Ляхнар 16 - Гирами Китаб

Павеликна Силайик Тимофей ктикьуб

¹ Дилин Павел Дервияйиз, хъасин Листрайиз гъюру. Душваъ Тимофей кӀуру сар ученик айи. Дугъан дада хъугънайи жугьуд дишагьли вуйи, хъа адаш грек вуйи.

² Листрайиъ ва Иконияйиъ айи гъардшар дугъкан ужуди улхури шуйи.

³ Павелиз Тимофей чахъди рякъюъ учӀвну ккунди айи. Гьаддиз дугъу Тимофейин суннат гъапӀнийи. Мидʼинди Павелиз душваъ айи жугьдариз хуш шлуб апӀуз ккунди айи, фицики дурариз варидариз Тимофейин адаш грек вуйиб аьгъяйи.

⁴ Ва дурари, шагьрариан шагьрариз гъягъюри, хъугъвалиина гъафидариз Ерусалимдиъ вакилари ва хъугънайидарин аьхюдари адагъу къарар, дурар тамам апӀруганси, ктитури гъахьну.

⁵ Гьамци хъугънайидар хъугъувалиъ мюгькам шули ва дурарин кьадар йигълан-йигъаз артухъ шули гъахьну.

Павелиз Македонияйиз дих апӀуб

⁶ Павел ва дугъахъди хъайидар Фригияна Галатия уьлкйириантина гъягъюру, амма Гирами Рюгьну дурарихьди Асия уьлкейиъ аьгъювалар улупуз гъитундар.

⁷ Мисия уьлкейин сяргьятарихъна дуфну, дурариз Вифания юрдназ гъягъюз ккун шулу, амма Гирами Рюгьну дурариз манигъвал апӀуру.

⁸ Гьамци, Мисияйиъ удручӀвди, дурар Троада шагьриз гъюру.

⁹ Йишвну Павелиз Македония уьлкейин касди, чан улихь дийигъну аьжайиб саягъниинди: – Македонияйиз дуфну, учуз кюмек апӀин, – кӀури, миннат апӀуради рябкъюру.

¹⁰ Му гъябкъюбси, учу дишлади Македонияйиз гъягъюз кьатӀъ гъапӀунча, фицики Аллагьди дурариз Ужувлан хабар гъайибхай кӀура, пну, фикир гъапӀунча.

¹¹ Троадайиан гимийиъди рякъюъ учӀвну, дилин сифте Самофракия островдиина, хъайигъан Неапол шагьриз гъафунча.

Филипияйиз гъюб

¹² Дилинра учу Римдиан гъафидар яшамиш шулайи Македонияйин сабпи пайнан Филипия шагьриз гъафича, ва душваъ садшвнуд йигъ гъабхьнийич.

¹³ Султ йигъан шагьриан нирихъна удучӀвнийча. Душвахъ, аьдат вуйиси, гъудгнар апӀру хал хъайи. Гьадина уч духьнайи дишагьлийирихъди деъну, сюгьбатар апӀурайча.

¹⁴ Душваъ Фиатир шагьриан вуйи багьа уьру парчайин алвер апӀру Лидия кӀуру сар дишагьлира айи. Думу гьякь вуйи Аллагьдихъ хъугънайир вуйи. Павелихъ хъпехъурайи вахтна, Агъайи дугъан юкӀв ачмиш апӀуру, ва думу Павелин гафарихъ хъугънийи.

¹⁵ Думу ва дугъан вари хуландар штуан гъахьихъан, дугъу учкан тӀалаб апӀуру: – Эгер учву узу дугъриданра Агъайихъ хъугънайир вуди гьисаб апӀураш, йиз хулаъ яшамиш йихьай. Учура рази гъашича.

Павелна Сила дисуб

¹⁶ Саб ражари учу гъудгнар апӀру хулаз гъягъюрайиган, фал китуз шлу жин кайи ва фал китбиинди эйсйириз зурба хайир хурайи лукӀ риш алахъунчуз.

¹⁷ Павелинна ич кьяляхъди гъюри, дугъу, гьамци кӀури, чӀигъар апӀури гъахьну: – Му касар ВаритӀанзаану Аллагьдин гъуллугъчйир ву! Дурари ухьуз уьрхивалихьна рякъ улупура!

¹⁸ Гьамци думу шуру гизаф йигъари кӀури гъахьну. Павелихьан аьх апӀуз дархьиди, шурахьинди илдицну, дугъак кайи фалин жиндиз кӀуру: – Месигь Исайин ччвурнахъан увуз амур апӀураза: дугъʼан удубчӀв! Думу жинра дишлади шурʼан удубчӀвуру.

