Ляхнар 18 - Гирами Китаб

Павел Коринфдиъ хьуб

¹ Дидхъан Павел, Афинайиан удучӀвну, Коринфдиз гъюру.

² Душваъ дугъаз Понт юрднаан вуйи Акила кӀуру сар жугьуд дихъуру. Думу чан шив Прискилайихъди Италияйиан удучӀвну дуфнайир вуйи, фицики Римдин паччагь Клавдийи вари жугьдариз Римдиан удучӀвну гъягъюз буйругъ дебккнайи. Павел дурариин улуркьуз гъафнийи.

³ Дурари чадрар дирхурайиб, яна Павели чав улихьди апӀури гъаши кеспи апӀурайиб, аьгъю гъабшиган, дурарихъди гъузну, лихуз хъюгъру.

⁴ Гьар султ йигъан дугъу мистаъ, жугьдарна грекар хъугъувалиина хури, аьгъювалар улупури гъахьну.

⁵ Силана Тимофей Македонияйиан гъафиган, Павели чан вари вахт жугьдариз Иса Месигь вуйивал улупбаз харж апӀури гъахьну.

⁶ Дурари, мидʼин рази даршули, дугъаз люкьнар апӀури гъахьну, хъа дугъу чан ликарик кайи бишируг гьадму адмийириина кутӀубччвну, гъапи: – Учву ичв уьмрин тахсиркрар хьидичва. Ичв кӀулʼина гъюрубдин узу жаваб тувидарза. Гьамус узу жугьуд дарударихьна гъягъюраза.

⁷ Хъа думу удучӀвну, мистан гъвалахъ хъайи, Аллагь кӀваъ уьрхюрайи Юст кӀуру касдин хулаз гъюру.

⁸ Мистан аьхюр вуйи Криспдира, чан вари хизандихъди, Агъайиина хъугъувал гъабхнийи. Гьацира Павелихъ хъпехъу коринфлуйирикан гизафдари, хъугъувалиина дуфну, чпи штуан апӀуз гъитру.

⁹ Сад йишван Агъайи аьжайиб рябкъбаъ Павелиз гъапну: – ГучӀ мапӀан! Адмийирихъди улхбар давам апӀин ва меккебехъан.

¹⁰ Фицики Узу увухъди хъаза ва гьич сарихьанра увуз писвал апӀуз хьибдар, гьаз гъапиш му шагьриъ Йиз адмийир гизаф айиз.

¹¹ Павел душваъ, агьалйириз Аллагьдин Гаф улупури, йисна гьацӀаъ гъузру.

¹² Гьадму вахтна Ахая уьлкейин гьякимдар Галлион вуйи. Магьа жугьдар сатӀиди Павелиин алархьуру ва думу суддиз хуру. Дурари гьамци кӀуйи:

¹³ – Гьаму касди адмийириз, Къанундин къайдйирихъди дарди, Аллагьдиз икрам апӀуз улупура.

¹⁴ Павели ушв абццайизра, Галлионди жугьдариз кӀуру: – Эгер саб чӀуру ляхин вая хатӀа дубхьнайиш, узуз учвухъ, жугьдарихъ, хъпехъуз себеб шуйзуз.

¹⁵ Хъа ляхин ялгъуз гъапи гафариъна, ччвурариъна, ичв къанунариъ аш, му месэла учву гьял апӀинай. Узуз му ляхнин диванбеги хьуз ккундарзуз.

¹⁶ Гьамци дупну, дугъу дурар диванханайиан утӀурккуру.

¹⁷ Варидари, мистан аьхюну малла Сосфен дидисну, думу диванханайин улихь урччвуз хъюгъру, хъа мидкан Галлиондиз гьич вижнара ктайи.

Павел Антиохияйиз хътакуб

¹⁸ Коринфдиъ хъана хайлин йигъари гъузу Павели, гъардшар душваъ гъитну, Акилана Прискилла хъади Сирияйиз сирнав апӀуру. Кенхерея портнаъ Павели, чав Аллагьдиз Гаф тувиганси, чан кӀул алдапӀуру.

¹⁹ Дурар Эфесдиз гъафиган, Павели Прискилана Акила душваъ гъитну, учв жугьдарихъди сюгьбатар апӀбан бадали, мистаз гъюру.

²⁰ Дурари дугъкан чпихъди шлубкьан кьаназ гъузуб тӀалаб апӀуру, хъа Павел рази гъахьундайи.

²¹ УдучӀвну гъягъруган, «Эгер Аллагьди амур гъапӀиш, узу учвухьна хъадакну гъидиза», – пну, Павел Эфесдиан, баркаллагь дупну, гъягъюру.

²² Къайсарияйиъ гимийиан эдеъну, думу Ерусалимдиз рякъюъ учӀвру ва, дина гъафири, душван хъугънайидар тебрик апӀуру, хъасин Антиохияйиз гъягъюру.

²³ Душваъ сацӀиб вахтна гъузбалан кьяляхъ, дугъу чан рякъ давам апӀуру ва, Галатияйиъна Фригияйиъ шагьриан шагьриз гъягъюри, душвариъ вари ученикарин хъугъувал мюгькам апӀури гъахьну.

Аполлос

²⁴ Душваъ Аполлос кӀуру Александрия шагьриан вуйи БикӀбарин гъаври айи ва ушвниъ ужуб чӀал айи жугьуджви айи. Думу сабан Эфесдиз гъафнийи.

²⁵ Думу Агъайин рякъярин гьякьнаан гъаврикк ккайи кас вуйи. Анжагъ Ягьʼяйи штуан апӀбакантӀан деебхьнадашра, дугъу Исайин гьякьнаан аьшкьлуди ва дюзди аьгъювалар улупури шуйи.

²⁶ Мидкан дугъу мистаъ дирбашди улхуз хъюгъру. Хъа Прискилайина Акилайи, дугъан гафар гъеерхьиган, думу чпин хулаз духну, Аллагьдин рякъюн гьякьнаан хъанара дишди гъаврикк ккаъру.

²⁷ Хъа дугъаз Ахаяйиз гъягъюз ккун гъабшиган, гъардшари, дугъаз ягъур ибшри дупну, душван ученикариз, думу кьабул апӀри, пну, кагъазра бикӀуру. Аполлос дина гъафиган, Аллагьдин ужувналан хъугъдариз дугъу аьхю кюмекар апӀуру.

²⁸ Иса Месигь вуйивал БикӀбариинди улупури, дугъу вари халкьдин улихь жугьдар дюз дарувал ужуди улупуйи.