Ляхнар 9 - Гирами Китаб

Саул хъугъувалихъна хуб

¹ Му арайиъ Саул, Агъайин ученикариз гучӀар ккаъри, дурар йихуз ккунди хъергнайи. Думу жугьдарин маллйирин аьхюрихьна гъягъюру.

² Дугъхьан Саули Дамаскдиъ айи жугьдарин мистариз вуйи кагъаз бисуру. Диди душваъ, жилар вушра, хпар вушра, Исайин терефкрар алахьиган, дурар дидисну, йитӀну, Ерусалимдиз хуз ихтияр тувуйи.

³ Думу Дамаскдиз багахь шулайиган, сабпну завариан аквну ккаъру.

⁴ Думу жилʼина алдакуру ва чаз кӀурайи сес ебхьуру: – Саул, Саул! Уву Узухъ гьаз хъергнава?

⁵ Дугъу: «Агъа, Уву фуж вува?» – пну гьерхиган, Агъайи жаваб тувру: – Узу уву хъергнайи Иса вуза.

⁶ Гъудужвну, шагьриз гъарах ва уву душваъ, фу дапӀну ккундуш, пидивуз.

⁷ Дугъахъ хъайи адмийирин мюгьталвалиан чӀал гъибиснийи, фицики дурариз, сес ебхьурашра, фужкӀа рякъюрадайи.

⁸ Жилилан за гъахьи Саулиз, улар арцциган, фукӀара рябкъюри гъабхьундар. Думу дугъахъ хъайидари, хилхъан дидисну, Дамаскдиз хъади гъюру.

⁹ Думу шубуд йигъан дярякъри, дирипӀри ва дурубхъри гъахьнийи.

¹⁰ Дамаскдиъ Ананай кӀуру Исайин ученик айи. Агъайи дугъаз аьжайиб рякъбиинди гъапнийи: – Я Ананай! Дугъу: – Гьай Агъа! – пну, жаваб тувру.

¹¹ Агъайи дугъаз кӀуру: – Гъудужвну, «Диш кюче» кӀуру кючейиз гъарах ва Ягьудайин хулаъ Тарсдиан вуйи Саул кӀуру кас гьерх, думу гьамусяаьт ккарагура.

¹² Дугъаз аьжайиб рякъбиинди, дугъан улар сагъ апӀуз дуфну, дугъʼин хил иливури Ананай кӀуру кас рякъюру.

¹³ Ананайи жаваб тувру: – Я Агъа! Гьадму касди Ерусалимдиъ Яв халкьдиз гъапӀу чӀуру ляхнарикан гизаф деебхьназуз.

¹⁴ Гьаминара думу, жугьдарин аьхюну маллйири гьаъну, Увухъ хъугънайидар вари дисуз дуфнайир ву.

¹⁵ Хъа Агъайи дугъаз кӀуру: – Гъарах, фицики паччгьарин, жугьдарин ва жара халкьарин арайиъ Йиз ччвур адлу апӀуз думу кас Узу кадагъунза.

¹⁶ Узу дугъаз, Йиз ччвурнахъди фукьан аьзаб дизигну ккундуш, улупидиза.

¹⁷ Ананайи, душну, гьадму хулаъ Саулиин хил иливну, дугъаз кӀуру: – Саул чве, мина гъюру рякъюъ увуз гъяркъю Агъа Исайи узу, яв улар сагъ апӀбан ва Гирами Рюгьну ацӀбан бадали, гьаъназу.

¹⁸ Гьамци гъапибси, дугъан уларилан ханцӀ алдабхъиганси шулу ва дугъаз рябкъюз хъюбгъру, хъасин думу штуан шулу.

¹⁹ Хъа дугъу уьл ипӀуру ва дугъахьна кьувват гъюру.

Саули Дамаскдиъ аьгъювалар улупуб

²⁰ Дугъан Дамаскдиъ ученикарихъди садшвнуд йигъ шулу, хъасин дугъу Иса Аллагьдин бай вуйиваликан, жугьдарин мистариз гъягъюри, аьгъювалар улупури гъахьну.

²¹ Дугъан гафар гъеерхькьандар вари мюгьтал шуйи ва кӀуйи: – Му кас Ерусалимдиъ Исайиз ккарагурайидар вари терг апӀурайи гьадму Саул дайинхъа? Думу мина, дурар дидисну, жугьдарин маллйирин аьхюдарихьна гъахуз дуфнайир дайинхъа?

