Ляхнар 21 - Гирами Китаб

Ерусалимдиз рякъюъ

¹ Дурарихьан жара духьну, учу гимийиъди дишди Кос, хъайигъан Родос кӀуру островариина, хъа дилин Патара шагьриз гъафнийча.

² Финикияйиз гъябгъру гими дабгну, дидиъ эъну, рякъюъ учӀвча.

³ Киприн кафари терефнахъантина душну, учу Сирияйиз гъафича ва Тир шагьриъ дергча, фицики душваъ гимийиан гъагъар адагъну ккундийи.

⁴ Душваъ учуз ученикар гъидихъчуз ва дурарихъди саб гьяфта адапӀча. Гирами Рюгьнан амриинди дурари Павелиз, Ерусалимдиз мягъян, кӀури гъахьну.

⁵ Ич душваъ шлу вахт ккудубкӀиган, учу дилин удучӀвну, ич рякъ давам гъапӀча. Ученикари, чпин хпарна веледар хъади, учу шагьриантина рякъюъ тӀаънийи, хъа гьюлин гъирагъдихъна гъафиган, учу кьамкьариина ис духьну, ккарагнийча.

⁶ Дурарикан гьарурихъди, баркаллагь дупну, учу гимийиз за гъашича, хъа дурар чпин хулариз хътаку.

⁷ Учу, рякъ давам апӀури, Тириан Птолемаида шагьриз гъафича ва душваъ гъардшар тебрик дапӀну гъафи йигъ гьадрарихъди адапӀча.

⁸ Хъайигъан рякъюъ учӀвну, учу Къайсарияйиз гъафича ва Ерусалимди кадагънайи ургур гъардшикан сар вуйи Ужувлан хабар рабгъру Филипдин хулаъ дергча.

⁹ Дугъаз швуваз душну адру, пайгъамбарвалин гафар кайи юкьур риш айи.

¹⁰ Учу душваъ сакьюдар йигъар адаъхъан, дина Ягьудияйиан Агав кӀуру пайгъамбар гъафнийи.

¹¹ Учухьна дуфну, дугъу, Павелин чӀул гъадабгъну, дидихъди чан ликарна хилар йитӀну, гъапнийи: – Гирами Рюгьну гьамци дупна: «Ерусалимдин жугьдари му чӀулин эйси магьа гьамци йитӀиди ва аллагьсузарин хилиз тувди».

¹² Му гафар гъеерхьиган, учу ва душваъ айи адмийир вари Павелиз, Ерусалимдиз мягъян кӀури, ккарагуз хъюгъча.

¹³ Гьадмуган Павели жаваб тувру: – Учву гьапӀрачва? Гьаз, ишури, йиз юкӀв дар апӀурачва? Узу, йитӀуб гъубзри, хъа гьацира Агъа Исайин ччвурнахъ Ерусалимдиъ йикӀузра гьязур вуза.

¹⁴ Думу, учу кӀурайибдихъинди илтӀикӀуз дархьиган, «Гъит Агъайин амур ибшри», – пну, гъитча.

Павел Ерусалимдиз гъюб

¹⁵ Гьадму йигъарихъан гьязур духьну Ерусалимдиз гъушча.

¹⁶ Къайсарияйиан сакьюдар ученикарра учухъди гъафнийи. Дурари учу ухдихъанмина ученик вуйи кипржви Мнасондихьна хъади гъафнийи. Учу гьадгъахь дергча.

¹⁷ Ерусалимдиз гъафиган, гъардшари учу хушниинди кьабул гъапӀнийи.

¹⁸ Хъайигъан Павел учухъди Якьубдин хулаз гъафнийи. Душваъ вари хъугънайидарин аьхюдар уч духьнайи.

¹⁹ Павели, дурариз салам тувну, жугьуд дарударин арайиъ Аллагьди чан хилариинди гъапӀу вари ляхнарикан хъайи-хъайиси ктибтуру.

²⁰ Мидкан гъеебхьиган, дурари Аллагьдин ад апӀуру ва Павелиз кӀуру: – Гъардаш, увуз хъугъувалиина дуфнайи швнуд-сад агъзур жугьуд гъяркъюнвуз, амма дурар вари Къанун уьбхбан ижми терефкрарди ими.

²¹ Уву жугьуд дарударин арайиъ айи вари жугьдариз, дурари ихь аьдатар дюрюхри, веледарин суннат дарапӀри, Мусайин къанунар кӀули дурухри пну, аьгъювалар тувра, кӀури, дурариз увкан деебхьна.

