Марк 9 - Гирами Китаб

¹ Хъа Исайи кӀуру – Гьякьди кӀуразачвуз: мушвʼин дийигънайидарикан сакьюдариз чпин аьжал хъубкьайиз Аллагьдин Паччагьлугъ гьубкӀну чан кьувватнаъ ади рябкъиди.

Исайин Мусайихъдина Илʼясдихъди сюгьбат

² Йирхьуд йигълан Иса, Чахъди Петрна, Якьубна, Югьан гъадагъну, ягъли дагъдиина хъади гъягъюру. Душвʼин жара кас алдайи. Хъа Иса дурарин улихь дигиш шулу.

³ Дугъан палтар, улин нур гъабхури, кьадар адрубкьан лизи шулу – гъурччну пну, гьич сарихьан дици лизи апӀуз даршлийи.

⁴ Дурарин улихьна Исайихъди гафар апӀурайи Илʼясна Муса ачмиш шулу.

⁵ Хъа Петри Исайихьинди илтӀикӀну кӀуру: – Мялим! Учуз мушвахь ужуди вучуз! Гъач, шубуб паж апӀуча: саб Увуз, саб Мусайиз ва саб Илʼясдиз.

⁶ Петри мици, фу кӀуруш ва гьапӀруш аьгъдрури, гъапиб вуйи, фицики ученикариз яман гучӀ дубхьнайи.

⁷ Гьадмуган диф арайиз гъюру ва диди дурар чан сирникк ккаъру, хъа дифрагъян сес шулу: «Му Йиз масан Бай вуйиз. Гьамгъахъ хъебехъай!»

⁸ Гьадму сяаьт дурар вари терефаризди лигуру, амма дурариз чпин багахь Исайилан гъайри фужкӀа гъяркъюндайи.

⁹ Дурар дагъдилан гъюруган, Исайи Чан ученикарикан чпиз гъябкъюбдикан, Инсаниятдин Бай дукӀну чӀиви хьайиз, саризра даркӀуб, ккун апӀуру.

¹⁰ Дурари му гьядиса чпин арайиъ гъибтру, аммаки дурар чиб-чпигъ: «ЧӀиви дархьикьан гагьди», – фу кӀуру гафар вуйкӀан, кӀури, улхурайи.

¹¹ Дурари Исайихьан гьерхру: – Къанунчйири сифте Илʼяс дуфну ккунду гьаз кӀура?

¹² Исайи дурариз жаваб тувру: – Ав, дугъридан, Илʼясди, улихьмиди дуфну, вари ккабалгну ккунду. Хъа Гирами китабариъ Инсаниятдин Балкан Дугъʼин гизаф аьзабар улуркьиди ва Думу ужуз апӀиди кӀури, гьаз дибикӀна?

¹³ Хъа Узу учвуз кӀуразачвуз: Илʼяс гъафну, ва дугъкан чпиз ккуниб гъапӀну. Гьаци дибикӀна Гирами китабариъра.

Исайи иццурайи бай сагъ апӀуб

¹⁴ Дурариз, имбу ученикарихьна гъафиган, дурарилан халкь илтӀишну, гьюжатар апӀурайи къанунчйир рякъюру.

¹⁵ Гьадму сяаьт Иса гъяркъю халкь аьжайиб шулу ва, Думу тебрик апӀури, Дугъахьна жаргъуру.

¹⁶ Исайи ученикарихьан гьерхру: – Фтин кӀуллан мурарихъди гьюжатар апӀурачва?

¹⁷ Халкьдигъян сар касди жаваб тувру: – Мялим! Увухьна йиз бай духназа. Дугъаъ чиркин рюгь а. Диди дугъахьди гафар апӀуз гъитрадар.

¹⁸ Жин алабхъруган, думу жилиина гатӀахьури шулу, кӀвантӀаригъна каф гъядапӀуру ва, сппар илчӀигури, жан дичӀибгну дебккру. Узу яв ученикарихьан думу жин утӀубккуб ккун гъапӀунза, хъа дурарихьан гъабхьундар.

¹⁹ – Эй хътругъру инсанар! – кӀуру гьадмуган Исайи. – Узу учвухъди филадизкьан гъузди кӀурачва?! Узу учву филадиз аьгь апӀуза?! Думу Узухьна аькъинай!

²⁰ Бай Дугъахьна хуру. Жинди, Иса гъяркъюбси, бай жилиина гатӀархьуз гъитру ва кӀвантӀаригъна каф гъютӀубччвну, мина-тина диргъуз гъитру.

²¹ – Мици дубхьну мугъан гизаф вахт вуйин? – гьерхру Исайи дугъан адашдихьан. – БицӀидихъанмина, – жаваб тувру дугъура.

²² – Гизаф ражари жиндиз думу пуч апӀуз ккун гъабхьну: саспиган цӀигъна гатӀархьури, саспиган – штуз. Хъа эгер Увхьан фукӀа-мукӀа апӀуз шулуш, ич язухъ зиг, кюмек апӀин!

²³ – Фу кӀуру гаф ву «Эгер шулуш?!» – кӀуру дугъаз Исайи. – Хъугъвал айирихьан вари шулу.

²⁴ Балин адашди ишури кӀуру: – Хъугъурза! Хъа узхьан хъугъуз шулдарш, кюмек апӀин!

