Ляхнар 4 - Гирами Китаб

Петриин ва Югьандиин суд

¹ Петрна Югьан халкьдихъди улхурайи вахтна, дурарин багахьна маллйир, Аллагьдин хулан гъаравларин аьхюдарна саддукйир гъафнийи.

² Петрина Югьанди халкьдиз Исайилантина гъачӀидар чӀиви хьуваликан аьгъювалар улупура кӀури, дурариз гизаф хъял кайи.

³ Дурари, Петрна Югьан дидисну, сарун хябяхъ хьпаз лигну, гвачӀиндизкьан гъаравликкди уьрхюру.

⁴ Аьгъювалар гъеерхьдарикан гизафдар хъугънийи. Дурарин кьадар хьуд агъзурихьнакьан вуйи.

⁵ Хъайигъан гьякимар, агъсакълар ва аьлимар Ерусалимдиъ уч шулу.

⁶ Душваъ аьхюну малла Гьаннай, гьацира Каяфа, Югьан, Александр ва жугьдарин аьхюну маллайин тухмиан вуйи жарадарра айи.

⁷ Дурари, Петрна Югьан хъади духну, дурарихьан гьерхну: – Фициб кьувватниинди вая фуну ччвурнахъан учву гьамци гъапӀунчва?

⁸ Гьадмуган, Гирами Рюгьнахьди ацӀну, Петри дурариз кӀуру: – Эй халкьдин гьякимдрарна Израилин кавхйир!

⁹ Эгер учву аьжуз адмийиз ужʼвал гъапӀну кӀури ва, думу фици сагъ гъахьнуш, пуб гъи учкан жаваб тӀалаб апӀураш,

¹⁰ учвуз варидариз ва вари Израилин халкьдиз аьгъю ибшри, му, учву дариз гъизигу ва Аллагьди чӀиви гъапӀу Назаретдиан вуйи Месигь Исайин гьунарниинди думу ичв улихь сагъ духьну, дийигъна.

¹¹ Думу, устйири нигь дапӀну ва хъасин мурччван кӀулин гъван гъаши, Гъван ву.

¹² Фицики заварин кӀанакк инсанариз тувнайидарикан, ухьуз уьрхювал тувру, сарун жара ччвур ккадар.

¹³ Жугьдарин гьякимдрариз Петринна Югьандин дирбашʼвал дябкъну, дурар гъурхдар дару ва аьдати адмийир вуйивалин гъаври ахъну, гьаддиин мюгьтал духьнайи. Дурар Исайихъди гъахьидар вуйиб аьгъю гъабхьнийи.

¹⁴ Исайин вакиларин гъвалахъ сагъ дапӀнайи адми дийигънайиган, сарун артухъ дурарихьан гаф пуз гъабхьундайи.

¹⁵ Петризна Югьандиз диванханайиан удучӀвуз буйругъ тувну, гьякимдрари чпин арайиъ мясляаьт апӀуру:

¹⁶ – Ухьу мурарикан гьапӀхьа, фицики Ерусалимдиъ яшамиш шулайи гьарсар касдиз му аьхю аьламат гьадрари гъапӀуб ачухъди аьгъя, ва ухьхьан му гъапӀундар пуз шулдар.

¹⁷ Амма му аваза хъанара ярхлаз дарабгъбан бадали, Исайикан гьич сарихъдира дулухуз дурариз гъадагъа апӀидихьа.

¹⁸ Ва дурариз дих дапӀну, Исайикан сарун саризра фукӀа дарпуб ва аьгъювалар улулупуб гъадагъа апӀуру.

¹⁹ Хъа Петрина Югьанди дурариз жаваб тувру: – Учву саб фикир апӀинай: Аллагьдин улихь АллагьдихътӀан учвухъ артухъ хъпехъуб дугъри вуйинхъа?

²⁰ Учхьан учуз гъябкъюбдиканна гъеебхьубдикан дарпиди гъитуз шулдарчухьан.

²¹ Дурар, хъана гучӀар ккаъну, деетну. Гьаз гъапиш дурариз жаза тувуз гьякимарихьан багьна абгуз гъабхьундайи, фицики гъабхьибдиз лигну, вари халкьди Аллагьдин ад апӀурайи.

²² Сагъ гъаши касдин ягъчӀвур йистӀан артухъ вуйи.

Вакиларин ккарагувал

²³ Деету Петрина Югьанди, чпиндарихьна дуфну, аьхюну маллйирина кавхйири чпиз фу гъапнуш, ктибтуру.

²⁴ Мурар деерхьну, заварихьинди илдицну, Аллагьдиз варидари кӀуру: – Я Гьякимдар Аллагь, Уву зав, жил, гьюл ва дюнʼяйиъ айи гьарсаб яратмиш гъапӀунва!

²⁵ Ич аба ва Яв лукӀ Давудрин мелзниинди Гирами Рюгьналанмина Уву гъапунва: «Гьаз жара миллетар гьяясуз шулу? Гьаз дурариъ кӀулиз удудучӀвру ниятар а?

²⁶ Дюнʼяйин паччгьар ва гьякимдрар дяви апӀуз гьязур духьна, Агъайиз ва Дугъан Месигьдиз къаршу вуди сабишвʼина уч духьна».

²⁷ Фицики дугъриданра мурар вари, Гьиродна Понтий Пилат Израил халкьдихъди ва жара миллетарихъди гьаму шагьриъ Уву Месигьди ктагъу Яв Гирами Гъаравашдиз къаршу вуди уч гъахьну.

²⁸ Чпин ляхнар кӀулиз адагъуз уч гъашидариинди Яв кьастниинди ва гьюкмиинди улупнайи ляхнар кӀулиз удучӀвну.

²⁹ Гьамус Уву лиг, Агъа, учуз гучӀар ккаъри, дурари фйир кӀураш, Яв лукӀариз Яв гаф гучӀ дарди пуз кюмек апӀин.

³⁰ Аьзарлуйир сагъ апӀури, аьламатар ва аьжайиб лишнар улупури, Яв Гирами Гъараваш Исайин ччвурнахъди Яв кьувват улуп.

³¹ Ккарагбахъан, дурар али йишв тӀубччвуру ва дурар Гирами Рюгьнахъди ацӀру. Гьаддиз дурари Аллагьдин Гаф аьшкьниинди пуз хъюгънийи.

Вари уртахъуб вуйи

³² Вари хъугънайидар саб юкӀвси ва саб жанси гъахьнийи. Дурарикан сарира чаз айи мал-мутмуйиз, йизуб ву, кӀурдайи, хъа вариб дурарин уртахъуб вуйи.

³³ Вакилари зурба кьувватниинди Агъа Иса чӀиви хьуваликан шагьидвал апӀури гъахьну. Дурариин Аллагьдин ужʼвал алди гъабхьну.

³⁴ Дурарин арайиъ дарвал кайидар адайи, фицики мулкар вая хулар-йишвар айидари, дурар масу туври, пул хури шуйи.

³⁵ Хъа пул вакиларихьна тувуйи, ва дурари, шлиз фтин дарвал каш, гьубкӀбан бадали пай апӀуйи.

³⁶ Месела, Киприъ бабкан гъаши сар левит Юсуфди (вакилари дугъаз Варнав кӀуйи, яна «Ккарцрур»)

³⁷ чан хутӀил масу тувну, дидихъ гъадабгъу пул дубхну, вакиларихьна тувнийи.