Марк 4 - Гирами Китаб

Тум убзрурикан тахалус

¹ Исайи хъана гьюлихъ аьгъювалар улупурайи. Дугълан гьадмукьан халкь илтӀибшнайики, Думу люткейиъ эуз мажбур шулу, ва лютке гьюлʼинаси цӀиб хъапӀру, хъа халкь гьюлихъ гъузру.

² Исайи дурариз тахалусариинди гизафдарикан аьгъювалар тувуйи, ва Чан улупбариъ кӀуйи:

³ – Хъебехъай: нежбер тум убзуз удучӀвуру.

⁴ Убзурайиган, гьацӀар удрар рякъюхъ дахьру – дурар, жакьвар дуфну, удуру.

⁵ Сакьюдар удрар гъван ккайи, руг цӀибтӀан алдру йишвʼин дахьру, ва дурар ухди ктучӀвуру, гьаз гъапиш ругдин гъат чӀиллиб вуйи.

⁶ Ригъ гъапӀган, дурар чурхуру ва, ччивар зяифди хьпаз лигну, ерццуру.

⁷ ГьацӀар удрар зазарин тумрягъ гъяхьру, аьхю гъахьи зазари дурар ккаъру, ва дяхни кӀул апӀдар.

⁸ Хъа жара удрар авадан ругдик кахьру, ктучӀвуру, аьхю шулу ва сумчӀур, йирхьцӀур ва варж ражари артухъ бегьер тувру.

⁹ Хъасин Исайи гъапи: – Шлин ибариз ебхьураш, гъит ебхьри!

Исайи тахалусдин мяна ачухъ апӀуб

¹⁰ Чпи ялгъузди гъузиган, йицӀикьюрид ученикарина Исайихъди хъайидари Дугъхьан, гьаз гьамци, тахалусариинди кӀураш, гьерхру.

¹¹ – Учвуз Аллагьдин Паччагьлугъдин сир аьгъю хьуб тувначвуз, – кӀуру дурариз Исайи, – хъа аьгъдрудариз тахалусариинди кӀура.

¹² Фицики дурар лигури шулу, хъа рябкъюрдар, хъпехъури шулу, хъа гъавриъ ахъурдар. Жараси вуйиш, дурарихьан Аллагьдихьинди илтӀикӀуз шуйи ва дурарилан хил алдабгъидийи.

Тум убзрурикан вуйи тахалус ктибтуб

¹³ Хъа Дугъу дурариз кӀуру: – Мегер учву гьаму тахалусдин гъавриъ ахъундарнучва? Хъа учву жара тахалусарин фици гъавриъ ахъдичва?

¹⁴ Убзрури Аллагьдин гаф убзуру.

¹⁵ ГьацӀар адмийир рякъюхъинди дахьу удрариз барабар ву. Дурариз Аллагьдин гаф ебхьуру, ва гьадму сяаьт, иблис дуфну, дурарин кӀваъ гъубзу гаф гьитӀибкӀуру.

¹⁶ ГьацӀар адмийир гъван ккайи йишвʼина ахьу удрариз барабар ву. Дурари, гаф гъеебхьубси, дишла шадди кьабул апӀуру.

¹⁷ Хъа дурарикк ччив ккадар, гьаддиз дурар цӀиб вахтназтӀан вуйидар дар. Аллагьдин гафналантина чпихъ хъергруган, ясана саб хатӀа-бала гъядябхъруган, дурар гьадму сяаьт гафнахьан гьудучӀвуру.

¹⁸ ГьацӀар зазаригъ гъяхьу удрариз барабар ву. Мурар гаф ебхьрудар ву,

¹⁹ хъа гьар йигъандин гъайгъушнари, девлетнахъ хъергували ва жара тямягьари Аллагьдин гаф кӀваълан гьапӀуз гъитру, ва диди бегьер хури шулдар.

²⁰ Хъа гьацӀар авадан ругдик кахьу удрариз барабар ву. Мурар гаф ебхьрудар ва думу кьабул апӀрудар ву, ва диди саспиган сумчӀур ражари, саспиган йирхьцӀур ражари, хъа саспиган варж ражари артухъ бегьер хури шулу.

