Марк 3 - Гирами Китаб

Гъеебццу хил хъайир сагъ апӀуб

¹ Иса хъа ражарира мистаз гъюру. Душваъ хил деебццнайи сар кас айи.

² Сакьюдар адмийири, чпиз рябкъюри сар фужкӀа гьаму султ йигъан сагъ апӀидайкӀан, кӀури, ва гьаддилантина тахсир кипуз, Исайихъ ул хъипнайи.

³ Дугъу хил дебццнайи касдиз кӀуру: – Варидарин улихь дийигъ.

⁴ Хъа Исайи гьатмундариз кӀуру: – Султ йигъан гьапӀну ккунду: ужʼвал ясана писвал? Уьмур уьбхну ккундин, дарш пуч дапӀну? Хъа дурар ккебехъну гъузнийи.

⁵ Исайи хъял кади ул дурарилан илбицуру ва, дурарин инсафсуз юкӀвар вуйивалин хажалат зигури, гьадму адмийиз кӀуру: – Яв хил гьачӀабкк. Дугъу хил гьачӀабккуру, ва му хилра гьатмунубси сагъ шулу.

⁶ Хъа фарисйири, удучӀвну, гьадму сяаьт Гьироддин терефкрарихъди, Иса фици пуч апӀуруш, йикьрар йитӀуру.

Ученикар Исайилан илтӀишуб

⁷ Иса Чан ученикарра хъади гьюлихъна гъюру. Дугъахъди гизаф кьадар халкьар Галилей ва Ягьудия уьлкйириан хъайи.

⁸ Дугъу гъапӀкьандарикан деебхьну Ерусалимдиан, Идумея уьлкейиан, Ярдан нирин гьатмуну патариан, Тир ва Сидон шагьраринишвариан гъатар-гъатарди адмийир Дугъахьна ахмиш шуйи.

⁹ Гизаф халкь уч духьнайивализ дилигну, дурарикк Учв ккадрахъбан бадали, Дугъу Чан ученикариз лютке гьязурди гъитуб табшурмиш апӀуру.

¹⁰ Дугъу гизафдар сагъ гъапӀнийи, гьаддиз иццурайидар Гьадгъак кучузкьан шулуш кӀури, Исайилан илтӀишуйи.

¹¹ Гьар ражари жинариз Думу рякърубкьан, дурар Дугъан улихь машнахъди икрамназ дахьуйи ва гьамци кӀури чӀигъар апӀуйи: «Уву Аллагьдин Бай вува!»

¹² Хъа Дугъу ижмишнаан дурариз, Учв фуж вуш, ашкар апӀуб гъадагъа апӀуйи.

ЙицӀикьюр вакил ктагъуб

¹³ Иса, Чав дих дапӀну ктагъдарра, хъади дагъдиина улдучӀвуру.

¹⁴ Дурар йицӀикьюр кас вуйи, Дугъу дурариз Чан вакилар кӀуйи. Дурар Дугъахъди гьаммишан духьну ккундийи. Дугъу дурар Ужувлан хабар рабгъуз гьаъди,

¹⁵ ва дурариз жинар утӀурккуз шлу гьюкум тувди.

¹⁶ Магьа Дугъу ктагъу йицӀикьюр: Симон (Дугъу мугъаз Петр кӀуру ччвур тувнийи),

¹⁷ Зеведейин бай Якьуб ва Якьубдин чве Югьан (Дугъу мурариз «Воанергес», яна «Кьюркьлин цӀин баяр» кӀуру ччвур тувнийи),

¹⁸ Андрей, Филип, Варфоломей, Матта, Фома, Алфейин бай Якьуб, Фадей, Кананит кӀуру лакӀам хъайи Шимон,

¹⁹ ва хъасин Иса масу туву Искариот кӀуру лакӀам хъайи Ягьуда.

Жугьдарин аьхюдари, Исайик жин ка, пуб

²⁰ Мурар хулаз хътакуру. Хъана халкь уч шулу, Исана Чан ученикар ушв гьибтузкьан хъуркьнадайи.

²¹ Дугъан багахьлуйириз мидкан гъеебхьган, дурар дуфну, Иса гужназ мушвʼан хъади гъягъюз ккун шулу, фицики дурари, Думу абдал духьна, кӀуйи.

²² Ерусалимдиан гъафи къанунчйири кӀуйи: – Мугъаъ Велзевул убчӀвна! Мугъу жинар дурарин аьхюрихьан вуйи кьувватниинди ктаура.

²³ Гьадмуган Исайи дурариз Чахьнаси дих дапӀну, тахалусариинди кӀуру: – ШейтӀнихьан шейтӀан фици утӀубккуз шулу?

²⁴ Эгер паччагьлугъдин айитӀ дявйир аш, дициб паччагьлугъ сагъди гъубзидар.

²⁵ Эгер хизандин айитӀ дявйир аш, дициб хизан сагъди гъубзидар.

²⁶ Эгер шейтӀан учв чаина гъедебгнуш, диди чав чахъди дяви гъубхнуш, дидхьан чан-учвди гъубзуз хьибдар – дидин аьхир хьибди.

²⁷ Сарихьанра, гуж кайирин хулаз дуфну, душв тӀараш апӀуз хьибдар – эгер эйси йитӀну адарш; гъийитӀган, хал тӀараш апӀуз шул.

²⁸ Гьякь кӀуразачвуз: адмийири Аллагьдиз фициб къаршу гаф гъапишра, варибдилан хил алдабгъиди,

²⁹ хъа Гирами Рюгьназ къаршу гаф гъапирилан гьич зат, саб вахтнара хил алдабгъидар, дугъан гунагь гьаммишандиз гъубзди!

³⁰ Адмийири: «Мугъаъ жин убчӀвна» кӀурайиган, Исайи гьаци гъапнийи.

Исайин хизан – чан ученикар

³¹ Хъасин Дугъан дадана чвйир гъюру; чӀатинди дугъужвнамиди, дурари Дугъаз гъач пуз гьаъру.

³² Дугълан халкь илтӀибшнайи, ва Дугъаз гъапнийи: – ЧӀат, кючейиъ Яв дада, чвйир ва чйир дугъужвна, Уву гьерхра.

³³ Исайи дурариз жаваб туву: – Йиз дадана чвйир фужар ву? –

³⁴ Чалан илтӀишнайидарилан ул илбицну, Дугъу кӀуру: – Магьа Йиз дада ва чвйир!

³⁵ Аллагьдин гаф тамам апӀрур Йиз чвера, чира, дадара вуйиз.