмур хьибди.

Пешкеш

⁴⁰ Учву кьабул апӀрури Узу кьабул апӀура, хъа Узу кьабул апӀрури Узу му дюнʼяйиз Гьаур кьабул апӀура.

⁴¹ Пайгъамбар, думу пайгъамбар хьпаз лигну, кьабул апӀруриз пайгъамбризсиб пешкеш хьибди, ва дугъри кас, думу дугърир хьпаз лигну, кьабул апӀруриз, дугъри касдиз туврубсиб пешкеш хьибди.

⁴² Хъа шли, Йиз ученик хьпаз лигну, гьаму бицӀисдарикан сарнуриз саб кӀифкьан мичӀли шид тувиш, гьякьди кӀуразачвуз, дугъаз чан пешкеш хьибди.