Учвуз айиб ишлетмиш апӀури гъузай

²¹ Исайи хъана дурариз кӀуру: – Чирагъ хулаз, дидʼин гъаб иливуз, ясана краватдикк ккивуз, хруб вуйин? Ваъ, думу чан йишвʼин дивру!

²² ЧӀатинди удудубчӀвди гъубзру фукӀа жиниб адар ва фукӀара гьитӀибкӀнайиб адар.

²³ Шлик ибар каш, гъит ебхьри!

²⁴ Хъа Дугъу гьамцира кӀуру: – Учвуз ебхьурайибдиз фикир тувай. Фициб уьлчмейиинди учву ебцураш, гьацибдиинди учвузра ебциди ва артухъдира кади иливиди.

²⁵ Шлиз аш, дугъаз хъана тувди, хъа шлиз адарш, айибра тадабгъиди.

Хъубкьру удрикан тахалус

²⁶ Дугъу кӀуру: – Аллагьдин Паччагьлугъ, думу фициб ву? Думу адмийи ругдиз тум гатӀабхьувалсиб ву.

²⁷ Йишвну адми ахуру, йигъ шулади гъудужвуру, хъа тум гьадму вахтна ктубчӀвуру ва аьхю шулу – хъа думу фици аьхю шулаш, адмийизра аьгъдар.

²⁸ Ругди чав-чалан бегьер хуру: сифте чар ктубчӀвуру, хъа кӀул апӀуру, хъасин кӀул удрарихьди абцӀру.

²⁹ Удар хъубкьиган, адми дишла дагьрихъан хъчӀихуру, гьаз гъапиш иган хъубкьна.

Диликан тахалус

³⁰ Исайи хъана кӀуру: – Аллагьдин Паччагьлугъ фтихь тевуз шул? Ясана фициб тахалусдиинди дидкан пуз шул?

³¹ Думу дюнʼяйиин варитӀан бицӀи дилихь тевуз шул.

³² Хъа думу кивган, ктубчӀвуру ва бистниъ айидарик варитӀан аьхю шулу. Дидʼин гьацисдар аьхю кюлер илиршуруки, дурарин сирнарикк жакьварихьанра кмиди дусуз шулу.

³³ Гьамцдар гизаф тахалусариинди Дугъу дурарихьан аннамиш апӀуз шлукьан аьгъювалар улупуйи.

³⁴ Тахалусариинди дарди Дугъу фукӀара кӀурдайи, хъа Учв Чан ученикарихъди гъузиган, дурариз вари ктибтуйи.

Исайи тӀурфан дебккуб

³⁵ Гьадму йигъан хябяхъган, Дугъу дурариз кӀуру: – Гъачай, гьюлин тмуну гъирагъдихъинди сирнав апӀухьа.

³⁶ Дурар, халкь гъитну, Исайихъди люткейиъ эъру. Дурарихъди жара люткйирра хъайи.

³⁷ Гужал микӀ утӀубччвуру ва лепйир люткейикан йивури, думу шту абцӀрайи.

³⁸ Иса люткейин кьялхъян йишваъ, кӀуликк гутара ккивну даахнайи. Люткейиъ айидари Думу хъиргру ва кӀуру: – Мялим! Ухьу ккахьрайиваликан Увуз вижна ктарнуз дарш?!

³⁹ Гьадмуган Думу гъудужвну, микӀлаз сикин хьуз амур апӀуру ва штуз кӀуру: – Сикин йибхь! Мирибшван!

⁴⁰ МикӀ сикин шулу, ва архаинвал абхъру. – Гьаз гьамкьан гучӀбяхяр вучва? – кӀуру дурариз Исайи. – СацӀибкьан хъугъвал адаринчвуз дарш?

⁴¹ Дурарик лап яман гучӀ кабхъру, ва чиб-чпикна кӀуру: – Му фуж ву, эгер микӀра, гьюлра Мугъахъ хъпехъураш?