Марк 6 - Гирами Китаб

Иса Чан гъахи шагьриз гъягъюб

¹ Душвʼан удучӀву Иса Чан гъахи шагьриз гъягъюру. Дугъахъди Чан ученикарра хъайи.

² Султ йигъан Исайи мистаъ аьгъювалар улупуз хъюгъру. Дугъахъ хъпехъурайи гизафдари, мюгьтал духьну, кӀуйи: – Гьамгъан гьаму аьгъювалар наънан ву? Мугъаз мициб фагьум шли тувна? Гьамцдар аьламатнан ляхнар Гьамгъан хилариинди фици шула?!

³ Му харатчи уста, Марʼямдин Бай, Якьубдин, Юсуфдин, Ягьудайин ва Симондин чве дарин? Мугъан чйир гьамшваъ, ихь арайиъ, адаринхъа? Гьаци вуйиган, дурариз Исайихъ хъугъуз ккунди адайи.

⁴ – Гьюрмат адру пайгъамбар хьуб мумкин дар, – кӀуру Исайи, – хъа чан багъри шагьриъ ва хулаъ, жвуван багахьлуйиригъ ва хизандиъ пайгъамбриз гьюрмат ади шулдар.

⁵ Гьаддиз Дугъхьан душваъ, сакьюдар иццурайидариин хилар иливну сагъ гъапӀдар ктарди, сану сабкьан аьламат улупуз гъабхьундайи.

⁶ Думу дурарин хътругърайивалиин мюгьтал духьнайи. Хъасин Думу гъулʼан-гъулаз гъягъюри, адмийириз аьгъювалар туври шулу.

⁷ Исайи Чахьна йицӀикьюрид вакилариз дих дапӀну, дурариз чиркин рюгьяр утӀурккуз шлу гьюкум тувну, кью-кьюрди аьгъювалар улупуз гьаъру.

⁸ Дугъу дурариз, чумакъ ктарди, фукӀара гъададабгъуз амур апӀуру: я уьл, я тавра, я пул –

⁹ анжагъ чпин ликариин али шаламартӀан. – Я гьич саб жара палатра магъадабгъанай, – кӀуру Исайи дурариз. –

¹⁰ Учву фунуб гъулаъ кьабул гъапӀиш, гьадму йишвариан гъягъяйизкьан, гьадушваъ гъузай.

¹¹ Хъа учву фунуб йишваъ-вушра кьабул дарапӀиш ва учвухъ хъпебехъиш, душвʼан удучӀвну гъягърудари, ичв ликарик кайи бишируг кадабхьай. Гъит му дурариз чпиин улубкьрубдин улихьмиди дебккрайи лишан ибшри.

¹² Дурар гъягъюру ва, адмийир чпин гунгьариин швумал хьпан бадали, дурариз аьгъювалар улупуру.

¹³ Дурари гизаф жинар утӀурккуру ва, хифарин ччим ктатури, хайлин иццурайидар сагъ апӀуру.

Гьирод паччагьди, Иса штуан апӀру Ягьʼя ву кӀури, гьисаб апӀуб

¹⁴ Чан нубатнаъ Исайикан Гьирод паччагьдиз ебхьуру, гьаз гъапиш Дугъан аваза варишвариъ атӀабгуру. ГьацӀари: «ДукӀнайи штуан апӀру Ягьʼя чӀиви гъахьну ва гьаддиз аьламатар улупура» – кӀуйи.

¹⁵ Жарадари: «Думу Илʼяс ву» – кӀуйи, хъа шубурпидари: «Думу кюгьне пайгъамбрарикан сарсир ву» – кӀури тасдикь апӀуйи.

¹⁶ Гьамци гъеебхьу Гьиродди: «Узу кӀул алдабтӀу Ягьʼя чӀиви гъахьну» – гъапнийи.

Штуан апӀру Ягьʼя йикӀуваликан

¹⁷ Гьиродди чав буйругъ тувну, Ягьʼя дидисну, чан чве Филипдин хпир Иродиадайин кӀуллан дустагъдиъ итру. Хъасин Гьиродди Иродиада чаз шивди дитнийи.

