Марк 1 - Гирами Китаб

Штуан апӀру Ягьʼяйи халкь Месигь гъювалихьна гьязур апӀуб

¹ Аллагьдин Балкан, Иса Месигьдикан вуйи Ужувлан хабар гьамци ккебгъра.

² Ишая пайгъамбрин китабдиъ дибикӀна: «Магьа, Яв улихьди Узу Йиз дюнʼяйиз кас гьаъраза. Дугъу Увуз рякъ гьязур апӀиди.

³ ИчӀи чюлиъ дих атӀабгура, „Агъайиз рякъ ккабалгай. Дугъаз рякъяр-жилгъйир дишдар апӀинай!“»

⁴ ИчӀи чюлиъ, адмийир штуан апӀури, гьар касди чан тахсрар гардандиъ дисбан, инсанар штуан апӀбан ва гьамци чпин гунгьарилан хил алдабгъбан бадали, аьгъювалар рагъури, Ягьʼя ачмиш шулу.

⁵ Дугъахьна вари Ягьудия жиларилан ва Ерусалимдиан халкьар гъюйи, чпин гунгьариин швумал духьну, дурари чпин гунгьар гардандиъ дисуйи, ва дугъу дурар Ярдан нириъ штуан апӀуйи.

⁶ Ягьʼяйиин девейин хьайин палат алийи ва юкьвнаан гъидкьин яркьу чӀул идибтӀнайи. Дугъу елгнагарна чӀурдин йиччв ипӀуйи.

⁷ Дугъу адмийириз кӀуйи: «Йиз кьяляхъди узутӀан Кьудратлур гъюра. Узу, ис алахъну, Дугъан шаламарин гъахмйир гъядарчузкьан лайикь дарза.

⁸ Узу учву штуан гъапӀунзачву, хъа Дугъу учву Гирами Рюгьнахьди цӀийи алаидичву».

Иса штуан хьуб

⁹ Гьадму йигъари Галилей уьлкейин Назарет шагьриан Иса гъюру, Ягьʼяйи Думу Ярдан нириъ штуан апӀуру.

¹⁰ Иса штуан удучӀвурайиган, аьршар гьатӀарццну, Дугъаз Чаина Гирами Рюгь луфси ис шули рякъюру,

¹¹ завʼан дих шулу: «Уву Йиз масан Бай вува, Узу Увʼин гизаф рази вуза!»

Иса ахтармиш апӀуб

¹² Ва гьадму сяаьт Рюгьну Исайиз ичӀи чюлиз гъягъюз амур апӀуру.

¹³ Иблисди ахтармиш апӀури, Исайи ягъчӀвур йигъ ичӀи чюлиъ гьапӀру. Думу чӀурдин гьяйванатарин арайиъ яшамиш шулу, ва малайикар Исайин гъайгъушнаъ дийигъуру.

Исайи ученикар ктагъуб

¹⁴ Ягьʼя дустагъдиъ итбахъан, Ужувлан хабар рабгъури, Иса Галилей уьлкейиз гъягъюру.

¹⁵ Дугъу кӀуйи: «Вахт улубкьна. Аллагьдин Паччагьлугъ багахь дубхьна! Ичв гунгьар гардандиъ дидисну, уьмур дигиш апӀинай, Ужувлан хабарнахъ хъугъай!»

¹⁶ Иса Галилей гьюлхъантина гъягъюрайиган, Дугъаз гьюликк чулар ккирчрайи Симон ва дугъан чве Андрей рякъюру. Дурар балугъчйир вуйи.

¹⁷ Исайи дурариз кӀуру: – Узухъди гъачай ва Узу учвкан инсанарин юкӀвар дисру балугъчйир ктаурза.

¹⁸ Дурар, гьадмусяаьт чпин чулар дирчну, Гьадгъахъди гъягъюру.

¹⁹ СацӀиб тина гъушган, Дугъаз Зеведейин бай Якьубна дугъан чве Югьан рякъюру. Дурари люткейиъ чулар рас апӀурайи.

²⁰ Дугъу дурариз дих апӀуру, ва дурар, чпин адаш Зеведей ва дугъан балугъчйир люткейиъ гъитну, Гьадгъахъди гъягъюру.

