Марк 15 - Гирами Китаб

Пилатди Исайихьан силис гъадабгъуб

¹ ГвачӀнин ухди аьхю маллйир, агъсакълар, къанунчйир ва вари заан диванханайин членар мажлисдиз уч шулу ва къарар адабгъуру. Иса, хилар йитӀну, духну, Пилатдин хилиз тувру.

² Пилатди Дугъхьан гьерхру: – Уву «жугьдарин Паччагь» вуна? – Увура гьаци кӀурадарна, – пну, жаваб тувру Исайи.

³ Аьхюну маллйири Дугъак гизаф тахсрар кирчуйи,

⁴ гьадмуган Пилатди Дугъхьан хъана гьерхру: – Уву гьаз жаваб туврадарва! Лиг, Увук фукьан тахсрар кирчраш.

⁵ Амма Исайи дугъазра фукӀа гъапундайи, хъа Пилат мидʼин гизаф мюгьтал гъахьнийи.

Пилатдин Иса азад апӀуз дав чалишмишʼвалар

⁶ Халкьдин тӀалабназ лигну, Пасхайин машкварган дурари ккун гъапӀу сар дидиснайир деетру аьдат ади гъабхьнийи.

⁷ Наразивалар ахьнайиган, адми йивну гъачӀи, гъалабулугъ гъитӀибккдарихъди дидиснайи сар Варава кӀурурра дустагъдиъ айи.

⁸ Халкьди, Пилатдихьна дуфну, дугъкан муганайиз айи аьдат тамам апӀуб ккун апӀуру.

⁹ Пилатди дурариз гъапи: – Учвуз ккундуш «жугьдарин Паччагь» деетуза?

¹⁰ Пилатдиз аьхю маллйири Иса бахилвалиан масу тувнайиваликан аьгъяйи.

¹¹ Хъа аьхю маллйири халкь, Варава деетбан бадали, Пилатдикан тӀалаб апӀуз алауру.

¹² – Учву «жугьдарин Паччагь» кӀурайирикан гьапӀза? – кӀуру хъана Пилатди.

¹³ – Думу хачрак карс! – кӀури, чӀигъар апӀуру дурари.

¹⁴ – Фу чӀуруб гъапӀнухъа Мугъу? – кӀуру дурариз Пилатди. Амма дурари имбубсан артухъ чӀигъар апӀуйи: – Думу хачрак карс!

¹⁵ Халкьдиз учв ужур хьузди, Пилатди Варава деетуру, хъа Иса гъирмажарихьди урччвуз гъитну, хачрак карсуз эскрарин хилиз тувру.

¹⁶ Гъаравлари Думу айитӀ гьяятдизди, паччагьдин тахт шлушвазди гъахуру ва эскрарин дестейиз дих апӀуру.

¹⁷ Дурари Дугъʼин аку-элвен халат алабхьну, хъа кӀулʼин зазарикан гъубху тажсиб улубкӀуру,

¹⁸ ва Думу «тебрик» апӀуз хъюгъру: «Яшамиш ишри „жугьдарин Паччагь“!»

¹⁹ Хъасин Дугъан кӀуллан маргъар йивуйи, Дугъак тутйир катӀуйи ва, Дугъан улихь кьамкьарихъди дусну, хътӀерццури, икрам апӀуйи.

²⁰ Чпиз ккунибкьан Исайикан рихшанд дапӀну, Дугъхъан халат хътибтуру ва хачрак карсуз гъахуру.

Хачриин Исайин аьзабар

²¹ Думу дариз зигуз гъахуру. Сар багхьантина гъягъюрайирихьди (Думу гъулʼан гъюрайи Александринна Рауфдин адаш, Киринея кӀурушвʼан вуйи Симон вуйи) Дугъан хач гъабхуз гъитру.

²² Думу Голгофа кӀурушвахьна хуру (илтӀибкӀиган, душван ччвур «Келле» кӀуру гаф ву).

²³ Дугъаз фикрихъан хътаъру дармнар кайи чяхир убхъуз теклиф апӀуйи, хъа Дугъу гъубхъундайи.

²⁴ Думу хачрак карсру. Эскрари, чпиз гьардиз фунуб алабхъуруш, Дугъан палтар пай апӀури, тупут ипру.

²⁵ Иса дариз зигурайиган, гвачӀин сяаьт урчӀвуб вуйи.

