Ляхнар 5 - Гирами Китаб

Ананайин ва Сапфирайин кучӀал

¹ Ананай кӀуру сар касдина дугъан шив Сапфирайи чпин мулк масу тувру.

² Хъасин гъадабгъу пуликан, хпиризра аьгъяди, саб пай гьитӀибкӀуру ва имбуб дубхну вакиларихьна тувру.

³ Гьадмуган Петри дугъаз кӀуру: – Ананай, гьаз яв кӀван аьхювал апӀуз иблисдихьди гъитунва, гьаз, Гирами Рюгьназ кучӀал дапӀну, жилихъ туву пуликан гьитӀибкӀунва?

⁴ Масу тувайиз думу жил явуб дайинхъа? Ва гъадабгъу пулра яв ихтиярнаъ адайинхъа? Мициб ляхин фици фикриз гъафнияв?! Уву адмийириз ваъ, хъа Аллагьдиз кучӀал гъапӀунва.

^5-6 Гьаму гафар гъеерхьу Ананай алдакуру ва алишвʼин йикӀуру. Хъа дуфну жигьилари, думу кивуз гьязур апӀуру, хъасин кивуз адагъуру. Ва мидкан гъеебхьдарин гучӀбаан зегьле гъябгъюру.

⁷ Мина шубуб сяаьтналан гъабшибдикан хабар адру Ананайин шив гъюру.

⁸ Петри дугъхьан гьерхру: – Йип узуз, учву хутӀил гьаму кьиматнахъ масу тувинчвахъа? Дугъу: «Ав, гьадмукьандиз тувунча» пну, жаваб тувру.

⁹ Гьадмуган Петри дугъаз кӀуру: – Учвʼан Агъайин Рюгь ахтармиш апӀуз фици удубкьунчвуан?! Гьатмагьа яв жилир кивдар, кьяляхъ хъадакну, урчӀарихъна дуфна. Дурари яв майитра гъабхиди.

¹⁰ Му дишагьли сабпну Петрин ликариккинди алдакуру ва йикӀуру. Хулаъ учӀву жигьилариз думура дукӀну рякъюру ва, духну, жилирин гъвалахъ кивру.

¹¹ Вари хъугънайидарик ва мидкан гъеебхьдарик зарбди гучӀ кабхънийи.

Аллагьдин лишнар

¹² Вакилари халкьдин арайиъ гизаф аьламатарна аьжайиб лишнар гъапӀнийи. Дурар гьарган вари сатӀиди Сулеймандин айвандихъ хъади шуйи.

¹³ Жарадарикан гьич сарихьанна вакиларин багахь хьуз шули гъабхьундар. Халкьди дурарин ад апӀуйи.

¹⁴ Агъайихъ хъугънайи халкьдин – гьам жиларин, гьам дишагьлийирин – кьадар артухътӀан артухъ шулайи.

¹⁵ Аьзарлуйирра кмиди, кючейиз адагъуйи, ахнар-леъфариин дитуйи, дилинтина гъягъруган, Петрин сиринкьан кубкӀри кӀури. Фицики дурар сагъ хьпан бадали гьадмура чӀяаьн шул пну, дурари миж кивуйи.

¹⁶ Ерусалимдин аьтрафарихъ хъайи шагьрариан аьзарлуйир ва жинар кучӀвнайидар хури, инсанарин аьхю дестйир гъюз хъюгъюйи, ва вари сагъ шулира гъахьну.

Вакилар дисуб

¹⁷ Гьадмуган маллйирин аьхюр ва дугъахъ хъайи саддукйир гъанихвалиан тӀуркӀури гъахьну ва

¹⁸ дурари вакилар, дидисну, жямяаьтлугъ дустагъдиъ итру.

¹⁹ Хъа Агъайин Малайикди, йишвну дустагъдин урчӀар арццру ва, дурар адаъну, кӀуру:

²⁰ – Душну Аллагьдин хулаъ халкьдиз цӀийи уьмрикан вари кидибтай.

²¹ Му гафар деерхьну, дурар акв мялум шулайи вахтна Аллагьдин хулаъ учӀвру ва халкьдиз аьгъювалар улупуз хъюгъру. Маллйирин аьхюри ва дугъахъди хъайидари, вари диванбегйирна Израилин сихларин вари кавхйир суддиз уч апӀуру, хъасин суддин гъаравлар дустагъдиз вакилар хуз гьаъру.

