Ляхнар 6 - Гирами Китаб

Ургур кюмекчи ктагъуб

¹ Вакиларин терефкрар артухъ хьпахъ, бинайиан грек чӀалʼинди улхурайи жугьдари Ерусалимдин жугьдарикан аьрзар апӀуз хъюгъру. Дурари, гьар йигъан Ерусалимдин жугьдари кюмек пай апӀру вахтна, Ерусалимдиан дару ачӀни хпариз фикир туври шулдар, кӀуйи.

² Гьадмуган йицӀикьюр вакили, вари ученикариз дих дапӀну, кӀуру: – Учу Аллагьдин гаф гъибтну, кюмек пай апӀуб ужу дар.

³ Гьаци вуйиган, гъардшар, ичв арайиан ухьуз аьгъюдар, Гирами Рюгьну ва фагьумлували ацӀнайи ургур кас кадагъай. Дурар гьадму гъуллугъниин дерккдихьа.

⁴ Хъа учу ккарагури ва Ужувлан хабар рабгъури хьидича.

⁵ Му теклифниин вари рази шулу. Дурари хъугъвали ва Гирами Рюгьну ацӀнайи Стефан кӀуру кас, гьацира Филип, Прохор, Никанор, Тимон, Пармен ва улихьди аллагьсуз вуди гъаши Антиохияйиан вуйи Николай ктагъуру.

⁶ Мурар вакиларин улихь дерккнийи ва, Аллагьдиз ккарагну, дурариин хилар иливнийи.

⁷ Гьамци Аллагьдин гаф рабгъури, Ерусалимдиъ хъугънайидарин кьадар артухъ шулайи, маллйириканра гизафдар Аллагьдихъ хъугъри гъахьнийи.

Стефан дисуб

⁸ Хъугъвалиъ ва кьувватнаъ айи Стефанди халкьдин арайиъ зурба вуйи аьламатар ва аьжайиб лишнар улупуйи.

⁹ Киринеяйиан, Александрияйиан, Киликияйиан, Асияйиан вуйидар ва Азадлуйирин мистан терефкрар Стефандихъди гьюжатнаъ учӀвру.

¹⁰ Амма дурарихьан Стефандин фагьумлувал ва дугъак кайи Гирами Рюгь ккагъуз гъабхьундар.

¹¹ Гьаддиз дурари пул тувну бязи адмийир: «Учуз, дугъу фици Муса пайгъамбризна Аллагьдиз люкьнар апӀурайиш, гъеебхьунчуз» кӀури, пуз алауру.

¹² Дурари гьамци халкьдик, тухмарин кавхйирик ва аьлимарик гъалабулугъ кипру ва, алархьну дидисну, Стефан аьхю суддиз хуру.

¹³ Душваз кучӀлин шагьидарра хъади гъюру, ва дурари кӀуру: – Му касди сикин дарди Аллагьдин хулаз ва Къанундиз люкьнар апӀура.

¹⁴ Учуз дугъу, Назаретдиан вуйи Исайи Аллагьдин хал дабгъиди ва Мусайи ухьуз тувнайи аьдатар гьюдюхиди кӀури, гъеебхьунчуз.

¹⁵ Суддиъ деънайидари Стефандин машналан ул алдабгъурадайи, фицики дурариз дугъан маш малайикдин машси рябкъюрайи.