²⁵ Халкь Чахьна гъюри дябкъну, Исайи чиркин рюгьназ буйругъ тувру: – Ебхьуз гъидритру ва чӀал бисру жин, Узу увуз буйругъ тувраза: удубчӀв дугъʼан ва сану муубчӀван!

²⁶ Жин, балин жан яманди дутӀубччвну, чӀигъар апӀури, удубчӀвуру. Думу дукӀнайирси дитнайи, ва гизафдари думу гъакӀну кӀуйи.

²⁷ Хъа Исайи думу, хилхъан дидисну, заъру, ва бай гъудужвуру.

²⁸ Иса хулаз гъафиган, Дугъахъди гъузу ученикари гьерхру: – Хъа учхьан думу утӀубккуз гьаз гъабхьундайи?

²⁹ – Мицдар жинар ккарагбииндитӀан утӀурккуз шлудар дар, – гъапи Исайи.

Исайи Чан аьжаликан пуб

³⁰ Душвʼан удучӀвдар Галилей уьлкейиантина гъягъюру. Исайиз мидкан жарадариз аьгъю дубхьну ккундайи,

³¹ гьаз гъапиш Дугъаз Чан ученикариз аьгъювалар улупуз ккундийи. Дугъу дурариз гъапнийи: – Инсаниятдин Бай багарихьди инсанарин хилиз тувди ва йикӀиди. Думу йикӀиди, амма шубуд йигълан чӀиви хьиди.

³² Дурар Исайи гъапибдин гъаври шуладайи, хъа Дугъхьан гьерхуз гучӀуйи.

Исайи аьхюрикан пуб

³³ Дурар Кафернагьумдиз гъюру. Хулаъ айиган, Исайи ученикарихьан гьерхру: – Мина гъюрайиган, гьюжатар гьапӀрудар вуйичв?

³⁴ Дурар ккебехъну гъузу, гьаз гъапиш рякъюъ айиган дурари, чпикан гъуллугъниинди фуж аьхюр вуш, гьюжат гъитӀибккнайи.

³⁵ Иса деъру, Чахьна ЙицӀикьюриддизра дих дапӀну кӀуру: – Шлиз учв сарпирди духьну ккундуш, гъит думу варитӀан аьхиримжир ишри ва варидарин лукӀ ишри.

³⁶ Дугъу бицӀир гъадагъну, дурарин кьялаъ дерккру ва, хабаъ тӀаъну, ученикарихьинди кӀуру:

³⁷ – Шли Узу бадали гьамцдар бицӀидарикан саркьан кьабул гъапӀиш, дугъу Узу кьабул апӀура. Хъа шли Узу кьабул гъапӀиш, неинки Узу кьабул апӀура, хъа гьацира – Узу Гьаурра.

Ухьуз къаршу дарур ухьхъанди ву

³⁸ – Мялим, – кӀуру Дугъаз Югьанди, – учуз Яв ччвурниинди жинар утӀурккурайи сар кас гъяркъюнчуз, ва учу дугъаз, ухьухъди хътруган, гъадагъа гъапӀунча.

³⁹ Исайи жаваб туву: – Машат мапӀанай дугъаз. Шли Йиз ччвур дибисну, аьламат улупиш, думу Узкан чӀуруди улхидар.

⁴⁰ Фуж ухьуз къаршу дарш, думу ухьхъанди ву!

⁴¹ Шли учвуз, Месигьдин ученикар вуди хьпаз лигну, саб кӀиф шид тувиш, хъугъай Узухъ, дугъаз чан пешкеш хьибди.

⁴² Хъа шли саркьан гьамцдар аьдатидарикан ва зяифдарикан хъугъувалихъан хътаиш, дугъаз чан гардандиъ рягънин ахал ипну, гьюлизди гатӀархьнийиш, ужу шуйи.

⁴³ Эгер яв хили уву тямягьнахьна гъахураш, хъадабтӀ думу! Увуз саб хил хъади женнетдиъ учӀвуб ужу ву, кьюб хил хъади зат ктӀрубшвру цӀа айи жегьеннемдиъ ахъайиз. [

⁴⁴ ]

⁴⁵ Эгер яв ликри уву тямягьнахьна гъахураш, ккадабтӀ думу! Увуз саб лик ккади женнетдиъ учӀвуб ужу ву, кьюб лик ккади жегьеннемдиъ ахъайиз. [

⁴⁶ ]

⁴⁷ Эгер яв ули уву тямягьнахьна гъахураш, адабгъ думу! Увуз саб ул ади Аллагьдин Паччагьлугъдиъ учӀвуб ужу ву, кьюбиб уларра амиди жегьеннемдиъ ахъайиз.

⁴⁸ Душваъ зат дийийигъди мялхъвяри итӀури шулу ва ктӀрубшвру цӀигъ ургури шулу.

⁴⁹ Гван кьилахьди тартиб апӀруганси, гьарсар цӀихьди марцц апӀиди.

⁵⁰ Кьил ужуб мутму ву. Хъа эгер кьилан кьилзишин гъудубгиш, фти думу кьилзи апӀидичва. Учвук кьил кади йибхьай! Ва сар-сарихьди мясляаьтнаъ йихьай.