Ляхнар 13 - Гирами Китаб

Варнавдинна Саулин гъуллугъ ккебгъувал

¹ Антиохияйин хъугънайидаригъ гьамцдар пайгъамбрар ва мялимар гъяйи: Варнав, КӀаруч кӀуру Симеон, Киринеяйиан вуйи Луций, юкьур паччагьдикан сар Гьироддихъди сатӀиди тербияламиш гъапӀу Манаил ва Саул.

² Дурари Агъайиз гъуллугъ апӀури, ушвар дидиснайи вахтна, Гирами Рюгьну кӀуру: – Узуз Варнавна Саул жара апӀинай, гьаз гъапиш дурари Узу чпиз пуз ккайиб тамам апӀиди.

³ Дурари ушвар дидисну, ккарагну, Варнавдиинна Саулиин хилар иливну, деетуру.

Варнавна Саул Киприин хьуб

⁴ Гирами Рюгьну гьаъну, дурар Селевкияйиз гъюру, хъа душвʼан Киприина сирнав апӀуру.

⁵ Саламиндиз дуфну, дурари жугьдарин мистариъ Аллагьдин Гаф рабгъуру. Дурарихъди кюмек апӀури, Югьаннара хъайи.

⁶ Вари Кипр вуйибси душну, тму кӀулихъ хъайи Пафосдиз гъурукьган, дурариз Варисус (Елима) кӀуру сар жугьуд сюгьюрчи – кучӀлин пайгъамбар, гьахъру.

⁷ Думу Кипр вилаятдин аьхюр вуйи фагьумлу кас Сергий Павелин гъуллугъчи вуйи. Сергий Павели, Варнавна Саул хъади гъюз гъитну, дурарикан Аллагьдин Гаф ктибтуб ккун апӀуру.

⁸ Хъа Елимайи (ччвурнан мяна «сюгьюрчи» ву) гьар жюрейин манигъвалар апӀури, Сергий Павел хъугъувалихьан ярхла апӀуз чарйир зигуйи.

⁹ Гьадмуган учвра Павел вуйи Саули, Гирами Рюгьнахьди ацӀну, дугъахьинди ижмиди дилигну,

¹⁰ кӀуру: – Агь хаинвалина писвали абцӀнайи иблисдин бай, дугъривалин душман! Уву Агъайин диш рякъяр цӀаркувал фила ккутӀдива?

¹¹ Узухъ хъебехъ! Гьамус Агъайи магьа увʼин хил иливна, кур духьну, саб вахт хьайиз, ригъ рябкъидарвуз. Сабпну дугъан улариин дерин мучӀушин улубчӀвуру ва думу, учв хъади гъярур агури, минди-тинди илтӀикӀури, лицуру.

¹² Му гьядиса дябкъну, Агъайин аьгъювалариин аьламат духьну, Сергий Павел хъугъру.

Писидияйин Антиохияйиъ

¹³ Павел ва дугъахъди хъайидар, Пафосдиан сирнав гъапӀдар, Памфилияйиъ айи Пергия шагьриз гъюру, хъа Югьан дурарихьан жара духьну, Ерусалимдиз хътакуру.

¹⁴ Пергияйиантина дурари чпин рякъ давам апӀури, Писидияйин Антиохияйиз гъюру. Султ йигъан дурар, жугьдарин мистаз дуфну, душваъ деъру.

¹⁵ Мусайин къанун ва пайгъамбрарин китабар урхбалан кьяляхъ, мистан аьхюдари дурарихьна гьамци пуз гьаъру: – Гъардшар, эгер ичв халкьдиз тувру насигьят аш, йипай.

¹⁶ Гьадмуган гъудужвну, хил за дапӀну, Павели кӀуру: – Израилин халкь ва Аллагьдихьан гучӀрудар, хъебехъай!

¹⁷ Израилин халкьдин Аллагьди ихь абйир ктагъну ва Дугъу ихь халкь, дурар гьеле Египетдиъ гъурабйирди имиди, заан гъапӀну ва Чан кьудратлу хилʼинди гьадму ругарилан алдаъну.

¹⁸ Ва ягъчӀвур йисандин арайиъ ичӀи чюлиъ дурарин тӀулар аьх апӀури гъахьну.

¹⁹ Хъасин Ханаан вилаятдиъ ургуб халкь тӀанкь дапӀну, Дугъу израиллуйириз гьадрарин жил ирс вуди тувну.

²⁰ Му ляхнар вари 450 йисандин арайиъ гъашидар ву. Хъасин Дугъу дурариз Шамуил пайгъамбриина гъяйизкьан, халкьдин аьхюдарди судйир тувнийи.

²¹ Хъасин дурари паччагь ккун гъапӀнийи, ва Аллагьди Вениаминдин тухмиан паччагьди Кишдин бай Саул тувнийи. Дугъу ягъчӀвур йисан паччагьвал гъапӀнийи.

²² Саул ултӀуккну, Аллагьди Давуд паччагьди дерккну. Дугъкан дугъу гьамци шагьидвал гъапӀну: «Ессейин бай Давуд Йиз кӀваз хуш гъахьнийиз. Узу амур гъапӀкьандар вари дугъу тамам апӀиди».

²³ Ари Давудрин насларикан, Чав гаф тувиганси, халкь Уьрхрур – Иса, Израилиз бахш гъапӀну.

²⁴ Иса гъяйиз улихьна Ягьʼяйи Израилин халкьдиз, чпин тахсрар гардандиъ дидисну, штуан апӀбан аьгъювалар улупнийи.