Жин кайир сагъ апӀуб

²¹ Дурари Кафернагьум шагьриз рякъ бисуру. Султ йигъан Иса жугьдарин мистаз гъюру ва душваъ Дугъу адмийириз аьгъювалар улупуру.

²² Дурар Дугъан улупбариин мюгьтал духьнайи, фицики Исайи къанунчийириси ваъ, хъа гьюкум хлиъ айириси улупуйи.

²³ Сабпну мистаз жин кайи адми гъюру, дугъу чӀигъар апӀуру:

²⁴ – Учкан фу ккундувуз, Назаретдиан вуйи Иса? Учу пуч апӀуз дуфнана? Узуз Уву аьгъязуз – Аллагьдин гьаънайи Гирамир!

²⁵ Исайи жиндиз буйругъ тувру: – ХъючӀюбкь ва дугъʼан удубчӀв!

²⁶ Гьадмуган жин, думу дутӀурччвну, чӀветӀ дапӀну, дугъʼан удубчӀвуру.

²⁷ Вари русвагь шулу, сари-сарихьан гьерхуз хъюгъру: «Мурар гьапӀру цӀийи аьгъювалар ву? Мугъу жинаризра кмиди амур апӀураки, хъа дурар Мугъаз мютӀюгъ шулира а».

²⁸ Мугъкан аваза вари Галилей уьлке вуйибси рабгъуру.

Исайи гизаф адмийир сагъ апӀуб

²⁹ Мистʼан удучӀвган, Иса Якьубна Югьан хъади Симондинна Андрейин хулаз гъягъюру.

³⁰ Симондин сижарбаб цӀа алди дахънайи. Дугъкан Исайиз кӀуру.

³¹ Иса багахьна дуфну, хил дибисну, дугъаз гъудужвуз кюмек апӀуру. ЦӀа дишла улдубчӀвуру, ва дишагьли хяларин гъайгъушнаъ учӀвру.

³² Хябяхъдихъна ригъ алабхъиган, Исайихьна вари иццрудар ва жинар кайидар хуру.

³³ УрчӀарихъна вари шагьур уч дубхьнайи.

³⁴ Жюрбежюр уьзрари ккагънайи гизафдар сагъ гъапӀнийи ва гизафдариан жинар утӀурккнийи. Исайи жинариз Учв ашкар апӀуб гъадагъа гъапӀнийи, фицики дурариз, Думу фуж вуш, аьгъяйи.

³⁵ Сигьринган, гьеле мучӀуди имиди, Думу хулʼан удучӀвну, архаин йишвахьна гъягъюру ва гьадушвахь ккарагуру.

³⁶ Симонна Дугъахъди хъайидар Думу агуз гъягъюру

³⁷ ва, гъидихъган, Дугъаз кӀуру: – Варидари Уву агура.

³⁸ – Гъачай багахь хьайи шагьрариз гъягъюрхьа, Узхьан душвариъра аьгъювалар улупуз шлуси. Узу гьаддиз дуфнайир вуза, – кӀуру Исайи дурариз.

³⁹ Гьамци Думу вари Галилей вуйибси, мистариъ аьгъювалар улупури ва жинар утӀурккури, лицуру.

Хамран аьзар кайир сагъ апӀуб

⁴⁰ Хамран аьзар кайир Исайихьна дуфну, кьамкьарихъди Дугъан улихь дусну, кюмек ккун апӀури, ккарагуз хъюгъру: – Эгер Увуз ккун гъабшиш, узу марцц апӀуз шулвухьан.

⁴¹ Дугъан язухъ гъабхьи Исайи хил гьачӀабккну, дугъак кубкӀну, кӀуру: – Ккундузуз, марцц йихь!

⁴² Хамран аьзар гьадму сяаьт дугълан улдубчӀвуру ва марцц шулу.

^43-44 Исайи, ижмиди гьамци дупну, думу гьаъру: – Лиг гьа, мидкан гьич саризра макӀан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апӀуз ужуб гъайибх.

⁴⁵ Хъа дугъу, душну, гьеле чаз макӀан гъапнушра, варишвариъ чаин улубкьуб ктибтуру, гьаддиз Исайихьан сарун ашкарди шагьриз гъюз шули гъабхьундайи, Думу адмийир адрушвариъ гъузуйи. Гьадушваризра кмиди Дугъахьна варишвариан гъюйи.