Матта 1 - Гирами Китаб

Месигь Исайин ата-бабйир

¹ Магьа Ибрагьимдин наслиан вуйи, Давудрин тухмиан вуйи Месигь Исайин ата-бабйир:

² Ибрагьимдиз Исакь кӀуру бай гъахьну, Исакьдиз Якьуб, Якьубдиз Ягьудана дугъан чвйир гъахьну;

³ Ягьудайиз Тамар кӀуру хпирикан Перецна Зерагь гъахьну, Перецдиз Гьецрон, Гьецрондиз Арам гъахьну;

⁴ Арамдиз Амминадаб, Амминадабдиз Нецрон, Нецрондиз Салман гъахьну;

⁵ Салмандиз Рагьабдикан Воаз, Воаздиз Рутдикан Обед, Обеддиз Ессе гъахьну;

⁶ Ессейиз Ягьудия уьлкейин паччагь гъахьи Давуд гъахьну. Давудриз сифте Урияйихь хьади гъаши хпирикан Сулейман гъахьну;

⁷ Сулеймандиз Ригьаб, Ригьабдиз Абия, Абияйиз Аса гъахьну;

⁸ Асайиз Юсафат, Юсафатдиз Юрам, Юрамдиз Уззия гъахьну;

⁹ Уззияйиз Ятам, Ятамдиз Агьаз, Агьаздиз Гьизкия гъахьну;

¹⁰ Гьизкияйиз Манассей, Манассейиз Амон, Амондиз Яшия гъахьну;

¹¹ Яшияйиз (жугьдар Вавилондиз адау девриъ) Ехония гъахьну;

¹² Ехонияйиз (Вавилондиз адаъхъан) Шалтиэл, Шалтиэлиз Зеруббабел гъахьну;

¹³ Зеруббабелиз Абиуд, Абиуддиз Элияким, Элиякимдиз Азор гъахьну;

¹⁴ Азориз Садок, Садокдиз Агьим, Агьимдиз Элиуд гъахьну;

¹⁵ Элиуддиз Элизар, Элизариз Маттан, Маттандиз Якьуб гъахьну;

¹⁶ Якьубдиз, Месигь Иса гъапӀу Марʼямдин жилир Юсуф гъахьну.

¹⁷ Гьаму саягъниинди, Ибрагьимдилан гъадабгъну Давудриина гъяйиз йицӀиюкьуб насил, Давудрилан гъадабгъну Вавилондиз адаайиз йицӀиюкьуб насил ва Вавилондиз адаъхъан Исайиина гъяйизра йицӀиюкьуб насил шула.

Месигь бабкан хьуб

¹⁸ Месигь Иса гьамци бабкан гъахьну: Дугъан дада Марʼям Юсуфдиз хъирснайи. Марʼямдик швуваз гъягъяйиз Гирами Рюгьналан бицӀир кади шулу.

¹⁹ Хъасин дугъан жилир гъахьи Юсуфдиз, учв гьялал кас вуди хьпаз лигну, Марʼямдикан чӀуру аваза ипуз даккунди, чан дирчу лишнар жиниди кьяляхъ апӀуз ккун шулу.

²⁰ Дугъу гьамциб хиял гъапӀиган, нивкӀукди дугъахьна Агъайин малайик дуфну, гьамци гъапну: «Давудгъярин бай Юсуф! Марʼям хпирди гъадагъуз гучӀ мапӀан, фицики Дугъак кайи БицӀир Гирами Рюгьналан ву.

²¹ Марʼямди Бай апӀиди ва Дугъʼин Иса кӀуру ччвур иливидива, фицики Дугъу Чан халкь гунгьарихьан уьрхиди».

²² Хъа вари гьаму ляхнар Агъайи Пайгъамбрин мелзналан гъапи исихъайи гафар кӀулиз удучӀвуз тамам духьнайидар ву:

²³ «Магьа, шурак БицӀир киршди, Бай апӀиди ва Дугъʼин Эммануил, яна „Ухьухъди Аллагь хъа“, кӀуру ччвур иливиди».

²⁴ НивкӀʼан хъиргиган, Юсуфди Агъайин малайикди гъаписи апӀуру, дугъу Марʼям хпирди гъадагъуру.

²⁵ Амма Марʼямди чан сарпи Бай апӀайизкьан, Юсуф дугъахь гьучӀври гъахьундар; хъа Бай гъашиган, Дугъʼин Иса кӀуру ччвур иливуру.