Диванбегйирин улихь

²² Вакилар хуз гъафидариз дустагъдиъ фужкӀара дихъурдар ва, хъадакну, гъафидари кӀуру:

²³ – Учуз дустагъ мюгькамди хъябкьну ва гъаравларра урчӀарихъ дийигънади гъяркъюнчуз, амма раккнар арцциган, учуз душваъ касра гъидихъундарчуз.

²⁴ Му гафар гъеерхьиган, аьхюну маллйир ва Аллагьдин хулан гъаравларин аьхюр, му фу хабар вуйкӀан кӀури, мюгьтал духьну гъузнийи.

²⁵ Хъасин сари дуфну кӀуру: – Учву дустагъдиъ иту адмийир Аллагьдин хулаъ а ва халкьдиз дурари аьгъювалар улупура!

²⁶ Гьадмуган гъаравларин аьхюри, чан эскрарихъди душну, вакилар хъади гъюру. Вакилариз гуж апӀуз эскрариз гучӀуйи, фицики халкьди дурариин гъван уьлюбхюб мумкин вуйи.

²⁷ Дурари вакилар диванбегйирин улихь дерккру. Гьадмуган маллйирин аьхюри дурарихьан гьерхру:

²⁸ – Учу учвуз Гьадму Касдин гьякьнаан аьгъювалар улупуб ижмишнаан къадагъа гъапӀундайинхъа? Хъа магьа, учву Ерусалим вуйиси Дугъкан аьгъювалар рагъурачва ва Думу йикӀбан тахсир учʼин илипуз ккунди ачвуз.

²⁹ Петри ва вакилари жаваб тувру: – Учу адмийиризтӀан Аллагьдиз артухъди мютӀюгъ духьну ккунду.

³⁰ Учву Иса, дариз дизигну, гъакӀунчва, амма ихь абйирин Аллагьди Думу, гъачӀихъан, чӀиви гъапӀну.

³¹ Аллагьди, Израилин халкьди чпин тахсрар гардандиъ дидисну гунгьарилан хил алдабгъуз гъитбан бадали, Иса Чан арччул хилихъна Аьхюрди ва ухьу Уьрхрюрди за гъапӀну.

³² Мидин шагьидар Чаз мютӀюгъ шлудариз Аллагьди тувнайи Гирами Рюгь ва учу вуча.

³³ Му гафар гъеерхьиган, диванбегйирик яманди хъял кубчӀвру, ва дурариз вакилар йихуз ккун шулу.

Гамалиилин насигьят

³⁴ Къанунчийизси гьюрмат айи, диванбегйирикан Гамалиил кӀуру сар фарисейи, али йишвлан за духьну, вакилар саб геренди суддиан адауз буйругъ тувру.

³⁵ Хъасин дугъу кӀуру: – Израилин агьалйир! Учву мурарикан гьапӀруш, ужуди фикир апӀинай!

³⁶ Ичв кӀваин илмиш, сацӀиб улихьнаси, учв зурба кас вуза кӀури, Февда кӀурур гъядяхънийи ва юкьудваржкьан адми дугъахъди гъахьнийи. Хъа думу йивну гъакӀнийи, дугъан терефкрар гъадаргънийи ва жвартӀ гъахьнийи.

³⁷ Дугъан кьяляхъ, агьалйир гьисаб апӀру вахтна, Галилейиан Ягьуда гъядяхъну, дугъура чахъди хайлин халкь жалб гъапӀну. Думура йивну гъакӀну, хъа дугъахъди гъушдарра вари гьубкьушвахъинди гъарагъну.

³⁸ Гьаддиз лигну, гьамус кӀуразачвуз: гьадму касарихьан гьудучӀвай ва дурар сикинди гъитай. Фицики эгер му ляхин инсанарин терефнаан вуйиб вуш, думу кӀулиз удубчӀвидар.

³⁹ Хъа эгер Аллагьдин терефнаан шулайиб вуш, учвхьан думу дебккузра хьибдарчвухьан, учву Аллагьдиз къаршудира хьуз мумкин ву.

⁴⁰ Диванбегари дугъан насигьят кьабул апӀуру. Хъасин вакилариз дих дапӀну, дурар дурччвну, сарун Исайикан аьгъювалар улупуз гъадагъа дапӀну, деетуру.

⁴¹ Вакилар кӀуруш, чпи Иса себеб вуди жазайикк ккуркьуз лайикьлу хьубʼин шад духьну, суддиан удучӀвну гъягъюру.

⁴² Гьар йигъан Аллагьдин хулаъ ва адмийирин хулариъ халкьдиз Иса Месигьдикан аьгъювалар улупури, дурари Ужувлан хабар рабгъуру.