Ляхнар 2 - Гирами Китаб

Аьршариан Гирами Рюгь гъюб

¹ ХьуцӀдарин машквраз вари Исайин вакилар сабишвʼина уч гъахьнийи.

² Сабпну завариан тӀурфансиб микӀлан сес шулу ва вакилар айи хал абцӀру.

³ Дурарин улихьна цӀин мелзарстар гъядахьну, жара шули, гьаруриина саб алабхъуру.

⁴ Хъа вари Гирами Рюгьнахъди ацӀру, ва жара чӀалариинди улхуз хъюгъру, фицики гьаци хьувал дурариз Гирами Рюгьну бахш гъапӀнийи.

⁵ Гьадму вахтна Ерусалимдиъ дюнʼяйин жюрбежюр юрдариан вуйи динагьли жугьдар яшамиш шулайи.

⁶ Гьадму сес гъабшиган, дурар уч шулу ва гизаф мюгьтал шулу, гьаз гъапиш вакиларикан гьарсар дурариз чан чӀалниинди улхурайиси гьибгърайи.

⁷ Вари гьяйран ва аьламат духьнайи: – Мегер гьаму улхурайи касар вари Галилейин агьалйир вуйин? – кӀури, чиб-чпин арайиъ гьерхрайи. –

⁸ Дици вуш, ухьуз дурар ихь бабан чӀалариинди улхурайиси гьаз гьибгърайкӀан?

⁹ Ихь арайиъ Парфияйин, Мидияйин, Эламдин ва Месопотамияйин, Ягьудияйин, Каппадокияйин, Понтайин ва Асияйин агьалйирра айихь,

¹⁰ Фригияйинна Памфилияйин, Египетдин ва Киринеяйиз багахь юрдариан ва Римдин агьалйирра,

¹¹ гьацира Критдин, Аравияйин агьалйирра, жугьдарра, дин кьабул гъапӀу аллагьсузарра айихь – вушра ухьуз варидариз Аллагьдин зурба ляхнарикан дурари ихь багъри чӀалариинди ктитурайиганси ебхьурахьуз.

¹² Гьамци вари гьяйран духьнайи ва, дубхьнайибдин гъавриъ адрахъди, «Му фу ляхин вуйкӀан?» кӀури, чиб-чпигъ гьерхрайи.

¹³ Хъа бязидари кялхъбахъди: «Дурари гизаф чяхир дубхънайи гьял ву», – кӀурайи.

¹⁴ Гьадмуган Петри, йицӀисаридра хъади гъудужвну, халкьдихьинди илдицну, кӀуру: – Эй жугьдар ва Ерусалимдиъ яшамиш шулайи вари агьалйир! Узу учву му ляхнин гъаври тӀаъдиза. Йиз гафарихъ дикъатлуди хъебехъай!

¹⁵ Учву фикир апӀурайиси, учу пиянди адарча, фицики гьеле гвачӀниндин сяаьт урчӀвубтӀан дар.

¹⁶ Хъа учву гъурхуб Яил пайгъамбрилантина дибикӀнайиб ву:

¹⁷ «Гьаци хьибди аьхиримжи йигъари, – кӀура Аллагьди, – Узу Йиз Рюгь вари инсанариина улурзидиза. Ичв баярина шубари аьяндар гафар пиди ва ичв живанариз аьламатнан рякъбар рякъиди, хъа ичв кьабидариз фагьумлу нивкӀар рякъиди.

¹⁸ Ав, гьадму йигъари Узу Йиз Рюгь Йиз лукӀариина: гьам жилариина, гьамсана хпариина улурзидиза, ва дурарира хьуз ккайиб улихьмиди кӀури хьиди.

¹⁹ Узу завариин ва жилариин гьамцдар аьламатнан лишнар: ифи, цӀа ва кумран дифар – улупидиза.

²⁰ Ригъ – мучӀу, хъа ваз ифиси уьру хьибди, Агъайин зурба ва адлу йигъ улубкьайиз.

²¹ Агъайин ччвур дибисну ккарагу гьарсар кас уьрхиди».

²² Эй Израилин агьалйир! Гьаму йиз гафарихъ хъебехъай: Назаретдиан вуйи Исайихь Аллагьдин гьюкум хьайи. Аллагьди Чан гьюкум Гьадгъуантина гъапӀу аьламатнан, аьжайиб ва зурба ляхнариинди улупну. Му учвузра аьгъячвуз, фицики гьадму ляхнар ичв улихь гъашидар ву.

²³ Аллагьди улупнайиганси Тувнайир учву, кьумариинди хачрак карсну, къанунсузарин хилариинди гъакӀунчва.

²⁴ Хъа Аллагьди, аьжалин кьюкьяр дармадагъин дапӀну, Думу чӀиви гъапӀну, фицики Думу аьжалихьан дерккуз гъабхьундайи.

