Ляхнар 26 - Гирами Китаб

Павелин улхуб

¹ Гьадмуган Агриппайи Павелиз кӀуру: – Гьамус увхьан улхуз шулвухьан. Павелира, чан хил за дапӀну, чан тахсир адруваликан пуз хъюгъру:

² – Агриппа паччагь! Жугьдари узук кирчрайи вари тахсрарихьан яв улихь жвув уьрхюб аьхю бахт вуди гьисаб апӀураза.

³ Фицики уву жугьдарин вари аьдатарихъди ва гьюжат али месэлйирихъди таниш вува. Гьаддиз увкан узухъ сабурниинди хъпехъуб тӀалаб апӀурза.

⁴ Вари жугьдариз, фици узу жигьил вахтнахъанмина йиз халкьдин арайиъ, хъасин Ерусалимдиъ яшамиш шули гъахьнуш, аьгъя.

⁵ Дурариз узу ухдихъанмина аьгъя ва, чпиз ккун гъабхьиш, дурарихьан узу фарисей вуди хьуваликан ва ихь диндиз тялукь вуйи ижми саягънан уьмур хъапӀри хьуваликан шагьидвал апӀуз шулу.

⁶ Гьамус узу, Аллагьди ихь абйириз туву гафнак умуд кивбаз лигну,

⁷ йигъ-йишвди Аллагьдиз гъуллугъ апӀури, ич йицӀикьюб тухми думу гаф тамам хьпак умуд кивбаз лигну, суддин улихь дийигъназа. Магьа гьаму умудназ лигну, Агриппа паччагь, жугьдари узу тахсиркар апӀура.

⁸ Уву, Аллагьдихьан гъачӀидар чӀиви апӀуз хьуб мумкин дарубси гьисаб апӀурана?

⁹ Сифтейиан узура, Назаретдиан вуйи Исайин гафназ къаршу вуйи гизаф ляхнар апӀуб лазим ву, кӀури, гьисаб апӀуйза.

¹⁰ Узу гьадрар вари Ерусалимдиъ апӀурийза. Мидкан аьхюну маллйирихьан гьюкум гъадабгъну, аьхючӀвеъ Исайихъ хъугърайидар дустагъдиъ ирчунза. Хъа Исайин ученикар йивну йихру вахтна, узу мидʼин рази шуйза.

¹¹ Узу дурар вари мистариъ, дурарихьди чпин хъугъувал батӀул апӀуз гъитуз чалишмиш шули, жаза туври гъахьнийза. Дурарихьна йиз даккнишин гьадмукьан гъатиб вуйики, узу дурарихъ хъергуз жара шагьраризра кмиди гъягъюйза.

¹² Гьациб кьаст ади узу сабан, аьхюну маллйирин гьюкум ва табшуругъар хьади, Дамаскдиз гъушнийза.

¹³ Лисун шулайи вахтна, узу рякъюъ айиган, ригъдинтӀан гужли аквну, завариан гъюри, узуна узухъ хъайидар ккаънийи.

¹⁴ Учу вари жилʼина алдакчу, ва узуз узухъди жугьуд чӀалниинди улхурайи гьамциб дих гъеебхьзуз: «Эй Саул, Саул! Уву Узухъ гьаз хъергнава? Аллагьдиз къаршу гъудужвну, жвуваз писвал апӀурава».

¹⁵ Хъа узу: «Уву фуж вува, Агъа?» – пну, гьерхза. Ва Агъайи узуз жаваб туву: «Узу уву хъергнайи Иса вуза.

¹⁶ Ликриина гъудужв. Гьеле увуз гъябкъюб гъубзри, хъа Узу увуз улупуз ккимбубдинра шагьид шлу, Йиз гъуллугъчиди дерккуз увухьна ачухъ духьназа.

¹⁷ Узу уву яв халкьдихьан уьрхидиза ва жугьуд дарударихьна гьаъдизаву. Хъа дурарихьанра увуз зарар тувуз хьибдар.

¹⁸ Уву дурарин улар арццну, дурар мучӀушнахьан аквнахьна, иблисдин гьюкмиккан Аллагьдихьна хидива. Дурарихьан гьамци чпин гунгьарилан хил алдабгъувал ва Узухъ хъугъбиинди Аллагьдин терефназ гъафидарин арайиъ чпиз йишв гъазанмиш апӀуз хьибди».

¹⁹ Гьаци вуйиган, паччагь Агриппа, узхьан аьршарин амрихъ хъпебехъди гъузуз гъабхьундарзухьан.

²⁰ Хъа Дамаскдиъ, гьацира Ерусалимдиъ ва вари уьлкейиъ, хъасин жугьуд дарударин арайиъра, дурари, чпин тахсрар гардандиъ дидисну, Аллагьдихьинди илдицбан бадали ва чпин ляхнариинди му тасдикь апӀбан бадали, аьгъювалар улупуз хъюгъюнза.

²¹ Гьамдин кӀуллан жугьдариз, узу Аллагьдин хулаъ айи вахтна, дидисну йикӀуз ккун гъабхьну.

²² Хъа Аллагьди узуз, гъийин йигъазкьан кюмек апӀура. Дугъан кюмекниинди узу гъи, бицӀидариз ва аьхюдариз шагьидвал апӀури, пайгъамбрари ва Мусайи гьаци хьибди гъапибдилан гъайри, фукӀара жара артухъуб гъапундарза.

²³ Месигь йикӀиди ва гъийихдарикан сарпирди, гъачӀихъан, чӀиви хьиди, ва Дугъу гьам жугьдариз, гьамсана жара халкьариз акв хибди.

Агриппа хъугъувалиина хуз Павелин чалишмишʼвал

²⁴ Павел учв уьрхюз улхури имиди, Фестди зарб сесниинди: – Павел, уву деллур вува! Аьхю зигьимлували уву аькьвлиан адаънаву! – кӀуру.

²⁵ – Узу деллур дарза, гизаф гьюрматлу Фест, – жаваб туву Павели. – Узу кӀурайиб гьякьлуб ва фагьумлуб вуйиз.

²⁶ Паччагь Агриппайиз мидкан аьгъя ва узу дугъахъди ачухъди кӀураза. Узу фикир апӀуразаки, дугъу йиз вари гафариз фикир тутрувди гъидрибтур, фицики мурар вари гизафдариз рякъюри гъашидар ву.

²⁷ Паччагь Агриппа! Уву пайгъамбрарихъ хъугъурна? Уву хъугърайиб аьгъязуз.

²⁸ Гьадмуган Агриппайи Павелиз кӀуру: – Уву, узу гьамци рягьятди Исайихъ хъугърур хьуз шул кӀури, фикир апӀурана?

²⁹ – Рягьятди вуш вая читинди вуш, му метлеблу дар, – жаваб туву Павели. – Неинки уву, хъа гъи узухъ хъпехъурайидар вари узусдар хьузди, амма зунжрар алдарди, Аллагьдиз ккарагураза.

³⁰ Гьадмуган паччагь, гьякимдар Фест, Вереника ва дурарихъди деънайидар вари гъудужвуру.

³¹ Диванханайиан удучӀвну, чпи-чпихъди гьамци улхуру: – Му касди йикӀбаз вая дустагъ апӀбаз лайикьлу вуйи саб чӀуру ляхинра дапӀнадар.

³² Агриппайи Фестдиз гъапи: – Му кас, эгер дугъу Римдин паччагьдин улихь жаваб тувуз ккун дапӀнадайиш, азад апӀузра шуйи.