Марк 13 - Гирами Китаб

Исайи Аллагьдин хал дабгъруваликан пуб

¹ Иса Аллагьдин хулʼан удучӀвурайиган, ученикарикан сари Дугъаз кӀуру: – Мялим, лиг, фицдар гъванар, фукьан уччву дараматар дарин!

² – Уву гьаму зурба дараматдиин гьяйран духьнана? – кӀуру Исайи. – Мидин гъван-гъвандиин гъубзидар, вари дабгъиди.

³ Хъасинси, Думу Элион дагъдиин Аллагьдин хулаз гъаншарди деънайиган, ялгъузди гъузнайи Петрина, Якьубдина, Югьандина Андрейи Дугъхьан гьерхру:

⁴ – Йип учуз, дици фила хьибди? Думу дабгърубдикан учуз фици аьгъю хьибди? Фициб лишниинди аьгъю хьибди?

⁵ Исайи кӀуру: – Лигайгьа, шликӀа учву алдатмиш дарапӀбан бадали, ихтият йихьай.

⁶ Фицики гизафдар: «Гьадму узу вуза» кӀури, Йиз ччвурнаккди гъиди ва гизаф халкьар алдатмиш апӀиди.

⁷ Учвуз багахь ва ярхла дявйирикан гъеебхьиш, гучӀ мапӀанай: гьаци дубхьну ккунди айиб ву, хъа гьаци хьувал сабан аьхир вуди хьибдар.

⁸ Халкь халкьдиин ва паччагьлугъ паччагьлугъдиин алархьиди, варишвариъ жилар тӀурччвури хьиди, гаш абхъди. Мурар бедбахтваларин, бицӀир апӀругандин аьзабарси, сифте кӀулар ву.

⁹ Ихтиятди гъузай, гьаз гъапиш мажлисариъ жазйир гьадатӀидичвуз, мистариъ урччвидичву; Узкан шагьидвал апӀбан бадали, Узлантина паччгьарин ва гьякимдрарин улихьна гъахидичву.

¹⁰ Хъа сабан аьхир гъяйиз вари миллетариз Ужувлан хабар деебхьну ккунду.

¹¹ Учву суддиз гъухиган, фу кӀуруш, дидин гъайгъушнаъ махьанай: гьадму сяаьт учвуз кӀуруб, фу тувнади гъабшиш, гьадму йипай – учву кӀури хьидичва, хъа Гирами Рюгьну ичв мелзниинди пиди.

¹² Чвуччву чве йикӀуз масу тувди, хъа адашди – бай. Веледари, абйир-бабариз къаршу удучӀвну, дурар йихиди.

¹³ Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапӀиш, думу дюрхну хьиди.

¹⁴ Учвуз, Аллагь гьясбикк ккадру алчагъвал лайикь дарушваъ шули гъябкъиган (урхурайир, мидин мяна фу вуш, гъаври ахъну ккунду), Ягьудия уьлкейиъ айидар дагълариз гьергри.

¹⁵ Хъа фуж гъваин алди гъабшиш, улдудучӀври ва чан хулаз фукӀа гъадабгъуз дурушри.

¹⁶ Фуж хутӀлиъ ади гъашиш, чан палтариз хулаз дурушри.

¹⁷ Гъагъдиъ айидаринна нанайихъ бицӀидар хъайидарин гьадму йигъари гьял пис хьибди!

¹⁸ Мици кьюрдну дарибшри пну, ккарагай.

¹⁹ Гьадму йигъари гьациб бедбахтвал хьибдики, дициб Аллагьди дюнʼя арайиз гъабхихъанмина гьамусдиз гъабхьундар, ва гьамдихъантинара хьибдар!

²⁰ Ва эгер гьадму йигъар Агъайи кам гъапӀундайиш, гьич фужкӀара ккадархьидайи. Хъа Чан кадагънайидар бадали Дугъу гьадму йигъар кам гъапӀну.

²¹ Эгер учвуз думуган «Лиг, Месигь гьамшвахь хьа», вая «Лиг, гьатушвахь хьа» гъапиш, мухъугъанай.

²² Гьаз гъапиш кучӀлин месигьар ва кучӀлин пайгъамбрар ачмиш хьиди. Эгер удукьуруш, гьеле кадагънайидарра чпихъинди илтӀикӀуз дурари аьламатнан лишнар ва аьжайиб ляхнар улупиди.

²³ Гьаци вуйиган, ихтиятди гъузай. Узу учвуз вари улубкьруб улихь имиди гъапунзачвуз.

²⁴ Хъа гьадму йигъари пис бедбахтваларин кьяляхъ «Ригъ ктӀубшвиди, вазли акв тувидар, завариан

²⁵ хядар ахьди ва завар ккадаршвиди».

²⁶ Гьадмуган дифариинди зурба кьувват ва гьяйбат хъади Инсаниятдин Бай гъюри рякъиди.

²⁷ Гьадмуган Дугъу, дюнʼяйин юкьбиб терефарихъан жилин саб кӀулхъан тап гьатмунуб кӀулихъна кадагънайидар уч апӀуз малайикар гьаъди.

²⁸ Инжирин гьархъан мисал гъадабгъай: дидин кюлери кьюкьяр апӀруган ва кӀажар адашвруган, хьад багахь шулайивал аьгъю шулучвуз.

²⁹ Гьаци учвузра, гьамрар гъяркъган, гьадму вахт, ичв раккнихъ хъайиси, багахь дубхьнайивал аьгъю апӀинай.

³⁰ Гьякь кӀуразачвуз: му вари улубкьайиз гьамусдин насил гъубзди.

³¹ Заварна жилар ккадахьиди, хъа Йиз гафар дургидар!

³² Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя.

³³ Гьаци вуйиган, лигай, ккилигури ва гьязурди гъузай. Думу вахт фила улубкьуруш, учвуз аьгъдарчвуз.

³⁴ Думу вахт, чан хал ва гьардиз рубкьру ляхин лукӀариин гъибтну, хъа гъаравлиз «ул иливну маахан» дупну, гъушу хулан эйсийихь тевуз шулу.

³⁵ Учвура ул иливну мааханай! Учвуз аьгъдарчвуз, аьхир, хулан эйси фила гъюруш: хябяхъган, гьацӀишваринган, сяаьт сабди, даттари уьъйир апӀруган, даршиш гьиринган.

³⁶ Хабарсузди Думу хъадакну гъафиган, учву даахнади Дугъаз дярякъри-гьа!

³⁷ Узу учвуз кӀурайиб варидариз кӀураза: ул иливну мааханай.