²² Гьаци вуйиган ухьу гьапӀхьа. Дурариз, икибаштӀан, уву гъюбкан ебхьиди.

²³ Гьаддиз учу кӀуруб апӀин: ич арайиъ Аллагьдиз ху дапӀнайи юкьур кас а.

²⁴ Дурарихъди душну, марцц хьпан аьдат тамам апӀин. Дурарихьан чпин кӀулар ултӀукъуз шлуганси, дурари гъапӀу харжарин пул уву тув. Гьадмуган варидариз увкан кӀурайиб гьякь дарувал ва увура къанундиз мютӀюгъ шулайивал аьгъю хьибди.

²⁵ Хъугъувалиина гъафи жугьуд дарударикан гъулхиш, дурариз учу, идолариз гъурбан гъапӀу йикк, бугъмишди гъабкӀибдин йикк дирипӀри, ифи дурубхъри ва кьяппавал дарапӀри пну, кагъаз хътапӀунча.

²⁶ Гьамци хъайигъан Павели, гьаму касар чахъди хъади душну, марцц хьпан аьдат тамам апӀуру. Хъасин, марцц хьпан йигъар фила ккудуркӀуруш ва дурарикан гьарурихъанди гъурбнар фила апӀуруш, аьгъю апӀбан бадали, Аллагьдин хулаз гъюру.

Павел дисуб

²⁷ Аьдатниинди дерккнайи ургуд йигъ улдубчӀвиган, Асияйиан вуйи жугьдариз думу Аллагьдин хулаъ ади рякъюру. Дурари халкьдик гъалабулугъ кипру ва, гьамци чӀигъар апӀури, думу дисуру:

²⁸ – Израилин агьалйир! Кюмекназ гъачай! Му жви инсанар къанундиз, ихь халкьдиз ва ихь Аллагьдин хулаз къаршу вуди дих апӀурайи кас ву. Мидихьна мугъу, Аллагьдин хулаз грекарра хъади дуфну, ихь гирами йишв чиркин гъапӀну.

²⁹ Дурариз, улихь йигъари шагьриъ дугъахъ Эфесдиан вуйи Трофим хъади гъяркъган, Павели думура Аллагьдин хулаз хъади дуфнайиси гьибгънайи.

³⁰ Шагьриъ гъалабулугъ абхъру, варишварихъанди адмийир, жаргъури дуфну, уч хьуз хъюгъру. Дурари Павел, дидисну, гужназ Аллагьдин хулʼан адагъуру ва дишла раккнар хъяркьру.

³¹ Дурариз Павел йикӀуз ккун гъабхьиган, кьушмарин аьхюрихьна, вари Ерусалимдик гъал кабхъна пну, хабар гъябгъюру.

³² Дугъу, эскрарна юзбашйир гъадагъну, гьадина гьяракат апӀуру. Аьхюрна эскрар гъяркъиган, дурари Павел урччвувал дебккру.

³³ Гьадмуган аьхюри, дуфну, думу дидисну, кьюриз думу зунжрари йитӀуз буйругъ тувру ва гьерхру: – Му фуж ву? Мугъу фу гъапӀну?

³⁴ Халкьдин арайиан сари саб, тмунури саб кӀури, чӀигъар апӀурайи. Дурарин гъугънагъян гъаври ахъуз даршиган, аьхюри Павел эскрарин йишваз гъахуз гъитру.

³⁵ Павел умбрарихьна гъахиган, эскрари гьадлантина думу хилариинди гъахуру, гьаз гъапиш халкьдин гъварчну думу парчйир апӀуб мумкин вуйи.

³⁶ Дурари, дугъахъ хъергну: – Думу йивну йикӀай! – кӀури, чӀигъар апӀурайи.

³⁷ Эскрари чав гьадрарин йишваъ аърайиган, Павели кьушмарин аьхюрихьан гьерхру: – Увхьан гьерхуз хай шулин? Дугъу жаваб тувру: – Увуз грек чӀал аьгъявузки!

³⁸ Дици вуш, багарихьди гъалабулугъ гъитӀибккну, ичӀи чюлиз юкьуд агъзур гъачгъар адау Египетжви уву вуна?

³⁹ Хъа Павели жаваб тувру: – Узу Киликияйиан вуйи жугьуд вуза, аьгъю Тарс шагьрин ватандаш вуза. Увкан миннат вуйиз, узухь халкьдихъди улхуз гъит.

⁴⁰ Гьадмуган дугъу ихтияр тувру. Павелира, умбриина за духьну, халкьдиз хилин ишара апӀуру. Хъа вари яваш гъашиган, думу жугьуд чӀалниинди улхуз хъюгъру.