²⁶ «Жугьдарин Паччагь» ву кӀури тахсир кипну, гьамци дибикӀнайи кьул Дугъан кӀулихъ кибхнайи.

²⁷ Дугъахъди сатӀиди кьюр гъачагъра дариз гъизигнийи: Дугъхьан сар – арччул, тмунур – гагул терефназди. [

²⁸ ]

²⁹ Душвхьантина гьудучӀвну гъягърудари Дугъаз люкьнар апӀуйи, намуссуз кӀуруганси кӀулар тӀурччвуйи ва кӀуйи: – Эй Аллагьдин хал дабгърур ва шубуд йигъан диврур!

³⁰ Уву Жвуву Жвув уьрх, кудучӀв хачракан! –

³¹ гьамци зивзивар кчӀикьуйи Дугъкан къанунчйирра хъади аьхю маллйири. – Жарадар уьрхюйи, – кӀуйи дурари, – хъа Чахьан Учв уьрхюз шуладар!

³² Месигь, Израилин Паччагь! Ич уларикк, гъит, учуз рякъюри, хачракан кудучӀври – гьадмуган учу Дугъахъ хъугъдича! Гьеле Дугъахъди сатӀиди дариз дизигнайидарра кмиди Дугъак кялхъюйи.

Исайин аьжал

³³ Лисхъантина тап сяаьт шуббаризкьан вари дюнʼяйиин мучӀушин алабхъуру.

³⁴ Хъа сяаьт шубубди Исайи аьхю дихниинди гьарай апӀуру: – Элахи, Элахи, лама шевактани? (яна «Йиз Аллагь, Йиз Аллагь! Гьаз Уву Узу гъитунва?»)

³⁵ Душван багахь дийигънайидарикан бязидари, Дугъан гафар гъеерхьиган, кӀуйи: – Ебхьурайчвуз, Илʼясдиз дих апӀура!

³⁶ Хъа сар кас, жаргъну дуфну, бамбагсибдиз сирке зигуз гъитну, маргълик кибтӀну, Дугъаз убхъуз туври, кӀуру: – Гьамус лигухьа, Му ктагъуз Илʼяс гъюруш – гъюрдарш.

³⁷ Исайи, чӀветӀ дапӀну, рюгь деебтуру.

³⁸ Аллагьдин хулаъ, Гирамишвахь гьибхнайи чарч зиълансина кӀаназкьан кьюб йишвʼина чӀябгъюру.

³⁹ Хачран багахь дийигънайи юзбашийиз, Исайилан фици ил алдабгънуш, рябкъюру ва кӀуру: – Дугъриданна Му Кас Аллагьдин Бай вуйи.

⁴⁰ Душвахь, ярхлаан лигури, сакьюдар дишагьлийирра хьайи. Дурарин арайиъ Магдалайиан вуйи Марʼям, бицӀирнур Якьубдинна Юсийин дада Марʼям ва Саломея айи.

⁴¹ Иса Галилейиъ айиган, мурар Гьадгъахъди ва Гьадгъан гъайгъушнаъ шуйи. Дугъахъди Ерусалимдиз гъафи хъана жара дишагьлийирра мушвахь хьайи.

Исайин беден накьвдиъ ивуб

⁴² Сарун хябяхъ шулайи. Хъа му йигъ, султ йигъан улихь хьимбу жвуми йигъ вуди хьпаз дилигну,

⁴³ жугьдарин заан диванханайиъ кьувват айи, гьацира Аллагьдин Паччагьлугъдиз ккилигурайи Аримафейиан вуйи Юсуфди, кӀубанвал кади Пилатдихьна дуфну, Исайин беден чан ихтиярназ тӀалаб апӀуру.

⁴⁴ Думу гьамкьан ухди йикӀбиин Пилат мюгьтал духьнайи ва, юзбашийиз дих дапӀну, Иса ухди дукӀнаш, гьерхру.

⁴⁵ Юзбашийикан гьаци вуйиб аьгъю дапӀну, дугъу Юсуфдиз дубкӀнайи беден гъадабгъуз ихтияр тувру.

⁴⁶ Дугъу кафан гъадабгъну, беден кадабгъну, дидгъян гъибиржуру ва гъарзариъ утӀубкнайи накьвдиъ ивну, душваз учӀврушвахь гъван гьипру.

⁴⁷ Хъа Магдалайиан вуйи Марʼямна Юсийин дада Марʼям, Думу наан кивраш, лигурайи.