¹⁹ Хъа дугъан эйсйириз чпин хайир хътабтӀурайиб дябкъну, дурари, Павелна Сила дидисну, гужниинди базар али майдандиина гьякимарихьна гъахуру.

²⁰ Дурарихьна гъахидари кӀуру: – Му касар жугьдар ву ва дурари ихь шагьриъ гъалабулугъ ипра.

²¹ Дурари ухьу, римлуйири, кьабул вая тамам апӀуз лайикь дару аьдатар рагъура.

²² Халкьра Павелизна Силайиз къаршу шулу. Хъа гьякимари дурар, палтар илдитну, маргълихьди урччвуз буйругъ тувру.

²³ Дурар, гизаф дурччвну, дустагъдиъ итру, хъа дустагъчийиз дурар ижмишнаан гъаравликк уьрхюз буйругъ тувру.

²⁴ Мициб буйругъ гъадабгъу дустагъчийира дурар дустагъдиъ айи вартӀан айитӀ дустагъдиъ уржру ва дурарин ликар урхъар айи ацӀу кьулиъ ивну рукьарихьди йитӀуру.

Павелна Сила азад апӀуб

²⁵ ГьацӀишвар багахь шулади, Павелина Силайи, ккарагури, Аллагьдин адназ мяълийир апӀурайи. Дустагъдиъ айи дидиснайидар дурарихъ хъпехъурайи.

²⁶ Гьаму арайиъ сабпну жилар гьаци зарбди гъутӀурччвнийики, саки дустагъдин шибритӀарра ришвруси. Гьадму сяаьт вари раккнарра арццру ва вари дидиснайидариин али рукьарра алдахьуру.

²⁷ НивкӀʼан хъиргу дустагъдин гъаравулиз, вари раккнар арццнади дябкъну, ханжал уьчӀюбгъну учв йикӀуз ккун шулу, фицики дугъу, дидиснайидар гьергну пну, хиял гъапӀнийи.

²⁸ Хъа Павели: «Уву увуз хатӀа мапӀан, учу вари гьамшваъ имича», – пну, зарбди чӀигъ апӀуру.

²⁹ Гъаравли, акв апӀруб хуз гъитну, Павелна Сила айи йишвазди архьру ва, гучӀбаан гукӀни духьну, думу дурарин улихь жилʼин дахъру.

³⁰ Хъасин гъаравулчийи, дурар чӀатна адаъну, кӀуру: – Эй йиз худйир, узу уьрхбан бадали гьапӀну ккунду?

³¹ Дурари дугъаз жаваб туву: – Агъа вуйи Месигь Исайихъ хъугъ, Аллагьди уву ва яв хуландар уьрхиди.

³² Хъасин дурари гъаравулчийиз ва дугъан хулаъ айидариз варидариз Агъайин Гафнакан аьгъювалар улупуру.

³³ Гъаравулчийи, дурар чан хулаз гъахи йишван, дурарин зийнар жикӀуру, хъасин дишлади думу ва дугъан хуландар штуан шулу.

³⁴ Чан хулаз гъахи Павелизна Силайиз дугъу хураг гьивнийи, хъа дугъу ва дугъан хуландари Аллагьдихъ хъугъбиин шадвал апӀури шулу.

³⁵ ГвачӀин улубкьиган, шагьрин гьякимари: – Дустагъ дапӀнайидар деетай, – пну, дустагъдиз чпин чархачйир гьаъру.

³⁶ Дустагъдин гъаравулчийи мидкан Павелиз кӀуру: – Гьякимари, узухьна учву деетри пну, адмийир гьаъна. Гьаци вуйиган, гьамус архаинвалиинди удучӀвну гъарахай.

³⁷ Амма Павели дурариз кӀуру: – Учу суд дарапӀди, Римдин ватандашар вуйибдизра дилигди, вари халкьдин улихь дурччвну, дустагъдиъ итнийи. Хъа гьамус жиниди деетурайин? Ваъ. Гъит чпи гъюри, чпи учу адаъри.

³⁸ Чархачйири му гафар, гьякимарикна гъапиган, Павелна Сила Римдин ватандашар вуйиб гъеебхьиган, гьякимариз гучӀ шулу.

³⁹ Гьаддиз дурари, дуфну, Павелинна Силайин улихь чпилан хил алдабгъувал ккун апӀуру ва, дустагъдиан адаъну, дурарикан шагьриан удучӀвну гъягъюб тӀалаб апӀуру.

⁴⁰ Дурар, дустагъдиан удучӀвдар, Лидияйин хулаз гъюру. Душваъ гъардшарихъди дяркъну, дурарин юкӀвар аьшкьлу дапӀну, шагьриан рякъюъ учӀвру.