²⁵ Аьршариан табшурмиш дапӀнайиб тамам апӀури, Ягьʼяйи гъапнийи: «Узу фуж вуди гьисаб апӀурачва? Узу Месигь дарза, Думу йиз кьяляхъди гъиди. Узу Дугъан шаламарин гъахмйир гъядарчузкьан лайикьур дарза».

²⁶ Эй йиз гъардшар, Ибрагьимдин наслин веледар ва Аллагьдихьан гучӀрудар! Му, ухьу уьрхбан бадали, дапӀнайи гаф вуйи.

²⁷ Ерусалимдин агьалйири ва дурарин аьхюдари, Иса уьрхювал Туврур вушул пну, кьабул гъапӀундайи ва Думу жазайикк ккитнийи. Гьамци дурари пайгъамбрари гьар султ йигъан кӀурайи гафар тамам гъапӀнийи.

²⁸ Дурариз Иса йикӀбан бадали тахсир гъибихъундаршра, Пилатдикан Думу йикӀуб тӀалаб гъапӀнийи.

²⁹ Вари Гирами китабариъ Исайикан дибикӀнайиси дурарин тамам гъабшиган, Дугъан беден, дарикан кадабгъну, накьвдиъ ивнийи.

³⁰ Аммаки Аллагьди Думу чӀиви гъапӀнийи.

³¹ Хайлин йигъари Чахъди Галилейиан Ерусалимдиз гъафидариз Думу ачмиш шули гъахьнийи. Хъа гьамус дурар халкьдин улихь Дугъан шагьидар ву.

³² Аллагьди ихь абйириз тувнайи гаф ухьуз, дурарин баяриз, Иса чӀиви апӀбиинди тамам апӀбакан Ужувлан хабар учвуз деебтурача.

³³ Мидкан Гирами китабарин кьюбпи шиъриъ дибикӀна: «Уву Йиз Бай вува, гьамус Узу Яв Адаш гъахьунза».

³⁴ Иса гъачӀихъан, дутӀну, ругдиз илтӀитӀикӀбан бадали, Аллагьди Думу чӀиви гъапӀну, ва мидкан гьамци дупна: «Узу Давудриз гаф туву гирами ва шаксуз ужувлар учвуз тувдиза».

³⁵ Фицики Мяълийирин китабдин жара йишваъ Аллагьди дупна: «Уву Яв Гирамир ругдиз илтӀикӀуз гъидритара».

³⁶ Чан вахтна Давуд Аллагьдин гъуллугънаъ духьну, кечмиш гъахьну, думу чан абйирин накьваригъ кивну ва ругдиз илтӀикӀну.

³⁷ Хъа Аллагьди гъачӀихъан чӀиви гъапӀу гьадму Кас ругдиз илтӀикӀундар.

³⁸ Ва гьаддиз, гъардшар, учвуз аьгъю йибхьайки, ичв гунгьарилан хил алдабгъувал Исайилантина дебккначвуз.

³⁹ Мусайин къанундиинди учву гьякьлу апӀуз даршлуган, варибдиъ гьарсар хъугънайир Исайилантина гьякьлу апӀиди.

⁴⁰ Гьаддиз, пайгъамбрари дупнайи исихъайи гафар учвʼин улулуркьбан бадали, ихтият йихьай:

⁴¹ «Хъебехъайчва, шаклу шулайидар, мюгьтал йихьай ва дург йихьай, фицики Узу ичв йигъари учву хътругърусиб ляхин апӀидиза. Учву дидихъ, шликӀа гъаври аишра, хъугъидарчва».

⁴² Варнавна Павел мистʼан удучӀвурайиган, дурари хъа султ йигъанна гьамдикан ктибтуб ккун апӀуру.

⁴³ Алдагъиган, жугьдарин ва жара миллетдин хъугънайидарикан гизафдар Павелинна Варнавдин кьяляхъди гъягъюру. Мурари халкьдихъди сюгьбатар гъахури, дурар Аллагьдин гьякь рякъюъ гъузуб ижми апӀуру.

⁴⁴ Гъюру султ йигъан шагьрин, сакьюдар ктарди, вари агьалйир Аллагьдин гафнахъ хъпехъуз уч гъахьнийи.

⁴⁵ Гизаф халкь гъябкъиган, жугьдар хъюлу ацӀну, Павели кӀурайи гафариз къаршу удучӀвуз ва дугъаз люкьнар апӀуз хъюгъру.

⁴⁶ Гьадмуган Павелина Варнавди дурариз дирбашди кӀуру: – ЖарадаризтӀан сифте учвуз Аллагьдин Гаф улупну ккундийи. Хъа думу кьабул дарапӀбиинди гьаргандин уьмрихьан ичв учву мягьрум апӀураш, учу гьамус жугьуд дарударихьинди илдицидича.

⁴⁷ Агъайи гьамци табшурмиш гъапӀунчуз: «Уву вари дюнʼя уьбхбан бадали, Узу Увкан жара миллетариз чирагъ гъапӀунза».

⁴⁸ Му гафар гъеерхьиган, жугьуд дарудар шад гъаши ва дурари Агъайин гафнан тяриф апӀуз хъюгъю; ва гьаргандин уьмриз кадагънайидар хъугънийи.

⁴⁹ Гьамци вари вилаятдиъ Агъайин Гаф рабгъурайи.

⁵⁰ Хъа жугьдарин маллйири дурариин диндихъ хъайи гьюрматлу дишагьлийир ва шагьрин кӀулиъ айи адмийир алауру. Дурар Павелихъна Варнавдихъ хъергру ва дурар шагьриан утӀурккуру.

⁵¹ Павелна Варнав, чпин ликарик кайи бишируг гьадму адмийириина кутӀубччвну, Иконияйиз гъягъюру.

⁵² Вари ученикар гьаммишан шадвали ва Гирами Рюгьну ацӀну шулу.