Марк 16 - Гирами Китаб

Ученикариз Иса чӀиви хьуб аьгъю шулу

¹ Султ йигъ улдукьиган, Магдалайиан вуйи Якьубдин дада Марʼямди ва Саломеяйи Исайин бедендикан ктатуз ицци ниъ хъайи ччимар гъадагъуру.

² Гьяфтайин садпи йигъан, яна элгьетган, гвачӀнин ухди, ригъдин сабпи нурарихьди, дурар накьвдихьна гъюру.

³ – Ухьуз накьвдихьан гъван шли гьадабгъиди, – кӀуйи чиб-чпиз дурари, гьаз гъапиш душвахь гьипнайи гъван гизаф аьхюб вуйи.

⁴ Лигуруш, гъван гьидипна.

⁵ Накьвдиъ учӀвдариз, арччул терефнаъ лизи палтар алди деънайи жигьил рякъюру ва сабпну гучӀ шулу.

⁶ – ГучӀ мапӀанай! – кӀуру дугъу дарариз. – Дариз гъизигу Назаретдиан вуйи Иса учву агурачва. Думу чӀиви гъахьну, мушваъ имдар. Магьа Думу дитну гъахьи йишвра.

⁷ Сарун учву гъарахай, Дугъан ученикариз, иллагьки Петриз, Думу Галилейиъ дурариз ккилигура, йипай.

⁸ Дурар, накьвдиан удучӀвдар, гучӀбаан гьергну гъягъюру. Дурари гьич саризра фукӀара гъапундайи – дурариз гучӀуйи.

Сакьюдар ученикариз Иса рякъюру

⁹ Гьяфтайин садпи йигъан гвачӀинган чӀиви гъахьи Иса сифте чаан ургуб жин утӀукку Магдалайиан вуйи Марʼямдиз ачмиш шулу.

¹⁰ Дугъу мидкан гъам зигурайи ва ишурайи ученикариз хабар дебккру.

¹¹ Хъа дурар Думу чӀиви духьнайивалихъ, му дишагьлийи чаз гъяркъюнзуз гъапнушра, хъугъундайи.

¹² Мидхъан Думу жара суратнаъди дурарикан кьюриз, чпи шагьриан удубчӀвурайи рякъюъ айиган, ачмиш гъахьнийи.

¹³ Дурар кьяляхъ хътакнийи ва мидкан имбударизра хабар дебккнийи. Амма дурар мурарихъра хъугъундайи.

Исайи вакиларихъди гафар апӀуб

¹⁴ Аьхирки, йицӀисар ученик суфрайихъ деъну уьл ипӀурайиган, Иса Учв ачмиш шулу ва, кӀван курвализ ва хътругъувализ дилигну, Дугъу дурариз тягьна йивуру, гьаз гъапиш дурар Думу чӀиви духьну гъяркъдарихъ хъугъундайи.

¹⁵ Дугъу дурариз кӀуру: – Вари дюнʼя вуйиси гъарахай ва Ужувлан хабар вари инсаниятдиз дебккай.

¹⁶ Шли, хъугъну, штуан апӀувал кьабул гъапӀиш, думу женнетдиъ ахъди, хъа фуж хътругъиш, думу жегьеннемдиъ итди.

¹⁷ Хъугъдарихьан аьламатар улупуз хьибди: дурарихьан Йиз ччвурниинди жинар утӀурккуз хьиди, цӀийи чӀалариинди кӀури хьиди.

¹⁸ Эгер битӀ гъибисиш, ясана агъу гъубхъиш, дурариз саб зарарра хьибдар; иццрудариин хилар иливиди – ва дурар сагъ хьиди.

¹⁹ Гьамци дупну, Агъа Иса завариз за шулу ва Аллагьдин арччулну хилихъ деъру.

²⁰ Хъа дурар гъягъюру ва варишвариъ Ужувлан хабар рабгъуру. Дурарин му ляхниз Агъайи кюмек апӀуру, ва дурари улупру аьгъювалар аьжайиб лишнариинди мюгькам шуйи.