¹⁸ Фицики Ягьʼяйи Гьироддиз: «Яв чвуччвун хпир увуз хай шулдар» – гъапнийи.

¹⁹ Гьамци гъапну кӀури, Иродиадайи Ягьʼяйиин хъял иливнийи ва дугъаз думу йикӀуз ккун гъабхьнийи, амма шуладайи,

²⁰ гьаз гъапиш Ягьʼяйихьан Гьироддиз гучӀуйи, фицики дугъаз думу гьякьлу ва гирами кас вуйивал аьгъяйи ва, гьаддиз, думу уьрхюрайи. Гьирод Ягьʼяйин аьгъювалар улупбахъ, саспиган дурарикан учв инжик шулушра, иштагьниинди хъпехъуйи.

²¹ Ужуб дюшюш ккабхъру: Гьироддин бабкан гъахи йигъ улубкьну ва гьаддиз гюре гешт хъапӀуз ханар-беглар, юзбашйир ва Галилей уьлкейин аьхюдар уч апӀуру.

²² Думу шадлугъназ ялхъвнар апӀуз Иродиадайин ришра гъюру. Дугъан ялхъван Гьироддиз ва хялариз гизаф бегелмиш шулу ва паччагьди шураз кӀуру: – Узкан увуз фу ккундуш вари туварзавуз! –

²³ Хъа паччагьди ху апӀуру. – Фу ккун гъапӀиш, вари тувурзавуз, гьеле йиз айи паччагьлугъдин гьацӀ пай вушра.

²⁴ Думу шуру душну дадайихьан гьерхру: – Фу ккун апӀуза? – Штуан апӀру Ягьʼяйин кӀул, – жаваб тувру Иродиадайи.

²⁵ Шуру, паччагьдихьна душну: – Узуз штуан апӀру Ягьʼяйин кӀул ленгерийиъди ккундузуз, думу узуз гьаму сяаьт ча! – кӀуру.

²⁶ Паччагь яманди пашман шулу, хъа чав хяларин улихь ху апӀбаз лигну, дугъхьан, ккун гъапӀуб тамам дарапӀди гъибтуз гъабхьундайи.

²⁷ Дугъу дишла эскер гьаъну, чахьна Ягьʼяйин кӀул хуз буйругъ тувру. Эскри дустагъдиъ Ягьʼяйин кӀул алдабтӀуру,

²⁸ ва ленгерийиъди кӀул дубхну, шурахьна тувру, хъа дугъу – дадайихьна.

²⁹ Мидкан аьгъю гъабхьи Ягьʼяйин ученикари дугъан жандак гъадабгъуру ва кивру.

Исайи хьуд агъзур кас тухъ апӀуб

³⁰ Вакилар Исайихьна хътакуру ва Дугъаз чпи гъапӀдарикан ва туву аьгъюваларикан варибдикан ктибтуру.

³¹ Дугъу дурариз кӀуру: – Хъа гьамус, адмийир адру фунуб-вушра йишваз гъягъидихьа, гьадушваъ ялгъузди гъузай ва сацӀиб рягьятвал гъадабгъай. Гьаз гъапиш, дурар айишваъ гизаф халкь айи, дурариз гьеле уьл ипӀузкьан мажал шуладайи.

³² Гьаддиз дурар люткейиъди халват йишваз гъушу.

³³ Гьаци вушра гизафдариз дурар люткейиъди гъягъюри рякъюру, фужар вуш, аьгъю шулу, ва гьюлин гъирагъ вуйибси вари шагьриан адмийир хъергру ва вакилартӀан ухди гъюру.

³⁴ Люткейиан удучӀву Исайиз аьхючӀвеъ халкь рякъюру. Дугъаз дурарин язухъ шулу, гьаз гъапиш дурар марччлихъан хътру марччарси айи. Дугъу дурариз гизаф ляхнарикан ктибтуру.