²⁵ Фицики Давудри Исайикан гьамци кӀура: «Узуз Агъа гьарган йиз улихь хьади рякъюразуз. Дугъу, йиз арччул хилихъ дийигъну, узу уьрхюрайи.

²⁶ Мидʼин йиз юкӀв шад гъабхьну, йиз мелзну гьарган Яв тяриф апӀура. Йиз беденра кмиди архаинвалиъ а, ва узу умуд ктабтӀурадарза,

²⁷ фицики Уву йиз рюгь жегьеннемдиъ гъидрибтарва ва Яв Марцци Кас накьвдиъ утӀуз гъитидарва.

²⁸ Уву узуз уьмрин рякъ ачухъ гъапӀунва, Уву йиз улихь хьайивали узу шадвали ацӀди».

²⁹ Эй йиз чвйир! Узхьан учвуз ихь абйирин аба Давудрин гьякьнаан саб шак адарди пуз шулзухьан: думу гъакӀну ва думу киву накьв гъийин йигъазкьан имихьухь.

³⁰ Учв пайгъамбар вуди хьпаз дилигну, дугъаз, учв али тахтниина чан насларикан сар дитуз Аллагьди аьгьт дапӀнайиваликан аьгъяйи.

³¹ Дугъаз Месигь гъачӀихъан чӀиви шлубдиканра аьгъяди гъабхьну, фицики дугъу гьамци кӀура: «Месигь гъийихдарин паччагьлугъдиъра гъитдар, ва Дугъан беденра накьвдиъ убтӀидар».

³² Аллагьди гьадму Иса чӀиви гъапӀну, ва учу вари мидин шагьидар вуча.

³³ Гьамус Думу аьршариин Аллагьдин арччул хилихъ деъна. Дугъу Адашдихьан тувурза дупнайи Гирами Рюгь кьабул гъапӀну ва Гьадму, учвуз рябкъюрайиси ва ебхьурайиси, учʼин улурзну.

³⁴ Давуд аьршариз за гъапӀундаршра, дугъу гьамци дупна: «Агъайи йиз Агъайиз гъапну:

³⁵ „Сабан Узу Яв душмнар Яв ликарикк дахьайизкьан, Йиз арччул хилихъ деъ“».

³⁶ Гьаци вуйиган, аьгъю йибхьайки, эй Израилин халкь, Исайикан Аллагьди Агъа ва Месигь гъапӀну, хъа учву Думу кьумариинди хачрак карсунчва!

³⁷ Му гафар гъеерхьиган, дурарин лап кӀваз тясир гъапӀнийи ва Петризна миди вуйи вакилариз дурари гьамци гъапнийи: – Хъа учу гьамус гьапӀча, гъардшар?

³⁸ Петри дурариз кӀуруки: – Ичв гунгьар гардандиъ дидисну, уьмур дигиш апӀинай. Ва ичв гунгьарилан хил алдабгъбан бадали, гьарсар кас Месигь Исайин ччвурнахъан штуан йихьай: гьадмуган учвуз Гирами Рюгь пешкеш хьиди.

³⁹ Му, учвузси, ичв веледаризра, сабан Аллагьдихьан ярхла вуйидаризра, Агъа Аллагьди, Чахьна дих дапӀнайидаризра кади, тувнайи гаф ву.

⁴⁰ Петри «аьрбатанди яшамиш шулайидарихьан ихтият йихьай» кӀури ва хъана жара гизаф гафариинди дурариз ихтият хьуз дих апӀури гъахьну.

Хъугънайидарин яшайиш

⁴¹ Дугъан гафар кьабул гъапӀдар штуан гъахьнийи; хъа гьадму йигъан хъугънайидарин кьадар шубуд агъзур кас шулу.

⁴² Дурари, гьаммишан вакиларин аьгъюваларихъ хъпехъури, чпин арайиъ сюгьбатар гъахури, сатӀиди ипӀури ва ккарагури, чпин вахт адапӀури шуйи.

⁴³ Аллагьдихьан варидариз гучӀуйи, ва Аллагьди вакиларилантина дурариз аьхючӀвеъ аьламатар ва аьжайиб лишнар улупнийи.

⁴⁴ Хъугънайидар вари сатӀиди гъузнайи, ва вариб дурарин уртахъди вуйи.

⁴⁵ Дурари чпин мал-мулк масу туври ва дарвал кайидариз пай апӀури гъахьну.

⁴⁶ Дурар гьар йигъан Аллагьдин хулаз уч шуйи ва уьлра кмиди чпин хулариъ сатӀиди ипӀуйи, сари-сариз разивалиинди хураг гьиври, шадди яшамиш шуйи.

⁴⁷ Гьацира дурари, Аллагьдин тяриф апӀури, вари халкь чпихъди ужуди хьубʼин шадвал хъапӀри гъахьну. Ва гьар йигъан, Аллагьдихъ хъугънайидарихьна, гунгьариккан азад гъаши касар артухъ шуйи.