²² Хъа Саулин кьувват артухътӀан-артухъ шулайи ва дугъу, Иса Месигь вуйивал тасдикь апӀури, Дамаскдиъ яшамиш шулайи жугьдар русвагь апӀурайи.

Саул аьжаликан ккадархьуб

²³ Хайлин йигъар улдучӀвхъан, жугьдари думу йикӀуз йикьрар апӀуру.

²⁴ Дурар йигъ-йишвди шагьрин урнарихъ дугъаз ккеъну шуйи, аммаки Саулиз дурарин кьастнакан аьгъю шулу.

²⁵ Ученикари, йишвну дуфну, думу жагваъди шагьрин цаллансина чӀатинди эрхру.

Саул Ерусалимдиъ хьуб

²⁶ Саул Ерусалимдиз гъафиган, дугъаз Исайин ученикарик ктикьуз ккун шулу, амма дурариз дугъхьан гучӀури гъахьну, фицики дурар, му Исайин ученик ву пну, дугъахъ хъугъри адайи.

²⁷ Гьадмуган Варнавди думу вакиларихьна хуру ва дурариз, Саулиз Агъа фици гъяркънуш, Агъайи дугъаз фу гъапнуш, Саули Дамаскдиъ фици дирбашди Исайикан аьгъювалар улупнуш, ктибтуру.

²⁸ Дидхъантина Саул дурарихъди гъузру ва Ерусалимдиъ, азадди лицури, Агъа Исайикан ачухъди аьгъювалар улупури шулу.

²⁹ Думу грек чӀалниинди улхру жугьдарихъди гьюжатариъ шулу, хъа дурари думу йикӀуз кьаст апӀуру.

³⁰ Гъардшариз мидкан аьгъю дубхьну, думу, Къайсарияйиз духну, гьадушвʼан багъри Тарсдиз рякъюъ аъру.

³¹ Гьамци вари Ягьудия, Галилей ва Самария уьлкйир вуйиси хъугънайидар саламат ва хъугъувалиъ мюгькам шули гъахьну. Агъайихьан гучӀʼвал хьади ва Гирами Рюгьну кюмек апӀури, вакиларин ученикарин кьадар артмиш шули гъабхьну.

Петри паралич кайир сагъ апӀуб

³² Шагьриан шагьриз гъягъюри, Петр Лидда кӀуру шагьриъ айи хъугънайидариин улукьуру.

³³ Душваъ дугъаз Эней кӀуру, ришвуз даршули, миржид йисан ахниъ ахънайи сар кас дихъуру.

³⁴ Петр дугъаз кӀуру: – Эней! Месигь Исайи уву сагъ апӀура. Яв ахниккан гъудужв! Энейра дишла гъудужвуру.

³⁵ Лиддайиъ ва Сарондиъ айидариз варидариз му рябкъюру ва дурар Агъайихъ хъугъру.

Петр Тавифа чӀиви апӀуб

³⁶ Яффайиъ Тавифа (грек чӀалниинди Доркас, яна «Жейран») кӀуру сар хъугънайи дишагьли айи. Дугъу, ужувлар апӀури, касибариз садакьйир тувуйи.

³⁷ Гьадму йигъари думу кетӀерццну йикӀуру. Думу, дижикӀну, зиин хулаъ гъитру.

³⁸ Хъа Лидда Яффайихьан ярхлаъ дархьбаз лигну, Петр Лиддайиъ айиваликан деебхьну, ученикари дугъахьна: «Кьан дарапӀди гъач», – кӀури, кьюр кас гьаъру.

³⁹ Петр, гьязур духьну, дурарихъди гъюру. Петр гъафиган, думу зиин хулазди гъахуру ва ачӀни хпар ишури дугъан гъаншариз гъюру. Дурари чпиз Тавифайи гъидирху ккурттар улупуру.

⁴⁰ Петри дурар хулʼан адауру ва, кьамкьариина ис духьну, ккарагуз хъюгъру. Хъасин гъачӀирихьинди илдицну, кӀуру: – Тавифа, гъудужв! Дишагьлийи улар арццру ва, Петр дяркъну, за духьну деъру.

⁴¹ Хил гьачӀабккну, Петр дугъаз гъудужвуз кюмек апӀуру. Хъасин вари хъугънайидариз ва ачӀни хпариз дих дапӀну, дурариз чӀиви духьнайир улупуру.

⁴² Мидкан вари Яффайиз аьгъю шулу, ва гизафдар Агъайихъ хъугъру.

⁴³ Хъа Петр дидхъантина хайлин йигъари Яффайиъ гъидкьарин уста Симондихь гъузнийи.