³⁵ Йигъар хябяхъ шулайи, ва Дугъан ученикари, багахьна дуфну, кӀуру:

³⁶ – Мушвайишв ичӀи йишв ву, ва сарун йигъарра хябяхъ ву, мурар деет, гъит багахь гъулар-хулариз гъарахри, чпиз ипӀруб гъадабгъри.

³⁷ – Учву дурариз ипӀруб тувай, – кӀуру Исайи. – Гьамус учу, душну, дурариз уьл гъадабгъурайин? Ухьу вари саб вазли гъилихишра, гьациб пулихъ дурариз уьл гъадабгъну удудукьур! – кӀуру вакилари.

³⁸ – Учвухь фукьан уьл хьачвухь? – пну, гьерхру Исайи. – Гъарахай, лигай гьеле. Дурар лигуру ва кӀуру: – Хьуб уьлна кьюб балугъ.

³⁹ Гьадмуган Дугъу дурариз, халкь десте-дестеди чру укӀʼин дитай, кӀуру.

⁴⁰ Халкь хьу-хьуцӀур ва варж-варж кас ади, жергйириъди деъру.

⁴¹ Исайи, хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, уьлер гьудутӀну, халкьдиз пай апӀуз ученикарихьна тувру. Дугъу варидаригъна кьюб балугъра пай апӀуру.

⁴² Вари халкьди ипӀуру, тухъ шулу

⁴³ ва балугъаринна уьлин хъригъу кьацӀари йицӀикьюб тавра ацӀру.

⁴⁴ Хъа вари гъипӀдар хьуд агъзур кас вуйи.

Иса штуинди гъягъюб

⁴⁵ Мидин кьяляхъ Исайи, Чав сабан халкь гьаъри имиди, Чан ученикариз люткейиъ эъну, гьатмуну гъирагъдихъ хъайи Вифсайда гъулаз сирнав апӀуб амур апӀуру.

⁴⁶ Халкь деетну, Думу ккарагуз дагъдиз удучӀвуру.

⁴⁷ Хябяхъдин вахт дубхьнайиган, ученикар айи лютке гьюлин гьацӀ кьялариъ айи, хъа Иса сарна-сарди гъирагъдихъ гъузнийи.

⁴⁸ МикӀлаз къаршуди сирнав апӀбу кьувватнахъан душнайи ученикар дяркъну, Иса, акв алабхьуради, гьюлилантина дурарихьна гъягъюру. Думу дурарин люткейиз багахь шулайи.

⁴⁹ Иса гьюлленмина гъюри гъяркъдариан, думу чпиз гьугъубжвурайи гъаранту вушул, пну, варидариан сабпну гьарай утӀубччвуру,

⁵⁰ гьаз гъапиш дурариз, Думу гъяркъюбси, гучӀ гъабхьнийи. Хъа Иса дишла дурарихъди улхуз хъюгъру: – ЮкӀв ижми апӀинай, Узу вуза. ГучӀ мапӀанай! –

⁵¹ пну, дурарин люткейиъ учӀвган, микӀ яваш гъабхьи. Мици хьували дурар хъана артухъ гъах апӀуру.

⁵² Уьлерихъди гъабхьи аьламатнан дурар гъавриъ ахъундайи, ва дурарин юкӀвар курди гъузнийи.

⁵³ Сирнав апӀурайидар Геннисарет юрдназ гъюру.

⁵⁴ Дурар люткейиан эдеубси, гъирагъдихъ хъайидариз Иса аьгъю шулу,

⁵⁵ ва жаргъну душну, варишвариъ мидкан хабар ипру. Думу наан аш деебхьну, дурари гьадина ахнарииндира кмиди иццрудар хуйи.

⁵⁶ Иса наанди гъушишра: гъулариз, шагьрариз, ятгъариина – варишвариъ иццурайидар духну дитуйи ва Дугъкан Чан ккурттарин канчӀарик куркӀузкьан гъитуб тӀалабар апӀуйи. Вари Дугъак куркӀрудар сагъ шуйи.