Ляхнар 3 - Гирами Китаб

Петри ликур сагъ апӀуб

¹ Сабан Петрна Югьан лисхъан, сяаьт шубуб шулайиган, ккарагуз Аллагьдин хулаз гъягъюрайи.

² Дурариз учв бабкан гъашихъанмина ликар ккурсуз даршлу сар ликур рякъюру. Думу, чан дустари хури, гьар йигъан Аллагьдин хулан «Уччву урнарихъ» кӀурушвахь дитри шуйи. Дугъу дина гъюрудариз садакьа ча кӀури шуйи.

³ Дугъу, Аллагьдин хулан урнарихьна гъафи Петрна Югьан дяркъну, дурариз садакьа ча кӀуру.

⁴ Дурар дугъаз дикъатниинди лигуру ва Петри кӀуру: – Учухьинди лиг.

⁵ Думура, чаз фукӀа тувур кӀури, дурарихьинди лигуру.

⁶ Амма Петри дугъаз гъапи: – Узухь арс, ясана гъизил хьтарзухь, хъа узуз айиб тувдизавуз: Назаретдиан вуйи Месигь Исайин гьюкмиинди кӀураза: гъудужвну гъарах!

⁷ Гьамци дупну, Петри, дугъан арччулну хил дибисну, дугъаз за хьуз кюмек апӀуру.

⁸ Гьадмуган ликурин ликар мюгькам шулу ва думу гъедергну лицуз хъюгъру. Хъасин думу, ергури ва Аллагьдин тярифар апӀури, дурарихъди Аллагьдин хулаъ учӀвру.

⁹ Варидариз думу, фици Аллагьдин тярифар апӀури гъягъюраш, рякъюру ва

¹⁰ думу, садакьа ча кӀури, «Уччву урнарихъ» деъну шлу ликур вуйиб аьгъю шулу. Дугъан ликар сагъ хьувалиин адмийир русвагь духьнайи.

Сулеймандин айвандихъ Петрин улхуб

¹¹ Гьадму ликар сагъ гъаши кас Петрихьанна Югьандихьан гьудудучӀври гъахьнийи, хъа гьаму арайиъ мюгьтал духьнайи вари халкь Сулеймандин айван кӀурушвахь дурарихьна уч хьуз хъюгъру.

¹² Му гьял дябкъну, Петри кӀуру: – Израилин агьалйир, мидʼин гьаз аьламат духьначва? Гьаз учву учуз, му касдин ликар ич кьувватниинди ва ужувлиинди сагъ дапӀнайиси, лигурачва?

¹³ Му Аллагьди гъапӀуб ву: Ибрагьимдин, Исакьдин ва Якьубдин Аллагьди, ихь абйирин Аллагьди Чан Гъараваш Иса адлу гъапӀну. Хъа учву Думу йикӀуз гъитунчва ва, Пилатдиз Думу азад апӀуз ккун гъабшиган, Думу нигь гъапӀунчва.

¹⁴ Марцци ва Гьякьлу вуйи Кас нигь дапӀну, адми гъачӀи гъачагъ азад апӀувал тӀалаб гъапӀунчва.

¹⁵ Учву уьмур Туврайир гъакӀунчва. Ари Гьадму Аллагьди, гъачӀихъан, чӀиви гъапӀну, ва учу мидин шагьидар вуча.

¹⁶ Му кас Исайин кьувватниинди сагъ духьнайир ву, фицики учу Исайин кьувватнахъ хъугънача. Учвуз гьаму кас аьгъячвуз ва Исайихьан вуйи хъугъували думу сагъ апӀувал магьа гъябкъюнчвуз!

¹⁷ Амма узуз аьгъязузки, йиз чвйир, му ляхнар ичв аьхюдаризси учвузра аьгъдарди хьувалиан гъапӀдар вуйичв.

¹⁸ Аллагьди чан пайгъамбрарин мелзналан Месигьдин аьзабарикан улихьмиди гъапну ва гьаци гъапӀнура ву.

¹⁹ Гьаци вуйиган, ичв тахсрар гардандиъ дисай ва, ичв гунгьарилан хил алдабгъбан бадали, Агъайихьинди илтӀикай.

²⁰ Гьадмуган Агъайи учвуз шадвалар тувиди ва учвухьна гьязур духьнайи Иса Месигь гьаъди.

²¹ Думу аьршариин Аллагьди Чан марцци пайгъамбрарин мелзналан дупнайи вари ляхнар тамам апӀайизкьан гъузди.

²² Фицики Муса пайгъамбри дупна: «Ичв Аллагь вуйи Агъайи ичв чвйирин арайиан, узуси, Пайгъамбар адаиди. Дугъу учвуз фу гъапишра, тамам апӀинай.

²³ Ва гьадму Пайгъамбрихъ хъпебехъу гьарсар кас Аллагьдин халкьдин арайиан адаиди ва терг апӀиди».

²⁴ Ав, Шамуил пайгъамбрилан ккебгъну, дугъхъанмина гъахьи вари пайгъамбрари гьамцдар йигъар улуркьбакан улихьмиди кӀури гъахьну.

²⁵ Пайгъамбрари улихьмиди дупнайи йикьрар, Аллагьди ичв абйирихъди гъийитӀдар, учвуз дурукьна. Аллагьди Ибрагьимдиз гъапнуки: «Яв тумралантина дюнʼяйин вари инсанариз ужувлар хьиди».

²⁶ Аллагьди сифте учвухьна, ичв чӀуру рякъяриан адаъну, учвуз ужувлар хьпан бадали, Чав чӀиви гъапӀу Чан Гъараваш Иса гьаъна.