Ляхнар 22 - Гирами Китаб

Павелин улхуб

¹ «Гъардшарна абйир, гьамус узу тахсиркар дарувалихъ хъебехъай».

² Павел чпихъди жугьуд чӀалниинди улхуради деебхьну, дурар хъанара яваш шулу. Гьадмуган дугъу кӀуру:

³ – Узу Киликияйиъ айи Тарсдиъ бабкан гъахьи жугьуд вуза, хъа узу мушваъ, гьаму шагьриъ тербияламиш гъашир вуза. Йиз мялим Гамалиили узу ихь абйирин къанунар дишди уьрхрурси тербияламиш гъапӀну. Учву гъи фици вуш, узура гьаци кӀваантӀан Аллагьдин гъуллугъниин алди гъахьнийза.

⁴ Агъайин рякъюъди гъягъюрайидар йихури, жилар ва дишагьлийир дисури, дустагъ апӀури гъахьнийза.

⁵ Мидкан аьхюну маллйирихьан ва кавхйирин мажлисдихьан шагьидвал апӀуз шулу. Дамаскдиъ айи жугьуд дустариз вуйи кагъаз узухьна гьадрари тувунзухьна. Узура, душван хъугънайидар, рукьари йитӀну, Ерусалимдиз духну, жаза гьадабтӀуз, гьадина гъушунза.

⁶ Хъа рякъюъ, Дамаскдиз багахь шулайиган, лисун шулайи арайиъ саб дупну завариан узу зурба вуйи аквну ккаунзу.

⁷ Узу жилʼина алдакза, ва узуз гьамци кӀурайи дих гъеебхьзуз: «Эй Саул! Саул! Уву Узухъ гьаз хъергнава?»

⁸ Узу гьерхза: «Уву фуж вува, Агъа?» Дугъу узуз жаваб туву: «Узу уву хъергнайи Назаретдиан вуйи Иса вуза».

⁹ Узухъди хъайидариз акв гъябкънийи, хъа узухъди улхурайи дих дурари аннамиш гъапӀундайи.

¹⁰ Гьадмуган узу гъапунза: «Узу гьапӀну ккунду, Агъа?» Агъайи узуз гъапунзуз: «Гъудужвну, Дамаскдиз гъарах, хъа душваъ, уву фу дапӀну ккундуш, пидивуз».

¹¹ Узуз фукӀа дярябкъди гъабшизуз, фицики зурба аквну кур гъапӀнийзу. Гьаддиз узухъди хъайидари, йиз хил дибисну, Дамаскдиз гъахнийзу.

¹² Ва магьа, Аллагь кӀваин али ва къанунариз мютӀюгълу, чакан вари жугьдар ужуди улхру Ананай кӀуру касди,

¹³ узухьна дуфну, гъапизуз: «Саул гъардаш! Рябкъюри йихь!» Гьамци гъапибси, узуз думу гъяркъзуз.

¹⁴ Хъа дугъу узуз гъапизузки: «Ихь абйирин Аллагьди Чан ният увуз аьгъю хьпан бадали, Гьякьлур рякъбан бадали ва Дугъан мелзналан дих ебхьбан бадали уву кадагъна.

¹⁵ Уву вари инсанарин улихь увуз гъябкъюбдинна гъеебхьубдин шагьид хьидива.

¹⁶ Гьаци вуйиган, уву фтиз ккилигурава? Гъудужвну, штуан йихь, Агъа Исайихъ хъугъувалиинди яв гунгьарихьан марцц йихь».

¹⁷ Узу Ерусалимдиз хътакиган, Аллагьдин хулаъ ккарагурайи вахтна, узуз аьжайибди саб гъябкъзуз.

¹⁸ Узуз гьамци кӀурайи Иса гъяркъзуз: «Тяди Ерусалимдиан гъарах, фицики дурари Йиз гьякьнаан вуйи яв шагьидвал кьабул апӀидар».

¹⁹ Узу Дугъаз гъапиза: «Я Агъа, дурариз, узу фици Увухъ хъугърайи адмийир дустагъ апӀури, урччвури гъахьнуш, аьгъя.

²⁰ Яв шагьид Стефандин ифи удубзруганра, думу ляхниин рази духьну, дугъаз йивурайидарин палтар уьрхюри, гъаравлиъ гъахьунза».

²¹ Гьадмуган Агъайи узуз гъапи: «Гъарах, Узу уву ярхлариз, жугьуд дарударихьна гьаъразаву».

Павел – Римдин ватандаш

²² Гьамусдиз дурар Павелихъ хъпехъури айи, хъа му гафар гъеерхьиган, чӀигъар апӀуз хъюгъру: – Думу йивну йикӀай! Думу дюнʼяйиин яшамиш хьуз лайикь дар!

²³ Дурари, чӀигъар апӀури, чпин палтар хътитури, завуз бишируг гатӀабхьуйи. Гьамци дурари чпин хъял улупуйи.

²⁴ Кьушмарин аьхюри Павел, эскрарин йишваз духну, дугъкан дицдар чӀигъар гьаз апӀураш, аьгъю апӀбан бадали, гъирмажи урччвуз буйругъ тувру.

²⁵ Хъа Павел урччвбан бадали йитӀурайиган, дугъу гьадушвахь хьайи юзбашийихьан гьерхру: – Суд дарапӀди, Римдин ватандаш урччвуз ихтияр анчвуз?

²⁶ Му гафар гъеерхьиган, юзбашийи, кьушмарин аьхюрихьна душну, кӀуру: «Уву гьапӀрава? Му кас Римдин ватандаш ву!»

²⁷ Кьушмарин аьхюри, Павелихьна дуфну, гьерхру: – Йипа, уву дугъридан Римдин ватандаш вуна? – Ав, – пну, жаваб туву Павели.

²⁸ Кьушмарин аьхюри гьадмуган: – Узу гьаму ватандашʼвал аьхю пуларихъ гъадабгъунза, – гъапи. Хъа Павели кӀуруки: – Хъа узу гьадму ватандаш вуди бабкан гъахьунза.

²⁹ Павелихьан силис гъадабгъуз ккайидар дугъхьан дишлади гьудучӀву. Чав Римдин ватандаш зунжрари йитӀувал аьгъю гъабшиган, кьушмарин аьхюризра гучӀ гъабхьнийи.

Павел аьхю суддин улихь

³⁰ Хъайигъан кьушмарин аьхюри, жугьдари Павелик фу тахсир кипраш, якьинди аьгъю апӀбан бадали, аьхюну маллйиризна вари аьхю суддиз уч хьуз буйругъ тувру. Павелилан зунжрар алдагъну, думу дурарин улихь дерккру.